Isa ka Masaligan Gid nga Palaabuton!

Nakalab-ot ka sa ginsang-an nga dalan. Ang isa ka karatula nagasiling, “Magsalig sa mga tawo kag sa ila mga pangako.” Ang isa naman nagasiling, “Magsalig sa Dios kag sa iya Ginharian.” Sa diin ang pilion mo?

MAALAMON gid nga magsalig sa Dios. “Ang nagapamati sa akon,” siling niya, “magapuyo sing malig-on kag magmalinong, sa wala sing kahadluk sa malaut.” (Hulubaton 1:33) Ginapamatian naton ang Manunuga kon ginatuman naton ang mga panudlo sang Biblia kag nagasalig sa sini. (2 Timoteo 3:16) May basihan bala inang pagsalig? May yara gid! Halimbawa, subong sang nakita naton sa ikaduha nga artikulo sa sining serye, ang Biblia lamang ang nagapaathag sing sibu kon ngaa wala nagamadinalag-on ang mga tawo sa paggahom sa ila kaugalingon. Wala ka bala nagaugyon nga ang ginasiling sang Biblia nahisanto gid sa matuod nga mga nagakatabo?

Ining pagkasibu makita man sa mga tagna sang Biblia. Halimbawa, gintagna sang Biblia ang mabudlay gid nga kahimtangan nga makita sa sining “katapusan nga mga adlaw.” Nasaksihan naton ini mismo. (Mateo 24:3-7; 2 Timoteo 3:1-5) Gintagna pa gani sang Biblia nga ang mga tawo magahalit sa duta sang nagsiling ini sa Bugna 11:18 nga ang Dios ‘magalaglag sa mga nagalaglag sang duta.’

Sang ginsulat ining mga pinamulong mga 2,000 ka tuig na ang nagligad, wala pa sadto sing polusyon  sa hangin, sa dagat, kag sa duta; pag-init sang globo; kag pagkapapas sang mga sapat bangod sa ginapanghimo sang tawo. Apang nagakatabo na ini karon! Huo, ang Dios wala gid nagabutig. Nagakatuman ang iya Pulong bisan sa pinakagamay nga detalye. * (Tito 1:2; Hebreo 6:18) Sa katunayan, nataya ang ngalan sang Dios sa katumanan sang iya pulong.

Masaligan nga Ngalan

Subong nga ang pirma sa tseke isa ka garantiya, ang personal nga ngalan nga Jehova isa man ka garantiya sa tanan nga saad nga nasulat sa Biblia. * “Nagasalig kami sa iya balaan nga ngalan,” siling sang isa ka manunulat sang Biblia nga pirme nakaeksperiensia sang mahigugmaon nga pag-ulikid sang Dios.​—Salmo 33:21; 34:4, 6.

Bilang pag-angot sa ngalan sang Dios sa pag-atipan nga ginahatag niya subong isa ka amay, ang Hulubaton 18:10 (NW), nagasiling: “Ang ngalan ni Jehova torre nga mabakod. Ang matarong nagadalagan sa sini kag ginahatagan sing pangamlig.” Sing kaanggid, ang Roma 10:13 nagasiling: “Ang tagsatagsa nga nagatawag sa ngalan ni Jehova maluwas.” Apang ang ngalan sang Dios indi isa ka anting-anting nga nagaamlig sa aton sa kalainan. Sa baylo, ang Dios mismo amo ang nagaluwas, kag suno sa sini nga teksto, nagatawag sila sa iya bangod daku gid ang ila pagsalig sa iya, kay nahibaluan nila nga wala gid nagakapaslawan ang iya mga saad. Ang Salmo 91:14 nagasiling: “Bangud nga ginhigugma niya ako [si Jehova], busa luwason ko sia; ipahamtang ko sia sa hitaas, bangud nga ginkilala niya ang akon ngalan.”

Pamangkuta ang imo kaugalingon, ‘Kay sin-o ako nagasalig​—sa Dios ukon sa tawo?’ Ang mga Saksi ni Jehova namat-od nga magsalig sa Dios kag sa iya Ginharian indi lamang bangod luyag nila magpati sa sini ukon bangod ginapatihan nila ang bisan ano nga mabatian nila, kundi bangod sa mabaskog nga pagpati nga pasad sa sibu nga ihibalo sang Biblia. (Hebreo 11:1; 1 Juan 4:1) Busa, wala sila nahadlok sa palaabuton kundi ‘nagakasadya sila sa ila paglaum’ sa palaabuton. Luyag man nila ipaambit sa imo inang masanag nga palaabuton.​—Roma 12:12.

[Mga nota]

[Blurb sa pahina 9]

Subong nga ang pirma sa tseke isa ka garantiya, ang personal nga ngalan nga Jehova isa man ka garantiya sa tanan nga saad nga nasulat sa Biblia

[Kahon sa pahina 9]

NGALAN KAG GARANTIYA

Ang ngalan sang Dios nga Jehova indi lamang isa ka ngalan nga nagapakilala sa iya. * Ano ang buot silingon sini? Ina nga ngalan nagakahulugan sing “Sia nga Nagapahanabo nga Mangin Amo.” Sa simple nga hambal, ang Dios may gugma, gahom, kag kaalam nga mangin bisan ano nga luyag niya kon kinahanglanon agod matuman ang iya katuyuan kag pulong. Halimbawa, puede sia mangin isa ka Manluluwas sang mga matarong, isa ka Manuglaglag sang mga malauton, isa ka Manugpamati sang pangamuyo, ukon isa ka mahigugmaon nga Amay​—bisan ano nga luyag niya mangin amo.

“Ako ang Dios,” siling ni Jehova, “ang Isa nga nagapahayag sang katapusan kutob sa ginsuguran, . . . ang Isa nga nagasiling, ‘Ang akon tinutuyo magapadayon, kag ang tanan nga ginakahamut-an ko himuon ko.’” (Isaias 46:9, 10, NW) Bangod ginatuman ni Jehova ang iya hambal kag bangod nadalahig ang iya ngalan, ukon reputasyon, sigurado gid nga matuman ang iya nasulat nga Pulong. “Ang Dios indi tawo, nga magbutig.”​—Numeros 23:19.

[Nota]