Ano ang mga Problema?

IMPOSIBLE gid ang pag-asawahay nga wala sing problema. Bisan ang mga nagasahuay gid nga mag-asawa indi man mag-ugyon sa tanan nga butang. Gani, indi gid malikawan nga may mga problema. Kaangay sang tuktok nga nagaut-ot sa metal nga napintahan, may pila man ka problema nga nagaut-ot sa pag-asawahay. Agod mahibaluan naton kon paano magmadinalag-on ang pag-asawahay, binagbinagon anay naton ang mga problema.

Ang Sobra nga Kahuol

Gintagna sang Biblia nga ang mga katawhan karon mangin “mahigugmaon sa kaugalingon, mahigugmaon sa kuarta, nagapabugal sang kaugalingon, matinaastaason, . . . di-mapinasalamaton, di-mainunungon, wala sing kinaugali nga pagpalangga, indi magsugot sa bisan ano nga kasugtanan, mabinutangbutangon, wala sing pagpugong sa kaugalingon, mabangis, wala sing gugma sa kon ano ang maayo, maluib, matig-a sing ulo, nagapahambog.” (2 Timoteo 3:2-4) Ini nga mga batasan nagadugang pa gid sa di-paghangpanay kag masakit nga paghambalanay nga indi gid malikawan sang di-himpit nga mga tawo.

Siling sang isa ka manugpanalawsaw, “Makalilibog gid nga bisan pa bastante kita sing mga impormasyon kon paano mapalig-on ang pag-asawahay, tuman gihapon kadamo sang problema sa pag-asawahay . . . Kag bangod sa impluwensia sang katilingban kag ekonomiya mabudlay matigayon ang madinalag-on nga pag-asawahay.”

Indi Realistiko nga Pagpaabot

Ang “indi realistiko nga pagpaabot,” paathag sang isa ka manuglaygay sa pag-asawahay, “amo gid ang isa sa mga kabangdanan sang di-malipayon nga pag-asawahay.” Madamo sa mga mag-asawa ang napaslawan bangod tuhay ang ila ginapaabot sa ila kahimtangan karon. Subong man, nakita na nila ang mga kaluyahon sang ila tiayon nga mahimo wala nila natalupangdan sang una ukon sobra pa sangsa ila ginapaabot.

Apang, ang Biblia prangka nga nagasiling nga ang pag-asawahay nagadala sing “adlaw-adlaw nga palaligban.” (1 Corinto 7:28, Maayong Balita) Ngaa? Ang isa sa mga rason amo nga samtang nagaupdanay ang duha ka di-himpit nga tawo magagua gid sa ulihi ang mga kaluyahon sang isa kag isa.

Dugang pa, madamo ang di-realistiko nga nagapaabot sang malipayon nga pag-asawahay apang wala man nagapanikasog nga malab-ot ini. Abi nila mangin malipayon sila gilayon kon mangasawa sila, amo nga napasapayanan na nila ang ila  katungdanan kag wala na sila nagapanikasog nga magmalipayon. Nagakapaslawan gid sila kon tuhay ang ila ginapaabot. Samtang nagadaku ang kal-ang sang realidad sangsa ila ginapaabot, labi pa gid sila nga nagakapaslawan.

Problema sa Komunikasyon

Ano nga mga problema sa komunikasyon ang mahimo malikawan agod mangin malig-on ang pag-asawahay? Pila sa mga mag-asawa ang yara sa kahimtangan nga makabati apang wala nagapamati kag nagahambalanay apang wala nagaintiendihanay. Wala sila nagaistoryahanay pirme, kag nagaistoryahanay lamang kon kinahanglanon gid kag nagasing-alanay pa. Ang sinsero nga paghambalanay natabunan na sang mga pagbinaisay sa mga butang nga indi man dapat baisan. Ang indi paghangpanay nagaresulta sa pagbinangigay kag ang masakit nga hambalanay sa indi pagsapakanay.

Sing makapasubo, indi na matalupangdan sang madamo nga mag-asawa ang maayo nga kinaiya sang ila tiayon ukon kon natalupangdan gid man nila wala nila mapabutyag ang ila apresasyon. Dugang pa, kon duha gid sila nga mag-asawa ang nagatrabaho, nagapasingit ang asawa kay magluwas sa iya trabaho, sia pa ang mahimo sing mga ulubrahon sa balay. Madamo man sa mga asawa ang nagabatyag nga daw ginabalewala na sila sang ila bana.

Paano mangin madinalag-on ang inyo pag-asawahay? Binagbinaga ang pila ka praktikal nga laygay gikan sa Biblia.

[Blurb sa pahina 4]

Pila sa mga mag-asawa ang yara sa kahimtangan nga makabati apang wala nagapamati kag nagahambalanay apang wala nagaintiendihanay

[Blurb sa pahina 5]

Madamo ang di-realistiko nga nagapaabot sing malipayon nga pag-asawahay apang wala sila nagapanikasog nga malab-ot ini