Pagbantay sa Kalibutan

▪Sa sulod sang 35 ka tuig sugod sang 1970 asta 2005, halos maubos na ang 25 porsiento nga mga sapat kaangay sang isda, mga amphibian, mga reptilya, pispis, kag mga mamalya.—SÜDDEUTSCHE ZEITUNG, GERMANY.

▪ Agod nga makabawi sa 2.2 milyon porsiento nga pagkapierde, ginpanubuan sang bangko sa Zimbabwe ang balor sang ila kuarta sang Agosto 2008. Ang $10-bilyones ginabayluhan lang sang isa ka “zimdollar.”​—AGENCE FRANCE PRESSE, ZIMBABWE.

▪ Ginreport sa Estados Unidos sang 2005 nga sobra sa 12,000 ang natiruhan kag napatay. Pero ang natiruhan nga wala mapatay mas madamo, mga 53,000 ang ginbulong sa mga ospital sang 2006.”​—THE SEATTLE TIMES, U.S.A.

“Kinasadya” Kon Krismas?

Mga 20 porsiento sang mga kaso sa Australia parte sa diborsio ang ginsugdan pagkatapos gid mismo sang Krismas kag Bag-ong Tuig, siling sang Sunday Telegraph sa Sydney. “Madamo kami sing makita nga nagainaway ukon nagabulagay kag nagakadto sa amon sa pagbukas sang amon mga opisina,” siling sang isa ka abogado nga si Barry Frakes. “Abi sang mga tawo nga manami gid ang Krismas kaangay sang ila makita sa mga palaguaon sa TV kag sa mga pasayod.” Kon indi gani ‘mangin pareho sini ang ila kabuhi,’ nagdugang sia nga luyag nila nga magdiborsio. Pero suno kay Angela Conway, humalambal sang Australian Family Association, nga “indi pirme masolbar sang diborsio ang mabudlay nga mga problema ukon makahatag sing kalinong kag kalipay nga amo ang ginahunahuna sang mga tawo.” Nagsiling sia: “Mas maayo nga mag-unong sa imo asawa ukon bana kag tinguhaan nga solbaron ang problema.”

Ang “mga Balay nga Balataan” Nagaluwas sing Kabuhi

Nagapanikasog gid ang mga taga-Peru agod mabuhinan ang nagakapatay bangod sa pagbata. Agod palig-unon ang mga Andean nga babayi nga magpabulig sa propesyonal nga mga manugpabata sa klinika imbes nga sa balay, sang nagligad nga dekada, 390 ka “balay nga balataan” ang ginpatindog sa Peru. Mahimo nga makatener ang nagabusong kag ang iya pamilya sa isa sa sini nga balay nga malapit sa klinika asta nga makabata sia. Ang isa sa makagalanyat sa sini nga klinika, siling sang report sang Reuters sa Cuzco, amo nga gin-upod nila ang “moderno nga medisina kag ang dinumaan nga pamaagi,” subong sang “pagbata nga nagatindog,” nga “makapadali sa pagbata . . . kag magatugot sa nanay nga makita sing maayo ang iya pagbata sangsa nagahigda sia.”

Pirme Lang Nagakaatrasar

Suno sa 2008 nga report sang U.S. Department of Transportation, mga 30 porsiento sang iskedyul sang eroplano sa Estados Unidos ang sobra sa 15 minutos nga nagakaatrasar. Ang pinakamalala sini amo ang eroplano halin sa Texas pa California, nga pirme gid atrasado sa iskedyul.