Gikan sa Amon mga Bumalasa

Ang Arka ni Noe kag ang Arkitektura sang mga Barko (Enero 2007) Nahibaluan ko nga ginhimo sing makatilingala ang arka, apang wala ko mahangpan kon paano gid ini ginhimo. Mahapos mahangpan ang pagpaathag sini kon paano ang kalabaon, kalaparon, kag kataason sang arka nagakabagay gid sa pagbiyahe sa dagat. Ginhagad ko ang mga pamatan-on sa amon kongregasyon nga maghimo sing gamay nga modelo sang arka, kag ginsunod namon ang diagram sa magasin. Naghimo kami sing origami (papel nga modelo) nga mga sapat kag ginbutang sa sulod sang arka kag gindrowing man namon si Noe kag ang iya pamilya. Paagi sini, nadugangan pa gid ang amon nahibaluan tuhoy sa pagtukod ni Noe sang arka. Madamo gid nga salamat.

T. A., Japan

Maluyagon gid maghimo sing magamay nga mga modelo ang akon anom ka tuig nga bata nga lalaki. Nalipay gid kami nga duha sang makita namon sa katapusan sang artikulo sang Magmata! ang instruksion kon paano maghimo sing magamay nga modelo sang arka ni Noe. Malipayon gid kami nga magkaupod sina nga hapon, salamat sa inyo matahom nga artikulo! Bangod nagakabuhi kita sa masako nga kalibutan kag nagaatubang sing mga pag-ipit sa eskwelahan ang aton magagmay nga mga kabataan, isa gid ka pagpakamaayo nga may gin-aman nga galamiton kaangay sang Magmata! agod buligan ang mga ginikanan sa pagtudlo sa ila mga kabataan tuhoy sa mga dalanon ni Jehova.

M. F., Estados Unidos

Pamangkot sang Mga Pamatan-on . . . Paano Ko Malandas Ini nga Batasan? (Nobiembre 2006) Natandog gid ako sang nabasa ko ang artikulo kag narealisar ko nga nagaulikid gid si Jehova sa aton kag nagabulig gid sia nga malubad ang aton mga problema. Bisan pa makahimo kita liwat sang sayop, si Jehova “handa sa pagpatawad.” (Salmo 86:5) Ang paghibalo sini nagabulig sa amon nga mga pamatan-on nga ‘makapalagyo gikan sa mga kailigbon nga kinaandan sa pagkapamatan-on.’​—2 Timoteo 2:22.

V.F.F., Brazil

Pamangkot sang Mga Pamatan-on . . . Ngaa Kadamo Gid sang Pagsulundan nga Dapat Ko Tumanon? (Disiembre 2006) Anom na ka tuig nga nagatuon ako sa Biblia. Bisan pa estrikto ang akon mga ginikanan sa amon nga mag-ulutod, nahibaluan ko nga nagakabalaka gid sila sa akon. Sang nabasa ko ini nga artikulo, nabuligan ako nga mahangpan ang kabalaka sang akon mga ginikanan kag maapresyar ang pag-ulikid ni Jehova sa akon.

K. T., Thailand

Isa Ako Anay ka Buhaha nga Anak (Disiembre 2006) Sugod sang 1992 nahibaluan ko na ang tuhoy kay Jehova. Apang may tion sadto nga wala ko ginsunod ang ginapatuman ni Jehova. Kaangay ni Meros Sunday, may mga higayon nga malipayon ako apang mas madamo ang higayon nga indi ako malipayon, kag pagligad sang tatlo ka tuig nga wala ako mag-alagad kay Jehova, nangayo ako sang bulig sa iya. Sa karon, nakapanumbalik na ako sa pag-alagad! Salamat sa inyo ginhimo.

D. K., Ukraine

Pamangkot sang Mga Pamatan-on . . . San-o Ako Puede Na nga Magdeyt? (Enero 2007) Nagapangidaron ako sing 15 anyos. Sang nagbisita ako sa akon tiya kag tiyo, nakilala ko ang 17-anyos nga Saksi nga lalaki. Nagsugod kami sa pag-istoryahanay paagi sa Internet, kag talagsa lang ini sang primero. Apang wala magdugay, adlaw-adlaw na kami nagaistoryahanay, kag nahulog na ang amon buot sa isa kag isa. Dayon, nabasa ko ini nga artikulo kag nabinagbinag ko nga nagadeyt na gali kami. Paagi sa bulig sang akon mga ginikanan kag sa artikulo sang Magmata!, gin-utod ko ang akon relasyon sa sini nga lalaki. Mag-abyan kami gihapon, apang ginauna ko ang akon kaangtanan kay Jehova. Daku gid ang pasalamat ko sa sini nga artikulo bangod nakamarasmas ako.

D. D., Canada