Pamangkot sang mga Pamatan-on

Paano Ko Mahimo nga Mangin Makalilipay ang Pag-alagad sa Dios?

Ang 16 anyos nga si Josh nagahigda pa sa iya katre. Samtang ang iya naman iloy nga nagatindog sa puwertahan matigdas nga nagsiling: “Joshua, bangon na da!” Bal-an mo na gid nga may miting subong!” Ginpadaku si Josh sa pamilya nga Saksi ni Jehova, kag bahin sang ila pagsimba ang regular nga pagtambong sa Cristianong mga miting. Apang, daw wala na subong sing gana nga magtambong si Josh. “Ma, bilin na lang ko bala,” ingos ni Josh. “Indi na magreklamo, ilis na,” siling sang iloy. “Indi ko gusto nga maulihi naman kita!” Nagtalikod sia dayon. Pagtalikod sang iya iloy, may ginhambal si Josh. “Imo lang na ya relihion, pero indi na ya akon.” Nahibaluan niya nga nabatian ini sang iya iloy kay nagdulog ini sa paglakat. Apang, wala na lang ini magsabat kag nagpadayon sa paglakat. Ginkonsiensia si Josh. Indi man niya tani luyag nga maglain ang buot sang iya iloy. Apang indi man niya luyag nga mangayo sing pasaylo. Ang mahimo na lang gid niya . . . Nagapaganot nga nagbangon si Josh kag nag-ilis. Nian, siling niya sa iya kaugalingon, “Sa pila ka adlaw, ako na ang magadesisyon para sa akon kaugalingon. Indi ako pareho sang iban sa kongregasyon. Wala ako sing gana nga mag-Saksi!”

NAEKSPERIENSIAHAN mo na bala ini? Nagabatyag ka bala kon kaisa nga daw napilitan ka lang mag-alagad samtang nakita mo ang iban nga malipayon sa pag-alagad sa Dios? Halimbawa:

▪ Ginakabig mo bala ang pagtuon sa Biblia nga daw kaangay lang sang asaynment mo sa eskwelahan?

▪ Nahuya ka bala nga magpamalaybalay?

▪ Natak-an ka bala magtambong sa Cristianong mga miting?

Kon huo ang sabat mo sa bisan diin sini nga mga pamangkot, indi ka maluyahan sing buot. Paagi sa pila ka mga pagpasibu, mangin makalilipay ang imo pag-alagad sa Dios. Hibaluon naton kon paano.

Hangkat #1: Pagtuon sa Biblia

Kon ngaa indi ini mahapos. Ayhan nagahunahuna ka nga indi ka gid man palatuon. Madali ka matak-an kag nabudlayan sa pagkonsentrar! Luwas pa sa sina, indi bala nga madamo ka man sing tulun-an sa eskwelahan?

Kon ngaa kinahanglan mo ini himuon. Ang Biblia indi lamang inspirado sang Dios kundi ‘mapuslanon man ini sa pagtudlo sang kamatuoran, sa pagsabdong sang sala, sa pagtadlong sang mga sayop, kag sa pagtudlo sang matarong nga pagkabuhi.’ (2 Timoteo 3:16, Maayong Balita nga Biblia) Ang pagtuon sa Biblia kag pagpamalandong sa imo nabasahan magapadalom sang imo  paghangop sa mga butang. Akuon naton, kinahanglan ang pagpanikasog kon luyag naton ang maayo nga resulta. Kon luyag mo mangin sagad sa isa ka hampang, kinahanglan mo tun-an ini kag magpraktis pirme. Kon luyag mo mangin mapagros, mag-ehersisyo ka. Kon luyag mo makilala ang imo Manunuga, tun-i ang Pulong sang Dios.

Komento sang imo mga katubotubo. “Sang hayskul ako, puro lang katuntuhan ang ginahimo sang akon mga katubotubo, gani dapat ako mamat-od: ‘Sundon ko man bala sila? Kamatuoran gid bala ang ginatudlo sang akon mga ginikanan sa akon?’ Dapat ko ini usisaon.”​—Tshedza.

“Kumbinsido gid ako nga kamatuoran ang natun-an ko, apang dapat ko ini pamatud-an. Kinahanglan nga mangin akon ini relihion, indi lamang bangod relihion ini sang amon pamilya.”​—Nelisa.

Kon ano ang himuon mo. Maghimo sing iskedyul kon san-o mo luyag nga magtuon. Ikaw ang magpili sang topiko nga tun-an mo. Kaangay sang ano? Puede mo sugdan sa pag-usisa sing maayo ang Biblia kag pamatud-an ang imo mga ginapatihan, ayhan gamit ang libro nga Ano Gid ang Ginatudlo Sang Biblia? *

Plano nga himuon. Markahi ang duha ukon tatlo ka topiko sa Biblia nga nalista sa ubos nga luyag mo mahibaluan pa gid. Ukon isulat ang mga topiko nga luyag mo tun-an.

□ May Dios gid bala?

□ Paano ko mapat-od nga gintuytuyan gid sang Dios ang pagsulat sang Biblia?

□ Ngaa dapat ko patihan ang pagpanuga kag indi ang ebolusyon?

□ Ano ang Ginharian sang Dios, kag paano ko pamatud-an nga matuod ini?

□ Paano ko ipaathag kon ano ang nagakatabo kon mapatay ang tawo?

□ Ngaa dapat ako magpati nga may pagkabanhaw?

□ Paano ko makilala ang matuod nga relihion?

□ ․․․․․

Hangkat #2: Pag-alagad sa Latagon

Kon ngaa indi ini mahapos. Mahimo nga makulbaan ka kon nagasugid ka sa iban tuhoy sa Biblia, ukon mahuya ka kon makita ka sang imo kabutho nga nagabantala.

