Ang Pagtamod sang Biblia

Dapat Bala Simbahon ang Dios Paagi sa mga Imahen?

“Gintudluan ako nga ang mga imahen magapasuod pa gid sa akon sa Dios.”​—Mack.

“Puno sing mga relihioso nga mga larawan kag mga santos ang amon balay. Abi namon, paagi sini mangin kalahamut-an sa Dios ang amon balay.”​—Herta.

“Nagaluhod kami sa pila ka imahen. Wala na kami nagapamensar kon ano ang batyagon sang Dios sa sini.”​—Sandra.

ANO ang reaksion mo sa ila ginsiling? Madamo ang nagapati nga mabuligan sila sang mga imahen sa pagsimba sa Dios. Husto bala sila? Labaw sa tanan, ano ang pagtamod sang Dios sa sini nga butang? Binagbinaga kon ano ang ginasiling sang iya nasulat nga Pulong, ang Balaan nga Biblia.

Ang Pagtamod sang Dios sa Ginasimba nga mga Imahen

Ang relihioso nga mga larawan kag mga idolo nagalaragway ukon nagasimbulo sa mga butang nga ginahatagan sing debosyon ukon ginasimba. Nagalakip ini sa mga krus, mga estatwa, mga retrato, ukon sa bisan ano nga kaanggid sang mga butang nga yara sa langit ukon sa duta. * Ang mga bandera mahimo man malakip sa mga butang nga ginasimba.

Ang paggamit sini nga mga butang sa pagsimba nagsugod linibo na ka tuig ang nagligad. Amo nga sang 1513 B.C.E., sang ginhatag sa bag-o lang natukod nga pungsod sang Israel ang Napulo ka Sugo, maathag nga ginhambal sang Dios ang iya pagtamod sa ginasimba nga mga imahen. Nagsiling sia: “Dili ka maghimo nga sa imo sing larawan nga tinigban, ukon bisan ano nga kaangay sang bisan anong butang nga yara sa langit sa ibabaw, ukon yara sa duta sa idalum, ukon yara sa tubig sa idalum sang duta; dili ka magyaub sa ila ukon mag-alagad sa ila; kay Ako ang GINOO nga imo Dios maimon nga Dios, [ukon “Dios nga nagapatuman sang eksklusibo nga debosyon,” NW].”​—Exodo 20:4, 5.

Talupangda ang duha ka butang nga gindumili sang Dios: Una, indi dapat maghimo ang iya katawhan sing mga larawan ukon mga imahen para simbahon. Ikaduha, indi sila “magyaub” ukon mag-alagad sa ila. Ngaa gindilian sang aton Manunuga ang paghimo sing mga imahen? Ang isa ka rason amo nga “wala gid sing tawo nga nakakita sa Dios sa bisan  ano nga tion.” Indi pisikal ang lawas ni Jehova kundi espiritu, kag nagakabuhi sia sa duog sang mga espiritu. (Juan 1:18; 4:24) Ang isa pa ka rason kon ngaa indi dapat maghimo sing bisan ano nga imahen amo nga ang Dios “nagapatuman sang eksklusibo nga debosyon.” “Indi ko pag-ihatag sa iban ang akon himaya, ukon ang akon pagdayaw sa mga larawan nga tinigban,” siling niya. (Isaias 42:8) Bangod sini, sayop gid ang paghimo sing imahen agod mangin bulig sa pagsimba. Sang naghimo sing larawan ang Israelinhon nga lider nga si Aaron, naakig gid si Jehova.​—Exodo 32:4-10.

Ngaa Indi Magyaub sa Ila?

Tuhoy sa mga idolo, ang Biblia nagasiling: “May mga baba sila, apang wala nagahambal; may mga mata sila, apang indi makakita. May mga dulunggan sila, apang indi makabati.” Nian nagdugang ini sa sining paandam: “Ang mga nagahimo sa ila manginkaangay sa ila,” nga wala sing kabuhi!​—Salmo 115:4-8.

