Ang Pagtamod sang Biblia

Ano Gid Bala ang Dios?

“ANG Dios Espiritu, kag ang mga nagasimba sa iya dapat magsimba sa espiritu kag kamatuoran,” siling sang Biblia. Ginapakita sini nga teksto kon ano gid ang Dios​—isa sia ka espiritu! (Juan 4:19-24) Apang, ginalaragway sia sa Biblia subong isa ka persona ukon indibiduwal. Ang iya ngalan amo si Jehova.​—Salmo 83:18, NW.

May pila ka nagabasa sa Biblia nga nagapalibog kon ano gid ang Dios. Ang Dios espiritu kag indi makita, apang ngaa nagasiling ang Biblia nga may yara sia mata, dulunggan, ilong, tagipusuon, kamot, butkon, tudlo, kag tiil? * Mahimo hunahunaon sang iban nga ang Dios may lawas kaangay sang tawo bangod ang Biblia nagasiling nga gintuga ang tawo sa dagway sang Dios. Kon usisaon naton ang Biblia, maathagan kita kon ano gid ang Dios.​—Genesis 1:26.

Ngaa Ginlaragway ang Dios Kaangay sa Tawo?

Agod mahangpan naton kon ano gid ang Dios, ginlaragway sang mga manunulat sang Biblia, paagi sa bulig sang balaan nga espiritu ang Labing Gamhanan kaangay sa tawo. Gintawag ini sang mga iskolar nga anthropomorphic, buot silingon “paglaragway nga daw subong sang tawo ukon may kinaiya nga kaangay sang tawo.” Mabudlay gid ilaragway ang matuod nga Dios nga si Jehova sa paagi nga maintiendihan sang tawo. Gani, paagi sini mabuligan sila nga mahangpan kon ano gid ang Dios. Apang, ini nga mga termino indi dapat pagtamdon sing literal subong nga wala man naton ginatamod sing literal ang ginasiling sang Biblia nga ang Dios “Igang,” “adlaw,” kag “taming.”​—Deuteronomio 32:4; Salmo 84:11.

Sing kaanggid, nagsiling ang Biblia nga ang tawo gintuga sa dagway sang Dios agod ipakita ang ideya nga ang himpit nga mga kinaiya ni Jehova ginapakita sang tawo sa limitado lamang nga paagi. Maathag nga indi sini buot silingon nga ang mga tawo mga espiritu man ukon nga ang Dios may lawas kaangay sang tawo.

Lalaki Bala Sia Ukon Babayi?

Subong nga ang paglaragway sa Dios kaangay sa tawo indi dapat pagtamdon sing literal, ang pagpatuhoy sa Dios nga lalaki indi man dapat  pagtamdon sing literal. Napatuhoy lamang ang lalaki kag babayi sa pisikal nga mga tinuga sang Dios. Ginapakita sini nga may limitasyon ang lenguahe sang tawo kag indi sini masarangan ilaragway kon ano gid ang Labing Gamhanan nga Dios nga si Jehova.

Ang paggamit sang Biblia sing tinaga nga “Amay” nagapahangop nga mahimo mapaanggid ang aton Manunuga sa mahigugmaon, maamligon kag maatipanon nga tawhanon nga amay. (Mateo 6:9) Indi buot silingon nga tamdon man naton ang Dios, ukon ang iban pa nga espiritu nga tinuga sa langit nga mga lalaki ukon babayi. Wala sing lalaki ukon babayi sa ila. Sing makawiwili, ginapakita sang Biblia nga kon himayaon na subong espiritu nga mga anak sang Dios ang mga gintawag nga mangin kaupod ni Cristo sa iya langitnon nga Ginharian, wala sing lalaki ukon babayi sa ila. Si apostol Pablo nagsiling man nga kon himayaon na sila subong espiritu nga mga anak sang Dios “wala sing lalaki ukon babayi” sa ila. Ginpatuhuyan man sila sing malaragwayon subong “ang nobya” sang Kordero nga si Jesucristo. Ini tanan nagapakita nga ang pagpaanggid sang Dios, sang iya bugtong nga Anak nga si Jesus, kag sang iban pa nga espiritu nga tinuga sa mga tawo indi dapat paghangpon sing literal.​—Galacia 3:26, 28; Bugna 21:9; 1 Juan 3:1, 2.

Ginpatuhuyan sang mga manunulat sang Biblia ang Dios nga lalaki bangod sang iya katungdanan. Nakita sining manunulat nga ang lalaki nga nagahimo sang iya katungdanan subong isa ka amay nagapakita sing kaanggid nga gugma kag kabalaka ni Jehova sa iya dutan-on nga mga anak.​—Malaquias 3:17; Mateo 5:45; Lucas 11:11-13.

Ang Nagapangibabaw nga Kinaiya sang Dios

Bisan pa espiritu ang supremo nga Soberano, indi sia malayo sa aton, indi misteryoso, kag mahapos sia palapitan. Gani, ang sinsero nga indibiduwal napahulag nga kilalahon kag apresyahon ang iya gugma, gahom, kaalam kag katarungan. Ini nga mga kinaiya maathag nga makita sa iya mga tinuga kag nagapakita kon ano gid sia nga sahi sang persona.​—Roma 1:19-21.

Apang, makilala naton kon ano gid ang Dios paagi sa iya nagapangibabaw nga kinaiya nga amo ang gugma. Talalupangdon gid ang iya gugma kay ang Biblia nagasiling nga ang Dios gugma. (1 Juan 4:8) Bangod sini nga kinaiya, nangin maluluy-on sia, mapinatawaron, kag mapinasensiahon. (Exodo 34:6; Salmo 103:8-14; Isaias 55:7; Roma 5:8) Gani ginaagda kita ni Jehova, ang Dios sang gugma, nga magpalapit sa iya.​—Juan 4:23.

[Nota]

NAPALIGBAN MO NA BALA?

▪ Ano ang ngalan sang Dios?​—Salmo 83:18, NW.

▪ Paano naton mahantop ang mga kinaiya sang Dios?​—Roma 1:19-21.

▪ Ano ang nagapangibabaw nga kinaiya sang Dios?​—1 Juan 4:8.