Sa Indi Madugay ang Krimen “Wala Na”

“Sa diotay pa nga tion, kag ang malauton wala na.”​—SALMO 37:10.

SI Jehova nga Dios, nga aton Manunuga, interesado gid sa iya mga tinuga nga tawo; indi sia malayo, subong sang pagpati sang iban. (Salmo 11:4, 5) Isa pa, nakita niya ang tanan nga krimen kag inhustisya, pati na ang indi matalupangdan sang tawo. “Ang mga mata sang GINOO yara sa tagsa ka duug, nga nagabantay sang malaut kag maayo.” (Hulubaton 15:3) Gani makasalig kita nga ang malauton yara gid sa “madanlug nga mga duug.”​—Salmo 73:12, 18.

Apang, ang mga wala sing kasawayan kag matarong may makalilipay nga paglaum, bisan pa imol sila kag ginapigos pa gani. “Tandai ang himpit nga tawo, kag tan-awa ang matadlong,” sulat sang salmista nga si David, “kay may malipayon nga katapusan sa tawo nga makidaiton.” (Salmo 37:37) Makalugpay gid ini nga pinamulong sa aton karon, bangod may paglaum kita nga makita ang katumanan sini sa bug-os nga kalibutan sa indi madugay.

Nagakabuhi Kita sa Katapusan nga mga Adlaw

Mga 2,000 ka tuig na ang nagligad, ginpamangkot sang iya mga disipulo si Jesucristo sang isa ka pamangkot nga may kahulugan tubtob pa sa palaabuton. “Sugiri kami,” siling nila, “ano ang mangin tanda sang . . . katapusan sang sistema sang mga butang?” (Mateo 24:3) Ang sabat ni Jesus mabasa sing detalyado sa Biblia sa Mateo kapitulo 24, Marcos kapitulo 13, kag Lucas kapitulo 21. Ginalaragway sining tatlo ka Ebanghelyo nga sa katapusan nga mga adlaw sang kalibutan  karon may mga inaway, tiggulutom, balatian, mabaskog nga mga linog, kag talalupangdon nga paglapnag sang pagkamalinapason.

Ang makahalanguyos nga kahimtangan nga gintagna ni Jesus nagsugod sang 1914. Subong sang ginsiling sang istoryador nga si Eric Hobsbawm sa iya libro nga Age of Extremes, ang ika-20 nga siglo “wala duhaduha nga amo ang pinakamadugo nga siglo sa maragtas.”

Tuhoy sa paglapnag sang kalautan karon, ang Biblia nagasiling: “Kon ang malauton magtubo subong sang hilamon kag kon ang tanan nga manughikot sang kalautan maglambo, ini amo agud nga laglagon sila sing dayon.” (Salmo 92:7) Huo, ang pamatuod maathag: Ang lapnag gid nga pagkamalinapason karon, nga kaangay sa nagatubo nga hilamon sa panahon sini, nagapamatuod nga malapit na gid ang paglaglag sa mga malauton! Indi bala maayo ini nga balita?​—2 Pedro 3:7.

“Ang mga Matarung Magapanubli sang Duta”

“Ang mga matarung magapanubli sang duta, kag magapuyo dira sa gihapon,” siling sang Salmo 37:29. Ang tanan nga sahi sang krimen kag inhustisya madula na. Busa, wala na ang tanan nga butang may kaangtanan sa krimen, subong sang mga alarma sa seguridad, kandado, hukmanan, abogado, pulisiya, kag prisuhan. Ang Biblia nagasaad: “Ang una nga mga butang indi na pagdumdumon ukon mag-abot sa painoino.”​—Isaias 65:17.

Huo, ang duta kag ang katilingban sang mga tawo magabag-o sing bug-os nga wala pa gid anay matabo. (Isaias 11:9; 2 Pedro 3:13) Amo ini ang malig-on nga paglaum sang mga Saksi ni Jehova, kag ginaagda ka nila nga mangusisa agod makita mo mismo nga mangin matuod gid ini sa indi madugay. Dumduma, ang Isa nga nagtuytoy sa pagsulat sing Balaan nga Kasulatan “indi makabutig.”​—Tito 1:2.

[Kahon/​Retrato sa pahina 9]

PAGBULIG SA MGA PRISO NGA MAKILALA ANG DIOS

Sa sulod sang mga tinuig, ang mga Saksi ni Jehova sa Estados Unidos nakabaton sang mga sulat halin sa mga priso sa 4,169 ka prisuhan, ospital sang mga priso, kag pasilidad nga nagahunong sa mga nagdroga agod buligan nga mag-ayo. Ang iban nagapangayo sang mga literatura sa Biblia; ang iban nagapangabay sang wala bayad nga pagtuon sa Biblia. Ginakadtuan sang kalipikado nga mga Saksi ang mga nagapangabay sini. Sa katunayan, ang mga Saksi sa bug-os nga kalibutan nagaduaw pirme sa mga prisuhan agod maghiwat sang mga pagtuon sa Biblia upod sa mga priso, babayi kag lalaki, nga nagapangayo sing bulig agod makatuon tuhoy sa Dios. Madamo sa ila ang naghimo sang tumalagsahon nga pagbag-o sa ila personalidad, ginbawtismuhan subong mga Cristiano, kag nagakabuhi nahisuno sa kasuguan.