Gindesinyo Bala Ini?

Ang Masibod nga Mata

▪ “Nasampawsampaw gid ini sing maayo.” Amo ini ang paglaragway ni Propesor Luke Lee sang University of California U.S.A., sa masibod nga mata sang madamo nga insekto.

Hunahunaa: Ang mata sang pila ka insekto, kaangay sang putyukan kag sitsiritan, may madamo nga lente nga ang kada isa sini makahimutad sa tuhay nga direksion. Ang mga laragway nga mahimutaran sang tagsa ka lente nagatingob amo nga makita sini ang tanan, kag matalupangdan gid sini ang mga hulag.

Ang mga sientista nagapangita sing mga paagi sa pag-ilog sang masibod nga mata sang insekto agod makahimo sing gamit nga makakita sang tuman kadasig nga hulag kag sang mga kamera nga tuman kagamay nga makakita sa tanan nga anggulo sing dungan. Magamit ini sa madamo nga paagi. Halimbawa, mahimo ini gamiton sa medisina agod mausisa ang sulod sang tiyan. Ining ginaplano nga “gamay nga gamit” sa medisina, puede matulon sang pasyente. Kon yara na ini sa sulod sang tiyan, ining wala sing kable nga gamit makakuha kag makapadala sang impormasyon paagi sa iya masibod nga mata.

Ang isa ka grupo sang mga sientista nga nagakopya sang desinyo sang mga tinuga nakaimbento na sing artipisyal nga mata nga may kapin sa 8,500 ka lente. Pareho ini kagamay sa ulo sang yano. Apang, ini nga gamit indi makatupong sa masibod nga mata sang mga insekto. Halimbawa, ang tagsa ka mata sang sitsiritan may halos 30,000 ka lente!

Pamangkuta ang imo kaugalingon: ‘Ining masibod bala nga mata sang mga insekto natabuan lamang? Ukon gindesinyo bala ini?’

[Retrato sa pahina 26]

Ginpadakuan nga bahin sang masibod nga mata sang putyukan

[Credit Lines sang retrato sa pahina 26]

Background: © Stephen Dalton/​Photo Researchers, Inc.; close-up: © Raul Gonzalez Perez/​Photo Researchers, Inc.