Isa man ka buhat sang inhustisya ang pagsimba sa mga idolo. Pamangkuta ang imo kaugalingon, ‘Ano ang batyagon ko kon hatagan ko sing malahalon nga regalo ang akon bata, nian malakat sia kag magpasalamat sa isa ka estranghero ukon sa wala sing kabuhi nga butang?’ Makabulig ini sa imo nga mahangpan kon ano ang batyagon sang aton Manunuga kag Taghatag-Kabuhi kon ihatag naton sa iban​—lakip sa wala sing kabuhi nga mga idolo—​ang pagpadungog kag pagsimba nga para kuntani sa iya.​—Bugna 4:11.

Hunahunaa man kon daw ano ini ka makahuluya para sa isa ka tawo. Ginhimo ang tawo sa larawan sang Dios. Gani, nagakaigo bala nga magsimba sia sa wala sing kabuhi nga butang? (Genesis 1:27) Tuhoy sa pila nga nagahimo sini, si manalagna Isaias nagsulat: “Ginasimba nila ang binuhatan sang ila kaugalingon nga mga kamut, nga ginhimo sang ila kaugalingon nga mga tudlo. Gani ang kubus nga tawo ginapayaub, kag ang dakung tawo ginapapaubus​—busa dili sila pagpatawara!”​—Isaias 2:8, 9.

Naakig pa gid ang Dios sa butig nga pagsimba kay ang matuod, ang ila ginasimba amo ang mga demonyo​—ang mga kaaway sang Dios. Sang gintalikdan sang mga Israelinhon si Jehova nga Dios kag nagsimba sa mga idolo, “naghalad sila sa mga yawa nga indi mga dios,” siling sang Deuteronomio 32:17.

Ginasimba bala sang una sang mga sumulunod ni Jesucristo ang mga imahen ukon gingamit ini nga bulig sa pagsimba? Wala! Si Juan nga apostol ni Jesus nagsulat: “Mga anak, magbantay kamo batok sa mga idolo.” (1 Juan 5:21) Ang libro nga Early Church History to the Death of Constantine nagsiling: “Wala na sing mas makangilil-ad pa para sa mga disipulo sang una sangsa pagsimba sa mga imahen.”

Ang Husto nga Pagsimba

Nagsiling si Jesus: “Ang matuod nga mga sumilimba magasimba sa Amay sa espiritu kag kamatuoran, kay sa pagkamatuod amo sini ang ginapangita sang Amay nga magsimba sa iya.” (Juan 4:23) Huo, luyag sang Dios nga makilala naton sia subong persona​—mahibaluan ang iya mga naluyagan, mga wala naluyagan, mga talaksan, kag katuyuan para sa aton. (Juan 17:3) Sa katunayan, amo ini ang rason kon ngaa ginpasulat niya ang Biblia. (2 Timoteo 3:16) Subong man, bangod ang Dios ‘indi malayo sa tagsa sa aton,’ makapangamuyo kita sa iya bisan ano nga tion, kag bisan diin kita nga wala ang bulig sang mga imahen.​—Binuhatan 17:27.

“Sang nagsulod ako sa Kingdom Hall sang mga Saksi ni Jehova, wala gid ako sing nakita nga mga imahen,” siling ni Sandra, nga ginkutlo kaina. “Paagi sa Biblia, ginpakita sa akon sang mga Saksi ang mga kinaiya kag mga ginapatuman sang Dios. Gani, natun-an ko ang pagpangamuyo nga ginapamatian sang Dios. Nagabatyag ako karon nga sibu ang akon paghangop tuhoy sa Manunuga kag may suod ako nga kaangtanan sa iya.” Natun-an ni Sandra kon daw ano ka makapaumpaw kag makapahilway ang mga kamatuoran sa Biblia. (Juan 8:32) Mahimo mo man ini maeksperiensiahan.

[Nota]

NAPALIGBAN MO NA BALA?

▪ Ngaa dapat gid naton likawan ang pagsimba sa tanan nga sahi sang imahen?​—Salmo 115:4-8; 1 Juan 5:21.

▪ Paano simbahon ang matuod nga Dios?​—Juan 4:24.

▪ Paano mo matun-an ang kamatuoran tuhoy sa Dios, kag paano ka makabenepisyo sa sini?​—Juan 8:32; 17:3.