Kon ngaa kinahanglan mo ini himuon. Ginsugo ni Jesus ang iya mga sumulunod: “Maghimo sang mga disipulo . . . , nagapanudlo sa ila nga tumanon ang tanan nga butang nga ginsugo ko sa inyo.” (Mateo 28:19, 20) Apang may dugang pa nga mga rason kon ngaa dapat kita magbantala. Ginapakita sang mga pagtuon nga ang kalabanan sang mga pamatan-on sa pila ka lugar nagapati sa Dios kag sa Biblia. Apang, ini nga mga pamatan-on wala sing matuod nga paglaum sa palaabuton. Kon tun-an mo ang Biblia matigayon mo ang impormasyon nga ginapangita kag kinahanglan gid nila!

Komento sang imo mga katubotubo. “Nagahanda kami sang akon abyan sing epektibo nga mga introduksion, kag ginatun-an namon kon paano atubangon ang mga pagpamatok kag kon paano magduaw liwat. Sang ginpauswag ko ang akon paagi sa pagbantala, nangin mas makalilipay ini.”​—Nelisa.

“Daku gid ang nabulig sa akon sang isa ka utod nga babayi! Magulang sia sa akon sing anom ka tuig, kag ginaupod niya ako sa pagbantala kag kon kaisa sa pagpamahaw. Ginapalig-on niya ako paagi sa mga teksto nga nakabulig sa akon nga pasibuon ang akon panghunahuna. Bangod sang iya maayo nga halimbawa nangin mas mabinuligon ako karon sa iban. Indi ko gid mabayaran ang iya kaayo!”​—Shontay.

 Kon ano ang himuon mo. May pahanugot sang imo mga ginikanan, magpili sa inyo kongregasyon sang mas magulang sa imo agod makaupod sa ministeryo. (Binuhatan 16:1-3) Ang Biblia nagasiling: “Ang salsalon nagapatalum sang salsalon, sa amo ang tawo nagapatalum sang nawung sang iya abyan.” (Hulubaton 27:17) Madamo sing benepisyo ang pagpakig-upod sa mga eksperiensiado kag may edad na nga mga kauturan. “Makalilipay nga makaupod ang mga may edad na,” siling sang 19 anyos nga si Alexis.

Plano nga himuon. Magluwas sa imo mga ginikanan, isulat sa ubos ang ngalan sang mga kauturan sa inyo kongregasyon nga makabulig sa imo sa pagministeryo.

․․․․․

Hangkat #3: Pagtambong sa Cristianong mga Miting

Kon ngaa indi ini mahapos. Bilog nga adlaw kapoy ka na sa eskwelahan, daw makatalaka nga mamati pa sa isa ukon duha ka oras nga pamulongpulong sa Biblia.

Kon ngaa kinahanglan mo ini himuon. Ang Biblia nagalaygay sa mga Cristiano: “Kag hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa, kag labi na gid samtang nakita ninyo nga malapit na ang adlaw.”​—Hebreo 10:24, 25.

Komento sang imo mga katubotubo. “Importante gid ang paghanda sa mga miting sa kongregasyon. Kon kaisa kinahanglan mo piliton ang imo kaugalingon. Apang kon nakahanda ka, manamian ka gid magtambong sa mga miting kay nahibal-an mo kon ano ang ginatun-an kag makakomento ka pa.”​—Elda.

“Natalupangdan ko nga mas naapresyar ko ang pagtambong sa mga miting kon magkomento ako.”​—Jessica.

Kon ano ang himuon mo. Maghanda sing abanse, kag kon mahimo, magkomento ka. Makabulig ini nga mabatyagan mo nga bahin ka sang miting.

Sa pag-ilustrar: Sa banta mo diin ang mas masadya, ang paglantaw bala sang hampang sa telebisyon ukon ang paghampang mismo? Siempre mas masadya kon ikaw mismo ang nagahampang sangsa nagalantaw ka lang. Ngaa indi mo pagtamdon ang Cristianong mga miting kaangay sini?

Plano nga himuon. Isulat sa blangko nga bahin sa ubos ang tion nga makahinguyang ka sing bisan 30 minutos kada semana agod maghanda para sa miting sa kongregasyon.

․․․․․

Napamatud-an sang madamo nga pamatan-on nga matuod ang ginasiling sang Salmo 34:8: ‘Tilawi ninyo kag tan-awa nga si Jehova maayo.’ Kontento ka na bala nga mabatian lang nga may manamit nga pagkaon? Indi bala nga mas maayo pa gid kon tilawan mo ini? Amo man sini kon tuhoy sa aton pag-alagad sa Dios. Tilawi kag pamatud-i sa imo kaugalingon kon daw ano ka makalilipay ang pagpakigbahin sa Cristianong mga hilikuton. Ang Biblia nagasiling nga ang isa nga indi lamang manugpamati kundi manugtuman “mangin malipayon.”​—Santiago 1:25.

Ang dugang pa nga mga artikulo sa serye nga “Young People Ask” masapwan sa Web site nga www.watchtower.org/​ype

[Nota]

BINAGBINAGA INI

▪ Ngaa daw makatalaka para sa isa ka tin-edyer ang espirituwal nga mga hilikuton?

▪ Diin sa sining tatlo ka mga bahin sa pag-alagad nga ginbinagbinag sa sini nga artikulo ang luyag mo nga pauswagon, kag paano mo ini himuon?

[Retrato sa pahina 20, 21]

Kon luyag mo mangin mapagros sa pisikal, kinahanglan mo mag-ehersisyo. Kon luyag mo mangin mapagros sa espirituwal, kinahanglan mo tun-an ang Pulong sang Dios