Isa Lang Bala ang Matuod nga Relihion?

May mga tawo nga nalainan sini nga pamangkot. Suno sa ila, kadamo gid sang relihion sa bug-os nga kalibutan, gani ang bisan sin-o nga nagasiling nga iya lang relihion ang matuod mahimo nga makitid sing panghunahuna, ukon bugalon pa gani. Siling nila may maayo sa tanan nga relihion, ukon kon indi man tanan, sa kalabanan nga relihion. Amo man bala sini ang imo pagtamod?

MAY mga kahimtangan gid man nga mahimo husto ang nanuhaytuhay nga mga opinyon ukon pagpati. Halimbawa, ang isa mahimo magpati nga mangin mas mapagros sia kon pilion niya ang mga pagkaon nga iya kaunon. Apang, dapat bala nga piliton man niya ang iban nga kaunon ini, kay nagapati sia nga amo lamang ini ang makapapagros nga pagkaon? Maayo nga binagbinagon man niya nga basi ang ginakaon sang iban makapapagros man para sa ila ukon basi mas maayo pa gani sangsa ginakaon niya.

Pareho man bala sini kon nagapili sang relihion? Madamo bala ang maayo nga relihion nga mapilian naton, kag ang pagpili bala depende sa aton gindak-an kag ginapatihan? Ukon isa lang bala ang matuod nga relihion nga dapat sudlan sang tanan nga tawo? Tan-awon naton ang ginasiling sang Biblia. Apang, binagbinagon naton anay kon bala may kamatuoran gid. Kay kon wala man lang, wala sing pulos ang pagpangita sa matuod nga relihion.

Posible Bala nga Makilala ang Matuod nga Relihion?

Antes ginpatay si Jesus, ginsilingan niya ang nagainterogar sa iya nga Romano nga gobernador nga si Poncio Pilato: “Ang tagsatagsa nga dampig sa kamatuoran nagapamati sa akon tingog.” Daw nagapangduhaduha si Pilato sang nagpamangkot sia: “Ano ang kamatuoran?” (Juan 18:37, 38) Apang, hayag kag maisugon nga ginhambal ni Jesus ang kamatuoran. Napat-od niya nga may kamatuoran. Halimbawa, binagbinaga ang masunod nga apat ka pinamulong ni Jesus sa lainlain nga mga tawo.

“Tungod sini natawo ako, kag tungod sini nagkari ako sa kalibutan, agod magpanaksi ako sa kamatuoran.”​—Juan 18:37.

“Ako amo ang dalan kag ang kamatuoran kag ang kabuhi.”​—Juan 14:6.

“Ang Dios Espiritu, kag ang mga nagasimba sa iya dapat magsimba sa espiritu kag kamatuoran.”​—Juan 4:23, 24.

“Kon magpabilin kamo sa akon pulong, mga disipulo ko gid kamo, kag mahibaluan ninyo ang kamatuoran, kag ang kamatuoran magahilway sa inyo.”​—Juan 8:31, 32.

Bangod kumbinsido nga naghambal si Jesus tuhoy sa kamatuoran kag puede ini matun-an, indi bala posible gid nga may matuod nga relihion kag mahimo naton ini makita?

May Kamatuoran Gid Bala?

May mga butang nga wala mo ginaduhaduhaan. Matuod gid nga nagaluntad ka kag ang mga butang sa imo palibot. Ang adlaw, bulan, panganod, kakahuyan, kabukiran, kag ang aton kalibutan, indi imahinasyon lamang. Bisan kumbinsihon ka pa sang iban nga ini nga mga butang indi matuod, mahimo gid nga indi mo sila pagpatihan.

Wala mo man ginaduhaduhaan ang kasuguan sang kinaugali. Halimbawa, kon maglumpat ka sa pil-as, mahulog ka; kon indi ka magkaon, gutumon ka; kag kon indi ka gid magkaonkaon, mapatay ka. Wala mo ginapaligban kon bala ang epekto sini nga kasuguan para lang sa pila ka tawo, kag wala ini sing epekto sa iban. Nahibaluan mo nga mahimo ini matabo sa tanan nga tawo.

