Ang Pagtamod sang Biblia

Sala Bala Kon Islan Mo ang Imo Relihion?

Sang nagtuon si Avtar sa Biblia, naakig ang iya Sikh nga pamilya. “Sa amon pungsod,” siling niya, “kon islan mo ang imo relihion, ang mga tawo indi na magsapak sa imo. Bisan gani ang amon mga ngalan may relihioso nga kahulugan. Para sa ila kon islan mo ang imo relihion, ginasikway mo ang imo pagkatawo kag wala mo ginatahod ang imo pamilya.”

SANG ulihi si Avtar nangin isa sa mga Saksi ni Jehova. Nakasala bala sia kay gin-islan niya ang iya relihion? Mahimo nga pareho kamo sang ginahunahuna sang iya pamilya. Basi nagapati ka nga indi mo na dapat pag-islan ang imo relihion kay amo na ini ang kultura kag gindak-an sang imo pamilya.

Importante ang pagtahod sa pamilya. Ang Biblia nagasiling: “Pamatii ang imo amay nga nagpakatawo sa imo.” (Hulubaton 23:22) Pero mas importante nga hibaluon ang kamatuoran parte sa aton Manunuga kag sa iya mga katuyuan. (Isaias 55:6) Posible bala ini? Kon amo, daw ano ini ka importante sa imo?

Pagpangita sang Kamatuoran sa Biblia

Indi palareho ang ginatudlo sang mga relihion sa kalibutan. Amo nga imposible nga matuod ang tanan nila nga ginatudlo. Gani, suno sa Biblia, mahimo madamo nga tawo ang “may kakugi . . . sa Dios; apang indi suno sa sibu nga ihibalo.” (Roma 10:2) Pero, suno sa 1 Timoteo 2:4, si apostol Pablo nagsiling nga kabubut-on sang Dios nga “ang tanan nga sahi sang mga tawo . . . makadangat sa sibu nga ihibalo tuhoy sa kamatuoran.” Paano mo makita ining sibu nga ihibalo?

Binagbinaga kon ngaa kinahanglan mo tun-an ang Biblia. Si Pablo nga gintuytuyan sang Dios sa pagsulat sing Biblia nagsiling: “Ang pagsulat sa bug-os nga Kasulatan gintuytuyan sang Dios kag mapuslanon ini sa pagpanudlo.” (2 Timoteo 3:16) Subong bahin sang imo pagpangita sang kamatuoran, usisaa ang mga ebidensia nga matuod ang ginasiling sang Biblia. Usisaa mismo ang indi matupungan nga kaalam sang Biblia, pagkasibu sini sa maragtas, kag ang mga natuman nga tagna sini.

Wala ginatudlo sang Biblia nga ang tanan nga relihion ginabaton sang Dios, sa baylo, ginasiling sini nga indi pagpatihan ang tanan nga mabatian, kundi ‘tilawan ang mga mensahe agod makita kon bala naggikan gid ini sa Dios.’ (1 Juan 4:1) Halimbawa, ang mga panudlo nga naghalin sa Dios dapat nahisanto sa iya personalidad, lakip na sa gugma nga amo ang iya panguna nga kinaiya.—1 Juan 4:8.

Ginapasalig kita sang Biblia nga gusto sang Dios nga ‘makita gid naton sia.’ (Binuhatan 17:26, 27) Bangod gusto sang aton Manunuga nga pangitaon naton ang kamatuoran, indi sala ang pag-aplikar sang aton natun-an, bisan pa nagakahulugan  ini nga islan naton ang aton relihion. Pero, paano naman ang mga problema nga mahimo mangin resulta sini?

