Pamangkot sang Mga Pamatan-on

Ngaa Nahadlok Ako sa Pagsugid sang Akon Ginatuuhan?

“Kadamo tani sing tsansa nga masugid ko sa eskwelahan ang akon ginatuuhan. Pero wala ko gid ini nahimo.”—Kaleb. *

“Ginpamangkot kami sang amon maestra kon ano ang amon masiling sa ebolusyon. Nakahibalo ako nga maayo ini tani nga tion para isugid ko ang akon ginatuuhan. Pero hinadlukan ako kag wala na makahambal. Pagkatapos sini, daw nanugunan ako.”—Jasmine.

KON isa ikaw ka Cristiano nga pamatan-on, mahimo nga naeksperiensiahan mo man ang naagyan nanday Kaleb kag Jasmine. Mahimo nga pareho sa ila, importante man sa imo ang mga kamatuoran sa Biblia nga imo natun-an, kag gusto mo man ini isugid sa iban. Pero, mahimo nga nahadlok ka sa paghambal. Bisan pa sa sini, mahimo ka mangin maisog. Paano? Himua ang masunod nga mga tikang sa paghanda mo sa tagsa ka pag-abre sing klase:

1. Hibalua ang imo ginakahadlukan. Kon nagahunahuna ka nga isugid sa iban ang imo ginatuuhan, nagasulod dayon sa imo pensar ang negatibo nga matabo! Pero kon kaisa, mahaganhagan ang imo kahadlok kon isulat mo ini.

Kompletuha ang masunod.

▪ Kon isugid ko ang akon ginatuuhan sa eskwelahan, amo sini ang mahimo matabo:

․․․․․

Indi ka na mahadlok kon mahibaluan mo nga amo man sini ang naeksperiensiahan sang iban nga mga pamatan-on nga Cristiano. Halimbawa, ang 14 anyos nga si Christopher nagsiling, “Nahadlok ako basi kadlawan ako sang iban nga kabataan kag hambalon nila nga weird ako.” Kag si Kaleb nga ginsambit kaina nagsiling, “Nabalaka ako basi may ipamangkot sila sa akon kag indi ko ini masabat.”

2. Atubanga ini. Wala bala sing basihan ang imo kahadlok? Indi gid man. “Ang iban nga  kabataan, kuno abi interesado sa akon ginapatihan,” siling ni Ashley. “Pero sa ulihi ginalain nila ang akon ginhambal kag ginasunlog nila ako sa atubangan sang iban.” Amo ini ang natabo sa 17 anyos nga si Nicole: “Ginpaanggid sang isa ka bata nga lalaki ang isa ka bersikulo sa iya Biblia kag sa akon, kag lain nga termino ang gingamit. Siling niya ginbag-o kuno ang akon Biblia. Nakibot gid ako! Indi ko kabalo kon ano ang akon himuon.” *

Makakululba gid man ini nga mga kahimtangan! Pero imbes nga likawan, atubanga ini subong bahin sang imo pagkabuhi bilang Cristiano. (2 Timoteo 3:12) “Nagsiling si Jesus nga pagahingabuton ang iya mga sumulunod,” siling sang 13 anyos nga si Matthew, “gani indi naton mapaabot nga manamian ang tanan sa aton ukon sa aton mga pagpati.”—Juan 15:20.

3. Hunahunaa ang maayo nga mga resulta. Mahimo bala nga may maayo nga resulta sa malain nga eksperiensia? Amo sini ang ginahunahuna sang 21 anyos nga si Amber. “Mabudlay magpaathag sang imo ginatuuhan sa mga tawo nga wala nagapati sa Biblia,” siling niya, “pero nagabulig ini nga mahangpan mo pa gid ang imo panindugan.”—Roma 12:2.

Tan-awa liwat ang mga kahimtangan nga ginsulat mo sa una nga tikang. Pamensara ang bisan duha lang ka maayo nga resulta nga mahimo matabo sa sina nga kahimtangan, kag isulat ini sa ubos.

1 ․․․․․

2 ․․․․․

Clue: Ngaa mapahaganhagan ang pagpamilit sang iban kon isugid mo sa ila ang imo ginatuuhan? Ano ang epekto sini sa imo kompiansa? Sa imo balatyagon kay Jehova? Sa iya balatyagon sa imo?—Hulubaton 23:15.

4. Mangin handa. “Ang tagiposoon sang matarung nagatoon sa pagsabat,” siling sang Hulubaton 15:28. Magluwas sa paghunahuna kon ano ang imo isabat, mangin handa man sa mahimo nga ipamangkot sang iban. Mag-research sa sini nga mga topiko, dayon planuha kon ano ang gusto mo nga isabat.—Tan-awa ang tsart nga “ Handai ang Imo Isabat,” sa pahina 25.

