Tabaky​—Ang Pangpaguapa nga Halin sa Kahoy

▪ Sa kigas nga bahin sang bagatnan-katundan sang Madagascar, ang mga babayi nagakadto sa hunasan agod mangita sing mga pakinhason para ibaligya sa mga turista. Ang guya sang mga babayi diri ginapalhitan sing tabàky. Ang tabàky ginapalhit sa guya indi lang agod proteksionan ang panit sa init sang adlaw kundi pangpaguapa man.

Ang tabàky halin sa mahumok nga bahin sang kahoy nga masonjoany kag fihamy (nga ginatawag man nga aviavy). Simple lang ini himuon. Ginanusnos ini sang babayi sa matapan nga bato, kag amat-amat nga ginapatuluan sing tubig agod maglapuyot ang duga sini. Dayon nagagamit sia sing lipak nga kahoy ukon plastik nga tipulon ang punta agod ipalhit ang tabàky sa iya nawong.

Ang pila ka babayi nagapahid sang tabàky sa ila bug-os nga nawong, magluwas lang sa palibot sang ila mga mata. Ang iban naman nagabutang lang sa ila agtang, guya, ukon sag-ang. Ginagamit ang tabàky para matabunan ang mga pikas sa guya ukon makontrol ang oil sang panit, ukon ginagamit man ini para pangpaguapa. Kon kaisa ang tabàky ginasamuan man sang iban nga mga ingrediente. Gani, sarisari ang mahimo nga mga korte, kolor, kag kapinuhon sini.

Sin-o ang maghunahuna nga ini nga pangpaguapa naghalin sa kahoy? Sa Madagascar, ang tabàky pinasahi pero praktikal nga pangpaguapa.