Nagakaigo nga Pagkamainunungon sa Pamilya

Kon islan sang mga tawo ang ila relihion, mahimo nga indi na sila makigbahin sa pila ka ritwal kag mga selebrasyon sang ila anay relihion. Ang paghimo sini mahimo magresulta sa indi maayo nga kaangtanan sa sulod sang pamilya. Nahibaluan ini ni Jesus. Ginsilingan niya ang iya mga sumulunod: “Nagkari ako sa pagpahanabo sing pagbinahinbahin, ang lalaki batok sa iya amay, kag ang anak nga babayi batok sa iya iloy, kag ang lamharon nga asawa batok sa iya ugangan nga babayi.” (Mateo 10:35) Buot bala silingon ni Jesus nga ang mga panudlo sa Biblia nangin kabangdanan sang pagbinahinbahin? Indi. Nahibaluan ni Jesus kon ano ang mahimo nga resulta kon pamatukan sang miembro sang pamilya ang isa nga nagbaton sang lain nga relihion.

Dapat bala likawan ang paglainay sing buot sa sulod sang pamilya? Ginatudlo sang Biblia nga dapat mangin matinumanon ang mga kabataan sa ila mga ginikanan kag dapat magpasakop ang mga asawa sa ila bana. (Efeso 5:22; 6:1) Pero, ginsugo man sini ang mga nagahigugma sa Dios nga “tumanon ang Dios subong manuggahom sa baylo sang mga tawo.” (Binuhatan 5:29) Gani kon kaisa, ang pagkamainunungon sa Dios mahimo magresulta sing desisyon nga indi mauyunan sang pila ka miembro sang imo pamilya.

Bisan pa maathag nga ginpakita sang Biblia kon ano ang matuod kag butig nga mga panudlo, ginhatagan sang Dios sing kahilwayan ang tagsatagsa kon ano ang ila pilion. (Deuteronomio 30:19, 20) Indi dapat pagpiliton ang isa nga magsimba sa wala niya ginaugyunan ukon dapat sia papilion sa tunga sang iya relihion kag pamilya. Ang pagtuon bala sa Biblia nagaresulta sa pagkabungkag sang pamilya? Indi. Ang matuod, ginapalig-on sang Biblia ang mag-asawa nga may lainlain nga relihion nga indi magbulagay.—1 Corinto 7:12, 13.

Pagdaug sa Kahadlok

Mahimo nga mahadlok ka kon ano ang reaksion sang mga tawo sa palibot ninyo kon magtuon ka sa Biblia upod sa mga Saksi ni Jehova. Nagsiling si Mariamma: “Nabalaka ang akon pamilya nga basi indi ako makakita sing responsable nga bana. Gani ginpamatukan nila ang akon pagtuon sa Biblia.” Nagsalig si Mariamma kay Jehova nga Dios kag nagpadayon sa iya pagtuon. (Salmo 37:3, 4) Mailog mo man ini. Imbes nga mahadlok sa mahimo matabo, hunahunaa ang mga benepisyo. Nangin mas maayo ang kabuhi kag personalidad sang isa bangod sang mensahe sa Biblia. Natun-an sang mga tawo nga higugmaon sing tudok ang ila pamilya. Ang malain nga mga batasan subong sang pagpamuyayaw, pagpanakit, pagpahubog kag pagdroga mahimo nga madula. (2 Corinto 7:1) Ginapalig-on sang Biblia ang maayo nga batasan subong sang pagkamainunungon, pagkabunayag, kag pagkapisan. (Hulubaton 31:10-31; Efeso 4:24, 28) Ngaa indi mo pagtun-an ang Biblia kag tan-awon ang mga benepisyo sang pag-aplikar sang mga panudlo sini?

NAMANGKOT KA BALA?

▪ Ngaa dapat mo usisaon ang imo relihion?—Hulubaton 23:23; 1 Timoteo 2:3, 4.

▪ Paano mo mahibaluan ang matuod nga mga panudlo?—2 Timoteo 3:16; 1 Juan 4:1.

▪ Tugutan mo bala ang imo pamilya nga punggan ka sa pagtuon sa Biblia?—Binuhatan 5:29.

[Blurb sa pahina 29]

Nangin mas maayo ang kabuhi kag personalidad sang isa bangod sang mensahe sa Biblia

[Retrato sa pahina 29]

Si Mariamma kag ang iya bana