Ngaa Mabudlay Magmadinalag-on?

Bantog sia kaayo nga manug-amba sa edad nga mga 20 anyos kag manggaranon gid katama. Ilisipon lamang ang nangin bantog kag manggaranon sa amo sini nga pangidaron. Apang hinali lang nga nagbaliskad ang iya kahimtangan. Pagkatapos mapaslawan ang duha ka beses nga pagpamana, ginpabulong sia bangod nangin palahubog sia kag adik. Kag nangin problemado na ang iya kabuhi.

MAKAPASUBO nga madamo sa karon ang may kaanggid nga kahimtangan sa sining lamharon nga babayi. Pirme lang ginabalita ang problemado nga kabuhi sang mga artista. Bisan gani ang mga negosyante nga daw madinalag-on tulukon problemado man ang kabuhi. Tuhoy sa mga madinalag-on nga negosyante sa New York City, ang isa ka pamantalaan nagreport: “[Ang] pagtinguha nga makaganansia sing daku nagaguba sang trabaho, pamilya, kag nagaresulta sa pagdamo sang mga adik . . . Ang mga nagaobra sa bangko sa Wall Street nagabatyag sing kalig-unan bangod sa mga bonus, apang ang iban naluyahan sing buot bangod bisan nagabakabaka sila, nagakapaslawan gihapon ang ila panikasog kag nagakaapektuhan ang ila normal nga mga hilikuton.”

Ini bala nga mga problema nagautwas bangod gintinguhaan sang mga tawo nga magmadinalag-on sa sayop nga paagi? Matuod nga kinahanglan naton ang kuarta agod mabuhi. Apang ang kadalag-an bala sa kabuhi nagadepende sa pagtigayon sing manggad? Indi amo sini ang ginapakita sang mga pagtuon. Halimbawa, ginapakita sang pagtuon sa China nga sang nagsaka sing 250 porsiento ang aberids nga kita sang tawo, nangin indi na gid malipayon ang mga tawo sa ila kabuhi.

Gani, ang matuod nga kadalag-an wala nagadepende sa sekular nga karera, malahalon nga balay, salakyan, ukon relo. Indi bala nga makatarunganon lamang hunahunaon nga ang talaksan sang kadalag-an amo ang bug-os nga pagkatawo sang isa, lakip na ang iya prinsipio kag tulumuron sa kabuhi? Halimbawa, ang isa ka tawo mahimo nga maalam kag impluwensiado, apang imoral ang iya pagkabuhi, wala sing may nagapalangga sa iya, kag wala sia sing matuod nga mga abyan. Ang isa naman mahimo nga bantog kag manggaranon, apang mahimo sia mamangkot, ‘Ano ang pulos sang tanan ko nga pinangabudlayan? Ano ang katuyuan sang akon kabuhi?’

Kon amo, ginapahangop sini nga ang matuod nga madinalag-on nagasentro sang ila kabuhi sa mas importante nga mga butang, lakip ang pagkabuhi suno sa matarong nga mga prinsipio. Gani, natigayon nila ang kalinong, pagtahod sa kaugalingon, kag pagtahod sang iban. May katuyuan man sila sa kabuhi nga indi lamang para sa ila kaugalingon kag nagahatag ini sa ila sing kalipay. ‘Ano ini nga mga prinsipio kag ano ini nga katuyuan?’ ang iban mahimo mamangkot. Masapwan bala ang sabat sa sini nga mga pamangkot sa aton kaugalingon lamang, ukon kinahanglan pa naton ini pangitaon? Ang masunod nga mga artikulo magabinagbinag tuhoy sini.

[Kahon sa pahina 3]

ANG SAYOP NGA PAGTAMOD SA KADALAG-AN

Suno sa pagpanalawsaw, nagadamo pa gid ang pamatan-on nga mga atleta nga nagatomar sing nagapabaskog nga bulong agod magdaug sa mga kompetisyon. Ang Education Update sa Internet nagreport: “Sang ginpamangkot ang mga estudyante sa kolehiyo: ‘Halimbawa, nakahibalo ka nga kon magtomar ka sing steroids magadaug ka ukon makaentra sa isa ka team sang hampang, apang sa sulod sang lima ka tuig magamasakit ka, matomar ka pa bala?,’ halos tanan nagsabat sing huo. Sang ginbag-o ang pamangkot sa ‘kon nakahibalo ka nga mahimo ka mapatay sa sulod sining lima ka tuig,’ 65 porsiento ang nagsabat gihapon nga huo.”