Halin sa Amon mga Bumalasa

Dumaan nga mga Manuskrito​—Paano ini Ginapetsahan? (Pebrero 2008) Dismayado gid ako sa sini nga artikulo. Suno sa akon nahangpan, ang C.E. nagakahulugan sing “Common Era” kag ang B.C.E. naman “Before the Common Era.” Sa 70 anyos ko nga pagkabuhi, ang B.C. kag A.D. amo ang ginagamit nga basihan sang tion antes kag pagkatapos sang pagbata kay Jesus. Para sa akon ang paggamit sing B.C.E. ukon C.E. daw nagapanghiwala nga natawo si Jesus.

R. W., Estados Unidos

Sabat sang “Magmata!”: Bisan pa ginagamit sa mga pungsod nga madamo sing nagapangangkon nga Cristiano ang A.D. (Anno Domini, nga nagakahulugan sing “sa adlaw sang aton Ginuo”) kag ang B.C. (before Christ ukon antes ni Cristo), ginagamit namon ang termino nga C.E. (Common Era) kag B.C.E. (Before the Common Era). Ngaa? Una, madamo sing pamatuod nga natawo si Jesus sang tuig 2 B.C.E. Ikaduha, ang ginaimprinta nga literatura sang mga Saksi ni Jehova ginabasa man sang mga tawo nga indi mga Cristiano. Ikatlo, ang titulo nga “Cristo” nagakahulugan sing “Hinaplas.” Nangin Mesias ukon Cristo si Jesus sang ginhaplasan sia sang espiritu sang Dios, kag natabo ini sang ginbawtismuhan sia sang 29 C.E. (Mateo 3:13-17) Gani, sang ginbun-ag si Jesus indi pa sia Cristo, nangin Cristo lamang sia sa tuig nga nabawtismuhan na sia. Talalupangdon man nga nagadamo ang nagagamit sing termino nga C.E. kag B.C.E. sa moderno nga mga diksionaryo kag sa madamo nga sinulatan sang mga iskolar. Nagapati gid ang mga Saksi ni Jehova nga importante katama si Jesus kag ang iya halad sa pagtuman sa mga katuyuan sang Dios kag sa aton mismo personal nga kaluwasan.

Pamangkot sang mga Pamatan-on . . . Paano Ko Malandas ang Kabudlayan Kon Indi Maayo ang Akon Panglawas? (Pebrero 2008) Tayming gid nga nabasa ko ini nga artikulo! Nagmasakit ako kag naospital sing tatlo ka semana. Bag-o lang gid ako nakagua sa ospital sang nabaton ko ini nga magasin. Nahibaluan ko gid ang ginabatyag sang mga pamatan-on nga ginsambit sa artikulo. Salamat sa ginhatag ninyo nga mga halimbawa kag mga laygay.

K. P., Canada

Natandog ako sang kamatuoran nga nagahatag si Jehova sing lugpay bisan pa sa mga may diperensia pareho ko. Bata pa ako sang nahibaluan nga may cerebral palsy ako. Bisan pa indi ako makalakat, nagaauxiliary payunir ako. Nagalaum gid ako sa pag-abot sang tion, sa palaabuton nga Paraiso sa duta, nga ang mga may diperensia “magalumpat subong sang usa.”​—Isaias 35:5, 6.

J. J., Republic of Korea

Ginasulitsulit ko gid basa ini nga artikulo. Nagatulo gid ang akon luha bangod sa gugma ni Jehova. Daw subong bala nga ginaputos niya kita sing habol agod indi gid kita mahalitan. Madamo gid nga salamat.

M. T., Japan

Kamatayon​—Amo Gid Bala Ini ang Katapusan? (Desiembre 2007) Pila pa lamang ka bulan ang nagligad sang napatay si Nanay, gani natandog gid ako sa paathag sini, ilabi na ang parte sa saad nga pagkabanhaw. Salamat gid. Nalugpayan gid ako kag napalig-on.

M. R., Madagascar