5. Sugdi ini. Kon handa ka na nga isugid ang imo ginapatihan, paano mo ini sugdan? Madamo ka sang puede mahimo. Ang pagsugid sang imo ginapatihan sa iban pareho man sa paglangoy: Ang iban amat-amat nga maubog sa tubig; ang iban naman malumpat dayon. Sing kaanggid, puede man nga istoryahon mo anay sila sing topiko nga indi parte sa relihion kag dayon panilagan mo kon interesado sila. Pero kon nakulbaan ka gid kon ano ang mahimo nga mangin resulta, mahimo nga ang pinakamaayo mo nga himuon amo ang ‘paglumpat dayon.’ (Lucas 12:11, 12) “Mas mahapos ang pagsugid dayon sang imo ginatuuhan sangsa magsagi ka pa pamensar kon paano mo ini himuon,” siling sang 17-anyos nga si Andrew. “Indi man gali mabudlay kon masugdan mo na ang pag-istoryahanay!” *

6. Mangin makatarunganon. Subong nga indi ka mag-dive sa manabaw nga tubig, maghalong nga indi kamo magbaisay. Dumduma nga may tion sa paghambal kag may tion man sa paghipos. (Manugwali 3:1, 7) May mga tion nga bisan si Jesus wala nagsabat sa mga pamangkot. (Mateo 26:62, 63) Dumduma man ini nga prinsipio: “Ang mahalongon nga tawo nakakita sang malaut kag nagapanago sia; apang ang kulangkulang nagapadayon, kag nagaantus tungud sini.”—Hulubaton 22:3.

Kon sa banta mo magbaisay kamo sa inyo pag-istoryahanay, indi na ini ‘pagpadayuna.’ Sa baylo, maghatag lang sing malip-ot kag mahalungon nga sabat. Halimbawa, kon suyaan ka sang imo klasmeyt, ‘Ngaa wala ka gapanigarilyo haw?’ Puede mo sia masabat nga ‘Indi ko lang gusto nga higkuan ang akon lawas a!’ Depende sa iya sabat, mahimo ka magdesisyon kon ipaathag mo sa iya ang imo pagpati ukon indi.

Ini nga mga tikang makabulig sa imo nga mangin “handa pirme nga magpangapin” sa imo pagtuo. (1 Pedro 3:15) Siempre pa, indi buot silingon nga kon handa ka indi ka na makulbaan. Pero nagsiling ang 18 anyos nga si Alana: “Kon ipaathag mo ang imo pagpati bisan ginakulbaan ka, kanami sang pamatyag mo kay daw may nahimo ka—nadaug mo ang imo kahadlok nga basi may matabo nga indi maayo. Kag kon maayo ang resulta, mas manami pa gid ang imo pamatyag! Malipay ka nga wala ka mahadlok sa pagsugid sini.”

Ang iban pa nga artikulo sang “Young People Ask” makita sa Web site nga www. watchtower.org/ype

[Mga nota]

 BINAGBINAGA INI

▪ Amo bala sini ang ginahunahuna sang mga estudyante sa inyo eskwelahan?

‘Nahibaluan ko nga isa ka sa mga Saksi ni Jehova. Basi nagahunahuna ka nga suyaan ko ikaw, pero ginatahod ko ang imo pagpati. Ngaa kalmado ka lang gihapon bisan pa sa mga problema sa palibot? Ginakulbaan ako. May matabo naman bala nga giyera? Mabulagay bala ang akon mga ginikanan? Matapos bala ini nga adlaw nga indi ako matiruhan ukon mabun-an sa eskwelahan? Madamo ako sang ginapaligban, pero ikaw, daw may direksion ang imo kabuhi kag kabalo ka sang imo himuon. Bangod bala ina sa imo relihion? Gusto ko tani nga istoryahon ka parte sa sini, galing nahadlok ako. Puede ikaw na lang ang mag-istorya sa akon?’

[Kahon/Mga retrato sa pahina 26]

ANG GINASILING SANG IBAN NGA PAMATAN-ON

“Ginakadlawan ako sang iban nga bata kon ginasugid ko ang akon ginapatihan. Pero masami nga ginapabay-an man lang nila ako kon indi ko sila pagsapakon.”—Francesca, Luxembourg.

“Kon indi mo pag-isugid sa iban ang imo ginatuuhan, amat-amat mo nga malipatan nga Cristiano ka, kag sa ulihi mangin pareho ka na sa ila. Indi puede nga magsunodsunod ka man sa ila.”—Samantha, United States.

[Retrato sa pahina 26]

 “Sang bata pa ako, gusto ko nga mangin pareho sa iban. Pero nakita ko nga ang kamatuoran nakahatag sa akon sing mas maayo nga kabuhi. Bangod sini, may kompiansa na ako kag ginapabugal ko ang akon ginapatihan.” —Jason, New Zealand.

