Ang Pagtamod sang Biblia

Ginapatawad Bala sang Dios ang Mabug-at nga mga Sala?

ANG pagkamaluluy-on isa sa panguna nga mga kinaiya sang Dios. (Salmo 86:15) Daw ano gid sia ka maluluy-on? Ang salmista nagsulat: “Kon ikaw, O GINOO, magtanda sang kalautan, O Ginoo, sin-o bala ang makatindug? Apang may pagpatawad sa imo, agud nga kahadlukan ka.” (Salmo 130:3, 4) Ang isa pa ka teksto mabasa: “Subong sang kalayuon sang sidlangan sa katundan, amo ang kalayuon sang iya pagpahilayo sa aton sang aton mga kalapasan. Subong sang amay nga nagakaluoy sa iya mga anak, si Jehova nagakaluoy sa mga nagakahadlok sa iya. Kay sia gid nakahibalo sang aton pagkahuman, nagadumdom nga kita yab-ok.”​—Salmo 103:12-14, NW.

Maathag nga si Jehova maluluy-on nga nagapatawad sing bug-os, kag ginadumdom niya ang aton mga limitasyon kag di-kahimpitan, nga kita “yab-ok.” Binagbinaga ang pila ka halimbawa sa Biblia nga nagapakita kon daw ano gid ka maluluy-on ang Dios.

Ginpanghiwala ni apostol Pedro si Cristo sing tatlo ka beses. (Marcos 14:66-72) Sang indi pa tumuluo si apostol Pablo, ginhingabot niya ang mga sumulunod ni Cristo. Nag-ugyon sia nga pamatyon ang iban sa ila. Kag yara pa gani sia sang ginpatay ang isa sa ila. (Binuhatan 8:1, 3; 9:1, 2, 11; 26:10, 11; Galacia 1:13) Antes mangin mga Cristiano, ang pila ka katapo sang kongregasyon sa Corinto mga palahubog, mga manugkilkil, kag mga kawatan. (1 Corinto 6:9-11) Apang, sang ulihi natigayon nila tanan ang kahamuot sang Dios. Ngaa ginpatawad sila sang Dios?

Tatlo ka Tikang Agod Mapatawad sang Dios

“Ginpakitaan ako sing kaluoy, bangod wala ako sing nahibaluan kag nagpanghikot nga wala sing pagtuo,” sulat ni Pablo. (1 Timoteo 1:13) Ang iya tampad nga pinamulong nagadul-ong sa aton sa una nga tikang nga kinahanglan agod mapatawad sang Dios. Ini amo ang pagkuha sing sibu nga ihibalo tuhoy kay Jehova kag sa iya mga talaksan nga makita  sa Biblia. (2 Timoteo 3:16, 17) Pat-od gid nga indi naton mapahamut-an ang aton Manunuga kon indi naton sia kilala. “Ini nagakahulugan sang kabuhi nga walay katapusan,” siling ni Jesus sang nangamuyo sia sa iya Amay, “ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”​—Juan 17:3.

Kon matigayon sang mga may bunayag-sing-tagipusuon ini nga ihibalo, mapahulag gid sila nga maghinulsol sing tinagipusuon. Amo ini ang ikaduha nga tikang agod mapatawad sang Dios. Ang Binuhatan 3:19 nagasiling: “Maghinulsol kamo kag magliso agod mapanas ang inyo mga sala.”

Ginsambit man sa sini nga bersikulo ang ikatlo nga tikang​—ang pagliso. Ang pagliso nagakahulugan sang pagbiya sa daan nga mga paggawi kag panimuot kag sang pagpahisuno sa mga talaksan kag pagtamod sang Dios. (Binuhatan 26:20) Buot silingon, ginapakita sang isa ka tawo paagi sa iya bag-o nga pagginawi nga sinsero gid sia sang nagsiling sia sa Dios, “Pasayluha ako.”

