Ang Akon Pink nga Libro

Panugiron ni Cynthia Newell

SANG siete anyos ako, ang isa ka bata nga babayi nagtanyag sa akon sing gamay nga libro nga Pagpamati sa Daku nga Manunudlu. Pink ang kolor sini. Natabo ini sa amon school bus sa Shreveport, Louisiana, U.S.A. Nagsiling sia nga $0.50 lang ini. Gani ginpaupod ko sia sa balay kag ginbayaran sing sensilyuhon.

Nanamian gid ako sa sina nga libro. Wala madugay pagkatapos sini, nagmasakit ako kag naospital. Agod magmaayo ang pamatyag ko, ginabasahan ako sang akon pamilya sang akon paborito nga libro. Sang nagdaku na ako, talagsa ko lang ini mabasa bangod para ini sa mga kabataan. Gintudluan ako sini nga libro sing importante nga mga leksion, apang kinahanglan ko ang mas madalom nga ihibalo. Nagsimba ako sa nagkalainlain nga relihion kada semana sa pagpangita sing mga sabat sang Biblia sa akon mga pamangkot. Apang wala ko gid ini makita.

Sang hayskul ako, halos indi na ako interesado sa relihion, apang luyag ko gihapon makahibalo sa Biblia, amo nga ginabasa ko ini sing regular. Isa ka adlaw, nakita ko nga wala nagapanumpa sa bandera ang isa ko ka klasmeyt. Ginpamangkot ko sia kon ngaa, kag nagsiling sia, “Nasumpa ko na ang akon katutom kay Jehova, gani paano ko ini mahatag sa iban?” Husto gid sia! ‘Apang sin-o si Jehova?’ Nagpalibog gid ako.

Nasabat sang akon klasmeyt ang tanan ko nga pamangkot gamit ang Biblia. Nagpalibog ako: ‘Paano niya ini tanan nahibaluan? Pareho man lang kami edad; pero ngaa daw bal-an niya ang tanan parte sa Biblia!’ Ginpaathag niya sa akon, “Natun-an ko ang Biblia sa Kingdom Hall.” Nagpasugot ako gilayon sa iya pangagda nga magtambong sa ila miting pagka-Domingo. Nakadtuan ko na ang tanan nga simbahan pero ngaa daw wala pa ako ka sulod sa Kingdom Hall sang mga Saksi ni Jehova. Sa sina mismo nga Domingo, kumbinsido gid ako nga nakita ko na ang lugar sa diin ginatudlo ang kamatuoran sa Biblia.

Pagkatapos sang miting, nagkadto ako sa counter sang mga literatura, kag didto nakita ko ang akon pink nga libro! Napulo na ka tuig ang nagligad sang nabaton ko ini nga libro halin sa isa ka bata sa bus, gani nalipatan ko na kon sin-o ang naghatag sini sa akon. Apang nadumduman ko na karon, sia si Nancy, ang babayi nga nag-imbitar sa akon nga magtambong sa sini nga miting!

Sugod sadto, nagtuon na ako sa Biblia kada semana kag madasig nga nag-uswag. Madamo ako sing natun-an sa akon pink nga libro, amo nga nahangpan ko dayon ang akon ginatun-an sa Biblia. Gindedikar ko sang ulihi ang akon kabuhi kay Jehova kag nabawtismuhan sang 1985 sa edad nga 18. Si  Nancy naman nagsaylo sa Florida kag wala na kami nakakontakanay.

Pagligad sang pila ka tuig, namana ako. Sang 1991 ako kag ang akon bana nga si Drew nagpayunir, nga amo ang tawag sa mga nagaalagad sing bug-os tion, sa diutay nga banwa sa sidlangan sang Texas. Apang ano na ang natabo kay Nancy? Wala na ko kabalo. Nian, isa ka gab-i samtang ginabasa ko ang Disiembre 1, 1992 nga Ang Lalantawan, nagsinggit ako: “Si Nancy! Si Nancy!” Isa sia sa mga naggradwar sa Gilead. Gin-asayn sila sang iya bana nga si Nick Simonelli sa Ecuador, South America.

Sang 2006, nag-aplay kami sang akon bana subong mga boluntaryo sa mga pagpanukod sing mga pasilidad sang mga Saksi ni Jehova sa iban nga pungsod. Nalipay gid kami sang mahibaluan namon nga ang una namon nga asaynment amo ang pagpasangkad sang sanga talatapan sa Ecuador! Sa una namon nga adlaw sa Ecuador, ginsugata kami ni Nancy kag naghaksanay kami! Natabuan man nga nagbisita sia sa sanga talatapan sadto nga adlaw. Pagkaligad sang 32 ka tuig halin sang nabaton ko ang akon pink nga libro, nagkitaay kami liwat! Nagapasalamat gid ako kay Jehova bangod sa sina nga libro kag sa gamay nga bata nga nagtanyag sini sa akon!

[Kahon/​Mga retrato sa pahina 23]

DAKU GID ANG EPEKTO SINI SA KABUHI SANG MINILYON

Sang 2003, mga 32 na ka tuig ang nagligad sang gin-imprinta ang Pagpamati sa Daku nga Manunudlu, gin-imprinta naman ang bag-o nga edisyon sini. Gintig-uluhan ini nga Magtuon Gikan sa Daku nga Manunudlo. Sa karon, sobra na sa 65 milyones ka kopya sini nga libro tuhoy sa mga panudlo ni Jesus ang gin-imprinta sa kapin sa 100 ka lenguahe. Mahimo ka man makakuha sang libro nga Magtuon Gikan sa Daku nga Manunudlo sa isa sa mga Saksi ni Jehova sa inyo lugar.

[Mga retrato sa pahina 23]

Sa duha ka kilid: Sang bata pa kami

Cynthia

Nancy

Sa likod: Sanga talatapan sa Ecuador, pagligad sang pila ka tuig.