[Kahon sa pahina 26]

MGA INTRODUKSION SA PAG-ISTORYAHANAY

▪ “Ano ang mga plano mo sa sira klase?” [Pagkatapos nila sabat, isugid kon ano ang imo mga plano, pareho abi sang pagtambong sa asembleya, ukon pagdugang sang imo tion sa pagwali.]

▪ Magsambit sang isa ka balita, kag dayon mamangkot: “Nabatian mo man to? Ano ang masiling mo parte sina?”

▪ “Sa banta mo, masolusyunan pa ayhan ang kapigaduhon [ukon iban pa nga problema]? [Tuguti sia sa pagsabat.] Ngaa amo sina ang sabat mo?”

▪ “Ano relihion mo?”

 ▪ “Mga lima ka tuig sugod subong, ano sa banta mo ang mangin kahimtangan mo?” [Pagkatapos sia makasabat, isugid sa iya ang imo plano sa pag-alagad sa Dios.]

 [Tsart sa pahina 25]

(Para sa aktual nga pormat, tan-awa ang publikasyon)

Handai ang Imo Isabat

Panugda: Istoryahi ninyo ini upod sa imo mga ginikanan kag mga abyan. Kompletuha ang tsart. Dayon mamensar kon ano pa gid ang mahimo ipamangkot sang imo mga klasmeyt.

Pamangkot

Ano ang imo pagtamod sa mga agi kag mga tomboy?

Sabat

Indi man ako akig sa mga agi kag mga tomboy pero wala ako naga-ugyon sa ila.

Masunod nga Pamangkot

Buot silingon may pinilian ka?

Research

1 Corinto 6:9, 10; Questions Young People Ask-Answers That Work, Volume 2, Kapitulo 28. *

Sabat

Indi man,pero wala ako nagaugyon sa bisan ano nga klase sang imoralidad, indi lang sa homoseksuwalidad

Pagdeyt

Pamangkot

Ngaa wala ka ya gadeyt?

Sabat

Nagdesisyon ako nga indi anay magsulod sa isa ka relasyon kon wala pa ako sa husto nga edad.

Masunod nga Pamangkot

Tungod na guro sa relihion mo no?

Research

Ambahanon ni Solomon 8:4; Young People Ask, Volume 2, kapitulo 1.

Sabat

Huo. Nagadeyt lang kami kon handa na kami mangasawa ukon mamana, kag indi pa ako handa.

Wala sing Nadampigan

Pamangkot

Ngaa wala kamo nagasaludo sa flag?

Sabat

Ginarespeto ko ang aton pungsod pero wala ko ini ginasimba.

Masunod nga Pamangkot

Ti indi mo ya pag-ipakigbato ang imo pungsod?

Research

Isaias 2:4; Juan 13:35; Ano gid ang Ginatudlo Sang Biblia? paina 148-151. *

Sabat

Indi, kag minilyon ka Saksi ni Jehova sa iban nga pungsod ang indi man makig-away sa aton pungsod.

Dugo

Pamangkot

Ngaa wala kamo nagapatughong sing dugo?

Sabat

Ginabaton ko ang isa ka pagbulong basta indi ini makahalit pareho sang mga dugo nga mahino may AIDS. Pero siling sang Biblia maglikaw kita sa dugo, amo nga wala ako nagapatughong sing dugo.

Masunod nga Pamangkot

Ti kon mapatay ka abi kon indi ka magpatughong? Patawaron ka man siguro sang Dios, indi bala?

Research

Binuhatan 5:28, 29: Hebreo 11:6; Ginatudlo Sang Biblia nga libro pahina 129-131.

Sabat

Pagdesisyon

Pamangkot

Pareho kamo sing relihion ni ano, kag nagahimo man sia gani sini. Ti ngaa indi ka ya haw?

Sabat

Gintudluan kami kon ano ang ginapatuman sang Dios, pero wala kami ginapilit nga himuon ini! Ang desisyon nagadepende sa kada isa sa amon.

Masunod nga Pamangkot

Buot silingon pagusto na lang ang kada isa sa inyo relihion?

Research

Sabat

Pagpanuga

Ngaa wala kamo nagapati sa ebolusyon?

Sabat

Ngaa dapat ko gid patihan ang ebolusyon? Bisan gani ang mga sientipiko nga amo ang eksperto sina, wala nagapati!

Masunod nga Pamangkot

Research

Sabat

[Nota]

[Retrato sa pahina 26]

Ang pagsugid sang imo ginapatihan pareho man sa pagpaligo sa suba. Mahimo nga amat-amat ka nga maubog sa tubig ukon maglumpat ka dayon.