Ang Harpy nga Agila Mananagit sa Kagulangan

SUNO SA MANUNULAT SANG MAGMATA! SA ECUADOR

▪ Sang nakita sang mga tawo nga una nga nakakadto sa Bagatnan nga Amerika ining daku nga agila, nakibot gid sila. Nahadlok gid sila sa sini amo nga ginngalanan nila ini pareho sa ngalan sang gadya nga katunga pispis kag katunga babayi sa Griego nga mitolohiya—ang harpy.

Tubtob subong, madamo gihapon ang nagakatingala sa hitsura sang harpy nga agila. Ini nga pispis nga makita sa kagulangan sang Sentral kag Bagatnan nga Amerika amo ang pinakadaku kag pinakakusog nga pispis sa kalibutan. Nagataas ini sing 91 sentimetros kag 2 metros ang kalaparon sang iya pakpak. Ang mga munga mas daku sangsa mga sulog, nga nagabug-at sing mga 9 kilos.

Ang mga kuko sang harpy nga agila nagalaba tubtob 13 sentimetros kag doble ang kalabaon sini sa kuko sang American-eagle. Suno sa National Geographic Today, makusog gid ang kuko sang harpy nga agila amo nga sarang sini madugmok “ang tul-an sang sapat nga sloth, amu, kag iban pa nga sapat nga iya ginadagit sa kagulangan, kag nagakapatay dayon ang iya biktima.” Apang, bisan pa daku katama ining harpy nga agila kag makusog, indi mabatian ang paglupad sini kag indi mo gani mabatyagan nga naglabay na ini sa ibabaw mo.

Madali Na Lang Mapapas

Ang mga tawo indi dapat mahadlok sa harpy nga agila kundi ang harpy nga agila amo dapat ang mahadlok sa mga tawo. Bangod sa ilegal nga pagpangayam kag pagguba sa mga kagulangan, ini nga mga pispis amat-amat na nga nagakapapas kag malaka na lang makita sa lasang. Agod masalbar ang harpy nga agila, ginhimo ini sang Panama nga national bird, kag ang madakpan nga nagapangayam sini pamatbatan sing mabug-at nga sentensia.

Sa Ecuador may mga panikasog man nga ginahimo para masalbar ang harpy nga agila. Sang gin-interbyu sang Magmata! ang beterinarya nga si Dra. Yara Pesantes sang Guayaquil Historic Park, ginpaathag niya nga kinahanglan magaedad anay sing apat ukon lima ka tuig ang harpy nga mga agila antes sila magpamuad. Wala labot sini, kada duha ka tuig lang ini nagabóto, kag isa lang ukon duha ang ginaitlog sini. Amo ini ang rason kon ngaa mabudlay ini padamuon. Apang nakapabóto na sing isa ka mapagros nga piso ang breeding program sang parke, siling ni Dra. Pesantes.

Sa indi madugay, indi na problema kon paano amligan ang nagakapapas nga mga sapat. Ngaa? Kontrolon na sang Manunuga, nga si Jehova nga Dios ang mga hitabo sa sini nga duta kag pamatud-an niya nga gintuga niya ang duta kag ang tumalagsahon nga mga tinuga diri nga may katuyuan.—Salmo 104:5; Isaias 45:18.

[Retrato sa pahina 25]

Paghanda sa pagtanda sa agila

[Credit Line]

Pete Oxford/Minden Pictures

[Credit Line sang retrato sa pahina 25]

◀ Tui De Roy/Roving Tortoise Photos