Kon Ngaa Wala Namon Ginpahulog ang Bata

SI Victoria, nga ginhinambitan sa una nga artikulo, nagsiling sa iya nobyo nga si Bill nga indi sia magpahulog. “Nagapati ako nga may kabuhi gid ang ari sa akon tiyan,” siling ni Victoria. “Nahunahuna ko nga kon padayon ako nga mag-upod kay Bill, indi man sia gihapon magsuporta sa akon, gani ginbiyaan ko sia.”

Sang ulihi, nagbag-o ang pensar ni Bill kag ginpakaslan niya si Victoria. Pero indi mahapos para sa ila nga atipanon ang bag-o nabun-ag nga bata. “Wala kami sing salakyan, kuarta, kag  pila lang ang amon mga bayo. Kapigado gid sang amon pangabuhi,” siling ni Victoria. “Bisan pa gamay lang ang sueldo ni Bill kag nagapang-arkila lang kami sa baratuhon nga apartment, gintindugan gid namon ang amon desisyon.”

Madamo man ang binudlayan bangod sa indi gusto ukon wala ginapaabot nga pagbusong. Pero, wala gid nila ginpahulog ang ila bata. Ano ang nakabulig sa ila nga tindugan gid ini nga desisyon bisan pa may mga kabudlayan? Nabuligan sila sang kaalam nga mabasa sa Biblia.

Indi Magpadasudaso —Magplano sing Maayo

Ang Biblia nagasiling: “Kon magplano ka sang maayo kag magmapisan, sigurado nga magauswag ka. Kon magpadasodaso ka, sigurado nga magaimol ka.”—Hulubaton 21:5, Ang Pulong sang Dios

Para kay Connie, mabudlay gid kon magbusong pa sia kay tatlo na ang iya bata kag dis-ebol pa ang isa. “Indi na kami makasagod sang isa pa,” siling niya. “Gani nagdesisyon kami nga ipahulog ang bata.” Pero antes magpadasudaso, gin-istorya niya ang iya upod sa trabaho nga si Kay. Ginpahangop sa iya ni Kay nga may kabuhi na ang iya ginabusong, gani nagbag-o ang iya pensar.

Pero kinahanglan ni Connie ang bulig para makaplano sing maayo. May tiya si Connie nga nagaistar malapit sa ila, amo nga ginpanugda ni Kay nga mangayo sia sing bulig sa iya tiya. Ginsunod ini ni Connie kag nalipay gid nga magbulig ang iya tiya. Subong man, ang bana ni Connie nagpangita sing ekstra nga trabaho, kag nagsaylo sila sa medyo barato nga apartment. Bangod sini, nahandaan nila sing maayo ang pagkabun-ag sang bata.

Ginbuligan man ni Kay si Connie nga mangita sing mga ahensia nga nagabulig sa mga wala naplano nga pagbusong. Sa madamo nga pungsod, may amo sini nga mga ahensia nga nagabulig sa bag-uhan nga mga iloy. Ang Internet ukon mga directory sa telepono makabulig man nga makita ini nga mga ahensia. Ang pagpangayo sing bulig nagakinahanglan sing panikasog, pero kon “magplano ka sang maayo kag magmapisan” mangin madinalag-on ka.

Batuna ang Imo Responsibilidad sa Bata

Ang Biblia nagasiling: “Ang mga mata sang maalam yara sa iya olo, kag ang buangbuang nagalakat sa kadudulman.”—Manugwali 2:14.

Ang maalam nga babayi wala nagapabulagbulag sa kamatuoran ukon “nagalakat sa kadudulman.” Ginagamit niya ang ‘mga mata sa iya olo,’ ukon ang iya kaalam. Ini nga kaalam makabulig sa iya nga mahibaluan ang mga resulta sang iya himuon. Gani, indi pareho sa isa nga nagapabulagbulag sa kamatuoran kon ano gid ang nagakatabo sa iya tiyan, ang maalam nga babayi nagabatyag gid sing kaluoy sa iya ginabusong.

Si Stephanie, nga nagaplano nga magpahulog, ginpalantaw sang ultrasound sang iya duha ka bulan nga ginabusong. “Naghilibion gid ako,” siling ni Stephanie. “Sa pensar ko: Ngaa patyon ko ang isa na ka buhi nga bata?”