Ginpatuhuyan sang Biblia ang isa ka kasuguan  nga para sa tanan nga tawo sang mamangkot ini: “Makabutang bala ang lalaki sing kalayo sa iya sabak kag indi masonog ang iya mga panapton?” Sang ginsulat ini, ang tanan nakahibalo nga masunog ang panapton kon magduot ini sa kalayo. Apang, sa sini nga mga pinamulong, ginapakita sang hulubaton sa Biblia ang mas talalupangdon nga punto, nga “ang nagahiusa sa asawa sang iya isigkatawo” magaantos sing malain nga mga resulta.​—Hulubaton 6:27, 29.

Sigurado bala kita nga ini nga mga tinaga matuod gid? May magasiling nga indi. Nagasiling sila nga lainlain ang pagsulundan tuhoy sa maayo kag malain sang tagsa ka tawo, kag depende ini sa gindak-an, pagpati, kag mga kahimtangan sang isa. Apang, binagbinaga ang pila ka kasuguan sang Dios nga mabasa sa Biblia tuhoy sa maayo kag malain. Indi bala nga naaplikar ini sa tanan nga tawo?

Ginapakamalaut sang Biblia ang pagpanghilahi. (1 Corinto 6:9, 10) Ang iban wala nagapati sa sini nga panudlo sang Biblia, gani nagapanghilahi sila. Apang, indi nila malikawan ang mapait nga mga resulta sini subong sang ginatublag nga konsiensia, pagdiborsio, kag madalom nga mga pilas sa balatyagon sang tanan nga naapektuhan sang pagpanghilahi.

Ginapakamalaut man sang Dios ang pagpahubog. (Hulubaton 23:20; Efeso 5:18) Ano ang nagakatabo sa mga nagapahubog? Masami nga nagabalatian sila, nagakadulaan sing obra, kag nagakabungkag ang ila pamilya nga apektado man sang ila pagpahubog. (Hulubaton 23:29-35) Ining malain nga mga resulta nagakatabo bisan sa mga wala nagapati nga malain ang magpahubog. Ang epekto bala sini nga mga kasuguan tuhoy sa maayo kag malain depende lamang sa pagpati ukon pagtamod sang tagsatagsa?

Ginasugo man kita sang Biblia nga maghimo sing maayo nga mga butang, subong sang paghigugma sa asawa, pagtahod sa bana, kag paghimo sing maayo sa iban. (Mateo 7:12; Efeso 5:33) Ang pagtuman sini may maayo nga mga resulta. Masiling mo ayhan nga ini nga mga sugo para lang sa pila ka tawo kag indi para sa tanan?

Sundon man ukon indi sang mga tawo ang mga kasuguan sang Biblia tuhoy sa maayo kag malain, may epekto ini gihapon sa ila. Ginapakita sini nga ini nga mga kasuguan indi lamang lainlain nga mga pagtamod, kundi mga kamatuoran. Ang ebidensia nagapakita nga maayo gid ang resulta kon sundon ang mga kasuguan sang Biblia, apang malain kon indi ini pagsundon.

Gani hunahunaa: Bangod maayo ang resulta kon sundon sang tanan ang kasuguan sang Biblia tuhoy sa maayo kag malain, kamusta ang pagsulundan sang Pulong sang Dios tuhoy sa pagsimba? Ano ang ginasiling sini tuhoy sa nagakatabo kon mapatay kita kag sa aton paglaum nga kabuhi nga walay katapusan? Maathag nga ini nga mga panudlo sang Biblia kamatuoran, kag para sa tanan. May maayo nga resulta kon sundon ini kag may malain nga resulta kon supakon ini.

Mahimo makita ang kamatuoran. Si Jesus nagsiling nga ang Pulong sang Dios, ang Biblia, kamatuoran. (Juan 17:17) Apang, daw indi gihapon  matigayon ang kamatuoran. Ngaa? Bangod madamo nga relihion ang nagasiling nga suno man sa Biblia ang ila panudlo. Ano gid nga relihion ang nagatudlo sang kamatuoran gikan sa Pulong sang Dios? Isa lang bala ka relihion ang nagatudlo sini? Yara bala ang tanan nga kamatuoran ukon bisan ang pila lang ka kamatuoran sa nanuhaytuhay nga mga relihion?

[Blurb sa pahina 4]

Ngaa ang pagsupak sa mga kasuguan sang Dios kaangay sa pagbutang sing kalayo sa imo sabak?