Sa Diin Kita Makasapo sing Masaligan nga Panuytoy?

SIN-O ang makatuytoy sa aton padulong sa matuod nga kadalag-an​—indi kadalag-an sa kalibutan kundi kadalag-an subong isa ka tawo? Subong sa ginsambit sa nauna nga artikulo, ang tawo ginakabig nga madinalag-on kon may matarong sia nga mga prinsipio sa paggawi kag may husto nga katuyuan sa kabuhi​—indi ang kabantugan, kamanggaran, kag impluwensia.

Diin kita makasapo sing masaligan nga mga prinsipio kag mga sabat sa mga pamangkot tuhoy sa katuyuan sang kabuhi? Sa aton lamang bala kaugalingon? Batunon naton nga bangod indi kita perpekto masami kita madala sang sayop nga handum, amo nga makahimo kita sing indi maalamon nga mga desisyon. (Genesis 8:21) Gani, minilyon ang padayon nga nagatinguha sa ginalaragway sang Biblia nga ‘kailigbon sang unod kag kailigbon sang mga mata kag pagpadayawdayaw sang palangabuhian sang isa.’ (1 Juan 2:16) Indi amo sini ang makahatag sing matuod nga kadalag-an, kundi nagaresulta lamang ini sing kapaslawan kag kasubo. Amo kon ngaa madamo ang nagapangayo sing panuytoy sa aton Manunuga agod masabat ang mas komplikado nga mga pamangkot sa kabuhi. *

Dapat Bala Kita Mangayo sing Panuytoy sa Dios?

Ngaa mas nagakaigo nga sa aton Manunuga kita mangayo sing panuytoy? Bangod nahibaluan niya kon ngaa gintuga niya kita, gani nakahibalo sia kon ano dapat ang katuyuan sang aton kabuhi. Nakahibalo man sia kon paano niya kita gintuga sa pisikal, mental, kag emosyonal. Gani, nahibaluan sang Dios ang pinakamaayo nga prinsipio nga dapat sundon sang mga tawo. Dugang pa, ang Dios amo ang pinakamaayo nga halimbawa sa pagpakita sing gugma, gani luyag gid niya nga mangin malipayon kag madinalag-on kita. (1 Juan 4:8) Diin naton masapwan ang iya mahigugmaon nga panuytoy? Sa Balaan nga Biblia, nga gin-aman sang Dios sa aton paagi sa mga 40 ka tawhanon nga manunulat ukon sekretaryo. * (2 Timoteo 3:16, 17) Apang, ngaa makasalig kita sa panuytoy sini nga libro?

“Ang kaalam ginapamatud-an nga matarong paagi sa mga buhat sini,” ukon mga resulta, siling ni Jesucristo, ang panguna nga representante sang Dios. (Mateo 11:19; Juan 7:29) Ang kaalam pasad sa prinsipio sang Dios magatuytoy sa aton nga mangin madinalag-on kag malipayon​—“ang tagsa ka maayo [naton] nga banas.” Apang, ang tawhanon nga kaalam nga nagasikway sa Dios nagaresulta sa kapaslawan kag kasubo.​—Hulubaton 2:8, 9; Jeremias 8:9.

Binagbinaga ang mga hippie ukon mga rebelyuso nga mga pamatan-on sang mga katuigan 1960. Ginsikway nila ang talaksan kag kasuguan sang mga mas nauna nga henerasyon, kag madamo sa mga hippie  ang nagpasanyog sang paggamit sing droga, mga pilosopiya nga wala nagahunahuna sa palaabuton, kag pagpakigsekso sa kay bisan sin-o. Apang, maalamon bala ini nga pagkabuhi? Nakahatag bala ini sing matuod nga katuyuan sa kabuhi kag talaksan sa maayo nga paggawi nga nagaresulta sa kalinong kag dayon nga kalipay? Ginapakita sang kasaysayan nga wala ini sing may nahatag nga kaayuhan sa mga tawo kundi nangin kabangdanan pa gani sang padayon nga pagnubo sang moral sa katilingban.​—2 Timoteo 3:1-5.

Kabaliskaran sa pilosopiya sang tawo, napamatud-an nga pirme mapuslanon ang kaalam nga naghalin sa Biblia. (Isaias 40:8) Samtang ginabasa mo ang masunod nga artikulo, makita mo kon ngaa mapuslanon ini. Ginabinagbinag sini ang anom ka prinsipio sa Biblia nga nakabulig sa minilyon ka tawo sa halos tanan nga pungsod nga mangin matuod nga malipayon kag madinalag-on bisan ano man ang ila pangabuhi ukon kahimtangan.

[Mga nota]

[Kahon sa pahina 5]

MGA PAGPATI NGA NAGASABLAG SA KADALAG-AN

Madamo ang nagapangangkon nga wala sing Dios kag ang kabuhi resulta lamang sang ebolusyon. Kon matuod ini, buot silingon ang kabuhi natabuan lamang, kag ang pagpangita sing katuyuan sa kabuhi kag pagsunod sa mga prinsipio nga ginasunod sang tanan, mangin walay pulos.

Ang iban naman nagapati nga gintuga kita sang Dios kag dayon ginpabay-an. Ginapakita sini nga daw nangin mga ilo kita, nga bisan nagahandum kita nga magmadinalag-on sa kabuhi, indi naton ini maangkon kay wala kita sing matuod nga katuyuan kag talaksan. Apang binagbinaga ini: Ginhatagan sang Dios ang tanan nga sahi sang sapat sing duna nga kaalam agod matuman nila ang ila katuyuan sa palibot. Subong resulta, ang iya walay tupong nga kaalam napadayag paagi sa iya mga tinuga. Kon amo, ina bala nga Manunuga nagtuga lang sa aton dayon ginpabay-an nga mangapkap sa dulom? Indi gid!​—Roma 1:19, 20.

Ginapakanubo sang mga pilosopiya sang ateista ang balor mismo sang kadalag-an bangod ginahimo sini nga walay pulos ang pagpangita sing katuyuan sa kabuhi kag mga prinsipio nga dapat sundon.

[Retrato sa pahina 5]

Masaligan gid ang kaalam nga napasad sa Biblia bangod may maayo ini nga mga resulta