Gintindugan man ni Denise ang iya responsibilidad bisan pa nagbusong sia nga wala makasal. Sang ginhatagan sia sing kuarta sang iya nobyo para ipahulog ini, nagsiling si Denise: “Ipahulog? Indi ko gid ’na ’ya mahimo!” Gani wala niya ginpatay ang iya bata.

Indi Magpadala sa Kahadlok sa Tawo

Kon ginapilit ka sang iban nga magpahulog, maalamon nga hunahunaon mo ang ginasiling  sang Biblia: “Delikado kon mahinadlukon kita. Pero kon magsalig lang kita sa GINOO, indi gid kita maano.”—Hulubaton 29:25, APD.

Si Monica, nga disisiete anyos, ginpabusong sang iya nobyo sang manugsugod pa lang sia eskwela sing vocational nga kurso. Napaslawan gid sa sini ang iya iloy nga isa ka balo kag may lima ka kabataan. Gusto gid sang iya iloy nga may tinapusan si Monica para mahaw-as sia sa kapigaduhon. Bangod sini, ginsilingan sia sang iya iloy nga ipahulog ang bata. Si Monica nagsiling: “Sang ginpamangkot ako sang doktor kon dayunon ko gid ang pagpahulog, ginsabat ko sia nga ‘Indi!’”

Para sa iya iloy, naguba gid ang maayo nga palaabuton ni Monica kag mabudlayan pa gid sila nga mag-atipan sang isa pa ka bata, amo nga ginpalayas niya si Monica. Nag-istar si Monica sa iya tiya. Pagligad sang pila ka semana, nagbag-o ang pensar sang iya iloy kag ginpabalik sia sa ila balay. Ginbuligan sia sang iya iloy nga atipanon ang iya lapsag nga si Leon, kag ginpalangga gid si Leon sang iya lola.

Lain naman ang naagyan sang isa ka babayi nga si Robin. “Ginbulong sang doktor ang impeksion ko sa kidney antes pa nahibaluan nga nagabusong ako,” siling ni Robin. “Dayon ginsilingan ako sang doktor nga daku ang posibilidad nga matawo nga abnormal ang akon bata.” Gani, ginpilit sang doktor si Robin nga ipahulog ang iya ginabusong. “Ginpaathag ko sa iya ang pagtamod sang Biblia sa kabuhi,” siling ni Robin. “Kag ginhambalan ko sia nga indi gid ako magpahulog.”

Bisan pa daw may rason ang doktor, wala man nabutang sa ital-ital ang kabuhi ni Robin. * “Ginbun-ag ko ang akon bata kag sang gin-usisa sia,” siling ni Robin, “nasapwan nga gamay lang ang iya diperensia kag may mild cerebral palsy. Maayo man ang iya pagdaku. Subong, 15 anyos na sia kag kanami na sa iya magbasa. Palangga ko gid sia, kag kada adlaw ginapasalamatan ko gid si Jehova sing pila ka beses bangod sa iya.”

Makabulig Gid ang Suod nga Kaangtanan sa Dios

Ang Biblia nagasiling: “Ang GINOO abyan sang tanan nga nagatuman sa iya.”—Salmo 25:14, Maayong Balita nga Biblia.

Ang iban nagdesisyon nga indi gid magpahulog bangod ginbinagbinag nila ang pagtamod sang Manunuga parte sa aborsion. Importante sa ila ang ila suod nga kaangtanan sa Dios, kag ang pagtuman sa iya. Amo ini ang rason kon ngaa wala nagpahulog si Victoria, nga ginsambit kaina. “Nagapati gid ako nga ang Dios amo ang naghatag sang kabuhi,” siling niya, “kag wala ako sing kinamatarong nga kuhaon ang kabuhi nga iya ginhatag.”

 Sang gintun-an sing maayo ni Victoria ang Biblia, nagsuod pa gid ang iya kaangtanan sa Dios. Nagsiling pa sia: “Bangod wala ko ginpahulog ang akon ginabusong, nagsuod pa gid ako sa Dios kag gusto ko nga tumanon sia sa tanan nga tion. Kon mangabay ako sang iya bulig, daw kahapos lang himuon ang tanan nga butang.”

