Ang Gin-usisa nga Dugo Hilway Bala sa Katalagman?
Ang Gin-usisa nga Dugo Hilway Bala sa Katalagman?
SUNO SA MANUNULAT SANG MAGMATA! SA NIGERIA
▪ NAG-UTWAS ini nga pamangkot sang nahibaluan nga may HIV (human immunodeficiency virus nga ginatunaan sang AIDS) ang bata nga babayi bangod sang pagtughong sa iya sing dugo sa isa ka kilala nga ospital sa Nigeria.
Suno sa direktor sang ospital, wala madugay pagkabun-ag ni Eniola nasayasat nga may yara sia jaundice, isa ka balatian nga kaanggid sa hepatitis. Nagdesisyon ang doktor nga tughungan sing dugo si Eniola, gani nagdonar sing dugo ang amay sang bata. Apang indi pareho ang tipo sang ila dugo, gani ang natago nga dugo sa ospital amo ang gintughong. Wala madugay, nasayasat nga may HIV ang bata, bisan pa nga wala man sini nga balatian ang iya mga ginikanan. Suno sa ospital, “ang dugo gin-usisa anay antes gintughong sa bata kag wala ini sing HIV sa tion sang pagtughong.”
Kon amo, paano nalatnan ang bata? Gin-imbestigahan ini sang gobierno sang Nigeria kag naghinakop sila nga mahimo gid nga nalatnan ang bata bangod sa gintughong nga dugo. Ang pamantalaan nga Nigerian Tribune nagkutlo sa ginsiling sang virologist (ukon sientipiko nga nagatuon sang mga kagaw): “Sang gindonar ang dugo, yara sa ginatawag nga window period sang impeksion sang HIV ang nagdonar.”
Bisan pa isa lamang ini ka kaso, ginapakita sini nga indi hilway sa katalagman ang pagpatughong sing dugo. Ang U.S. Centers for Disease Control and Prevention nagpaathag tuhoy sa window period sang HIV, nagsiling ini: “Ang sistema sang lawas sa pagbato sa mga balatian nagakinahanglan sang tion sa pagpatubas sing bastante nga mga antibody (depensa sa mga kagaw) agod makita ini sa pag-usisa. Sa kada tawo indi palareho ang kalawigon sang tion sa pagpatubas sing bastante nga mga antibody. Ining hugna ginatawag nga ‘window period.’ Ang kalabanan nga tawo makapatubas sing bastante nga mga antibody sa sulod sang 2 tubtob 8 ka semana (sa masami 25 ka adlaw). Apang, may mga higayon nga ang pila mas madugay sa pagpatubas sini . . . Kon kaisa, 6 ka bulan pa gani.”
Gani, bisan pa nga ang dugo gin-usisa nga wala sing HIV, indi ini garantiya nga hilway na ini sa katalagman. Ang San Francisco AIDS Foundation nagapaandam: “Bisan pa wala makita ang HIV sang gin-usisa ini sa tion sang window period, sarang gihapon maliton ang HIV. Ang matuod, mas daku ang posibilidad nga maliton sang isa ang HIV sa tion sang window period (ukon sang bag-o pa lang ang isa malatnan).”
Madugay na nga ginasunod sang mga Saksi ni Jehova ang sugo sang Biblia nga “maglikaw . . . sa dugo.” (Binuhatan 15:29) Ang pangamlig nga ginhatag sini sa ila nagapadaku sang kaalam sa pagsunod sa mga ginapatuman sang Dios. Para sa dugang nga impormasyon tuhoy sa mga alternatibo nga pagbulong bilang tal-us sa pagpatughong sing dugo, palihug basaha ang brosyur nga How Can Blood Save Your Life? *
[Nota]
^ par. 8 Ginabalhag sang mga Saksi ni Jehova.