May Latid ang Pagpatawad sang Dios

May pila ka tawo nga wala ginpatawad sang Dios sa ila mga sala. Si Pablo nagsulat: “Kon hungod kita nga maghimo sang sala sa tapos mabaton ang sibu nga ihibalo tuhoy sa kamatuoran, wala na sing nabilin nga halad tungod sa mga sala, kundi may makahaladlok nga paghulat sa [nagapakamalaut nga] paghukom.” (Hebreo 10:26, 27) Ang mga tinaga nga ‘hungod nga maghimo sang sala’ nagapahangop sang tudok nga kalainan nga indi handa maghinulsol, kag sang isa gid ka malaut nga tagipusuon.

Nangin subong gid sini ang tagipusuon ni Judas Iscariote. “Maayo pa kuntani sa sina nga tawo kon wala sia mabun-ag,” siling ni Jesus. (Mateo 26:24, 25) Kag tuhoy sa pila ka relihioso nga lider sang panahon niya, si Jesus nagsiling: “Gikan kamo sa inyo amay nga Yawa . . . Kon maghambal sia sang kabutigan, nagahambal sia suno sa iya kinaugali, bangod butigon sia kag amay sang kabutigan.” (Juan 8:44) Kaangay kay Satanas, tudok gid ang kalainan sang amo nga mga tawo. Wala nila ginhinulsulan ang ila ginhimo kundi labi pa gid sila nga nagpakatig-a sa ila malaut nga paggawi. * Matuod, bangod sang di-kahimpitan kag mga kaluyahon, bisan ang matuod nga mga Cristiano makasala, kon kaisa sing mabug-at nga sala. Apang ang ila kasaypanan wala nagapakita sang tudok kag malaut nga panimuot.​—Galacia 6:1.

Maluluy-on Tubtob sa Katapusan

Indi lamang ang sala ang ginatalupangod ni Jehova kundi ang panimuot man sang nakasala. (Isaias 1:16-19) Binagbinaga ang kahimtangan sang duha ka makasasala nga yara sa usok sa tupad ni Jesus. Maathag nga nakahimo sila nga duha sing mabug-at nga krimen, kay gin-ako sang isa sa ila: “Ginabaton naton sing bug-os ang nagakadapat sa aton tungod sa mga butang nga aton ginhimo; apang ini nga tawo [si Jesus] wala sing nahimo nga malain.” Ginapakita sa ginsiling sang makasasala nga may nahibaluan sia tuhoy kay Jesus. Kag ini nga ihibalo mahimo gid nga nakabulig sa pagbag-o sang iya panimuot. Makita naton ini sa masunod niya nga ginsiling, nga nagapangabay kay Jesus: “Dumduma ako kon magsulod ka sa imo ginharian.” Ano ang sabat ni Jesus sa iya tinagipusuon nga pangabay? “Sa pagkamatuod ginasiling ko sa imo karon nga adlaw,” siling niya, “Mangin kaupod ko ikaw sa Paraiso.”​—Lucas 23:41-43.

Hunahunaa ini: Ang katapusan nga ginsiling ni Jesus bilang isa ka tawo nagalakip sang pinamulong nga may kaluoy sa isa ka tawo nga nag-ako nga takus sia sa silot nga kamatayon. Makapalig-on gid ini! Kon amo, pat-od gid nga si Jesucristo kag ang iya Amay nga si Jehova, magakaluoy sa tanan nga nagapakita sing matuod nga paghinulsol, wala sapayan sang ila mga ginhimo sang nagligad.​—Roma 4:7.

[Nota]

NAMANGKOT KA BALA?

▪ Paano ilaragway ang pagkamaluluy-on sang Dios?​—Salmo 103:12-14; 130:3, 4.

▪ Ano nga mga tikang ang dapat himuon agod kahamut-an sang Dios?​—Juan 17:3; Binuhatan 3:19.

▪ Ano ang ginsaad ni Jesus sa isa ka makasasala nga yara sa usok?​—Lucas 23:43.

[Retrato sa pahina 10]

Ginpakita ni Jesus nga mahimo mapatawad ang mabug-at nga mga sala