Nagadugang pa gid ang aton pagpabalor sa kabuhi sang ginabusong nga bata kon may suod kita nga kaangtanan sa Dios, nga amo ang Ginhalinan sang kabuhi. (Salmo 36:9) Dugang pa, magahatag ang Dios sing “gahom nga labaw sa kinaandan” para masarangan sang iloy kag sang iya pamilya ang mga responsibilidad sang wala naplano nga pagbusong. (2 Corinto 4:7) Pero, ano ang nabatyagan sang mga tawo nga nagtahod sa pagtamod sang Dios parte sa kabuhi?

Wala Gid Naghinulsol

Ang mga ginikanan nga wala magpahulog sang bata wala gid ginkonsiensia ukon ginsubuan. Sang ulihi, ginkabig nila “ang bunga sang tiyan” nga padya kag indi pagpakamalaut! (Salmo 127:3) Amo sini ang nabatyagan ni Connie, nga ginsambit kaina, mga duha ka oras sa tapos sia nagbata! Nalipay gid sia amo nga gintawgan niya ang iya upod sa trabaho nga si Kay kag ginsugiran niya ini nga nalangkag na gid sia sa pag-atipan sang iya bata nga babayi. Si Connie nagsiling: “Matuod gid nga ginapakamaayo sang Dios ang mga nagatuman sa iya.”

Ngaa makabenepisyo gid kita kon ilugon naton ang pagpabalor sang Dios sa kabuhi? Bangod subong Ginhalinan sang kabuhi, naghatag ang Dios sing kasuguan kag talaksan “para sa [aton] kaayuhan.”—Deuteronomio 10:13, MB.

Sanday Victoria kag Bill, nga ginsambit kaina, nagsiling nga daku gid ang pagbag-o sa ila kabuhi tungod sa desisyon nga indi magpahulog. Nagpaathag sila: “Mga adik kami, kag basi patay na kami kon wala namon gin-untatan ang pagdroga. Gin-untatan namon ini sang naapresyar namon ang kabuhi sang amon bata. Sa bulig sang mga Saksi ni Jehova, nagbag-o kami.”

Ang ila bata nga si Lance, 34 anyos na karon kag 12 ka tuig na nga nakasal. Nagsiling si Lance: “Halin sa pagkabata, gintudluan ako sang akon mga ginikanan nga magdesisyon base sa Biblia. Nakabulig gid ini sa akon, sa akon asawa, kag sa akon bata nga mangin malipayon.” Ang iya amay nga sadto gusto sia ipahulog, nagsiling, “Ano na lang ayhan kon gindayon namon nga ipahulog ang amon pinalangga nga bata.”

Si Monica, nga ginsambit kaina, wala man nagpahulog bisan pa ginpilit sia sang iya iloy. Nagsiling sia: “Duha ka semana sa tapos ako makabata, ginkadtuan ako sang mga Saksi ni Jehova. Natun-an ko kon paano sundon ang mga kasuguan sang Dios sa akon kabuhi. Gintudluan ko dayon ang akon bata nga si Leon kon daw ano ka importante nga tumanon ang Dios, kag ginhigugma gid niya ang Dios. Si Leon isa na karon ka manugtatap sa sirkito sang mga Saksi ni Jehova.”

Nagsiling si Leon parte sa pagpadaku sang iya iloy: “Bangod palangga gid ako sang akon iloy, wala niya ako ginpahulog. Sa baylo, ginpadaku niya ako bisan pa may kabudlayan. Amo nga gusto ko nga gamiton ang akon kabuhi sa paagi nga mapakita ko sa Dios ang akon apresasyon sa sining bilidhon nga regalo.”

Madamo nga tawo ang nakahangop sa pagtamod sang Dios parte sa kabuhi, kag wala gid sila naghinulsol nga gintipigan nila ang kabuhi sang bata nga ila na karon ginapalangga. Mapinasalamaton gid sila nga makasiling, “Wala namon ginpahulog ang bata!”

[Nota]

[Retrato sa pahina 7]

Sang makita ni Stephanie ang ultrasound sang iya duha ka bulan nga ginabusong, nabuligan sia nga magdesisyon

(Gindugang ang linya sa palibot sang fetus)

[Retrato sa pahina 8]

Si Victoria kag si Lance

[Retrato sa pahina 8]

Sanday Victoria kag Bill subong upod sa pamilya ni Lance

[Retrato sa pahina 9]

Si Leon kag ang iya iloy nga si Monica. Nagpasalamat gid sila kay wala nagpadala si Monica sa pagpamilit nga ipahulog si Leon sang nagligad nga 36 ka tuig