Problemado nga Pag-asawahay

“Indi na gid ako makaagwanta!” Nabatian mo na bala ini sa mga mag-asawa? Kon minyo ka na, nakasiling ka man bala sini?

LINIBO sa karon ang nagpangasawa bangod nagasilabo ang ila balatyagon kag nagalaum sila nga mangin malipayon gid. “Apang kon magkadto na gani sila sa akon, madamo sa ila ang nangin desperado,” siling sang isa ka manuglaygay. “Napaslawan gid sila sa ila tiayon, sa pag-asawahay, sa gugma, kag kon kaisa sa kabuhi mismo.” Madamo sa mag-asawa karon ang nagaupdanay bangod lamang sa ila sertipiko sa kasal kag sa ila puluy-an.

Madamo sa mga pag-asawahay ang nabungkag tungod sa tuman kadamo nga kahuol kag kabalaka. Ang kasakuon sa trabaho, panggab-i nga obra, kag pag-overtime, nagapahago sa mag-asawa. Ang problema sa kuarta, hangkat sa pagpadaku sa mga kabataan, pagsaylo sing puluy-an, trabaho, kag problema sa panglawas mahimo nga amo ang mga rason kon ngaa nagatahaw ang pagtahod kag gugma sang mag-asawa. Buot silingon, ang mga pagbag-o sa kabuhi samtang nagaligad ang tion nagahatag sing kahuol sa mag-asawa nga mahimo bangdan sang pagbulagay.

Madamo nga iloy ang may duha ka obra​—ang iya trabaho kag ang iya obligasyon sa puluy-an. Busa, ang iya atension nasentro na lang sa iya trabaho kag sa mga kabataan. Bangod sa kakapoy kag kahuol halos wala na sing tion ang mag-asawa. Madamo ang nagabatyag nga daw wala na sila sing kontrol sa ila kabuhi kag nagaresulta ini sing kapaslawan kag pagbulagay. Ngaa madamo sing problema ang pag-asawahay? Paano ka makatukod sing malipayon kag madinalag-on nga pag-asawahay?