‘Ang Hunoshunos nga si Jehova Lamang ang Makabukas’

▪ Sang 2007, napatay ang tatay nanday Erika kag Mattia. Si Erika anom ka tuig kag si Mattia naman apat ka tuig. Pero naghaganhagan ang ila kasubo bangod sa paglaum nga pagkabanhaw.—Binuhatan 24:15.

Nanamian si Erika nga isugid sa iban ini nga paglaum, ilabi na sa iya eskwelahan sa Sicily. Halimbawa, sang ang iya amiga nga si Beatrice nagsiling nga yara na sa langit ang tatay ni Erika, nagsabat sia nga indi amo sina ang ginasiling sang Biblia. “Ti, sa diin gali sia?” pamangkot ni Beatrice.

“Sa pantyon,” sabat ni Erika. Gusto mahibaluan ni Beatrice kon ano ang pantyon.

“Daw hunoshunos ina nga nagabukas kag nagasira,” paathag ni Erika. “Pero kon magsira na ini nga hunoshunos, indi mo na ini mabuksan. Si Jehova lamang ang makabukas sini pag-abot sang bag-o nga kalibutan.”

Ginpaathag dayon ni Erika sa iya amiga nga ang ngalan sang Dios amo si Jehova. Ginpaathag man niya nga himuon sang Dios ang duta nga paraiso, wala na sing balatian, kag mabuhi liwat ang mga patay. Dayon ginsilingan ni Erika si Beatrice nga maglisensia kay nanay niya kon puede sia regaluhan ni Erika sang libro parte sa sini nga mga butang.

Sang nasiguro na ni Erika nga nagpasugot ang nanay ni Beatrice, ginhatagan niya si Beatrice sang libro nga Magtuon Gikan sa Daku nga Manunudlo. Padayon nga ginasugid ni Erika sa iban ang mga butang nga iya natun-an sa Biblia kag ginhatagan man gani niya sini nga libro ang iya maestra.

Ang matuod, may mga tion nga ginasubuan gihapon si Erika kag ang iya manghod nga lalaki bangod sa kamatayon sang ila amay. Apang ang paglaum nga pagkabanhaw nagapahaganhagan sa ila ginabatyag. Pareho sang madamo nga tawo sa bug-os nga kalibutan, ini nga mga kabataan nagapasalamat gid kay Jehova, ang Dios sang matuod nga lugpay, samtang ginahulat nila ang pag-abot sini nga adlaw.—Mateo 21:16; 2 Corinto 1:3, 4.

Mahimo mo matigayon ining matahom nga libro nga may 256 ka pahina kag pareho kadaku sini nga magasin. Sulati ang kupon sa ubos kag ipadala sa adres nga makita sa kupon ukon sa adres nga nalista sa pahina 5 sa sini nga magasin..

□ Interesado ako nga makabaton sing kopya sang libro nga ginapakita diri.

□ Palihug kontaka ako para sa wala bayad nga pagtuon sa Biblia sa puluy-an.