Ang Sekreto sa Paghimo sing Espresso

Ginatos ka bilyon ka tasa sang kape ang ginainom kada tuig amo nga bantog gid ini sa bilog nga kalibutan.

PARA sa mga mahilig sa kape, ang espresso amo “ang pinakamanamit nga kape,” siling sang balasahon nga Scientific American, “kay ang pinasahi nga proseso sa paghimo sini nagapagua sang manamit nga sabor sang kape.” Ginahimo ang espresso paagi sa usbong sang mainit nga tubig nga nagatulo sa mapino nga kape.

“Nanamian gid ang mga tawo mag-inom sang espresso sa mga kapehan, amo nga gusto nila makahimo sing pareho sini kanamit nga kape sa ila balay,” siling sang isa ka eksperto sa industriya sang kape sa Magmata! Posible gid ini kay may mga gamit na subong sa paghimo sing espresso nga puede mabakal. Gani sa pila ka pungsod, madamo na nga tawo ang nagahimo sing espresso sa ila balay.

Nagapangape ka bala pirme? Gusto mo bala nga mangin eksperto sa paghimo sing espresso? Paano ka makahimo sing manamit nga espresso? Ginpamangkot ini sang Magmata! sa duha ka eksperto sa pagsanlag sang kape—si John kag ang iya amay nga si Gerardo nga nagaistar sa Sydney, Australia.

Pagkuha sing Hustuhan nga Blend

Sa pabrika sang kape nanday John kag Gerardo, makita ang nagatinangkas nga sako sang liso sang kape halin sa lainlain nga pungsod. “Ginasamo ko ang lainlain nga baridad sang kape suno sa akon pinasahi nga blend,” siling ni John. “Ang tagsa ka baridad may pinasahi nga sabor, kag kon samuon ini nagagua ang manamit nga blend. Indi madali makuha ang gusto mo nga sabor. Ang matuod, anom ka bulan ako nga nag-eksperimento para makuha ang husto nga blend sang amon pinakamabakal nga espresso.” Amo sini ang rason kon ngaa wala gid ginasugid sang mga eksperto ang ila sekreto!

Si Gerardo eksperto gid sa paghimo sing espresso bangod sang iya madugay na nga eksperiensia. Sia gid ang nagadumala sa pagsanlag sang kape kay diri nagadepende ang sabor. Samtang nagainit ang mga liso nga ginasanlag sa nagatiyog nga dram, nagahabok ini kag nagabuka. Amo nga nagapangamyon ang mahumot nga lana sang kape. Ini nga lana amo ang nagapahumot kag nagapanamit sang sabor sang espresso. Agod mangin eksperto ang isa sa pagsanlag dapat makabisado niya ang kainiton kag kadugayon sang pagsanlag.

Pagkatapos masanlag ang kape, ginhuwad ni Gerardo ang mainit pa nga liso nga daw tsokolate ang kolor sa isa ka salsalon nga salaan kag ginpahanginan para indi mabatok. “Manamit gid ang sabor sang kape sa sulod sang isa ukon duha ka adlaw pagkatapos ini masanlag,” siling ni John. Sa sini nga tion, ang liso sang kape nagauntat na sa pagpagua sing lana nga amo ang nagahatag sing sabor, gani amo na ini ang pinakamaayo nga tion sa paggaling.

Ang Sekreto sa Paghimo sing Espresso

“Ang espresso amo ang pinakamanamit nga kape apang mabudlay ang paghimo sini,” paathag ni John. Agod makuha ang manamit nga sabor sang espresso kinahanglan sundon sing maayo ining tatlo ka proseso: paggaling (1), pagdasok sang ginaling nga kape sa filter basket sang coffee machine (2), kag pagpatubod sang espresso (3). “Importante gid ang husto nga paggaling sang kape,” siling ni John. “Kon ang ginaling mabahol, mangin malasaw ang espresso. Kon tam-an naman ka pino, magapait ini kag daw batok ang sabor. Mabahol man ukon mapino ang ginaling, mahibaluan mo kon daw ano  kadamo nga lana ang yara sa kape paagi sa crema—ang bukal nga daw bulawan nga kaki ang kolor.”

Pagkatapos magaling ang mga liso, gindasok ni John sing maayo ang ginaling sa filter basket paagi sa tamper kag gintapan ini. Gin-lock niya ang filter basket kag ginpaandar ang coffee machine. Dayon, nagtubod ang mainit nga kape. Pero nahibal-an gilayon ni John nga ang ginaling mabahol. “Agod makuha ang hustuhan nga sabor kinahanglan nga mag-eksperimento,” siling niya. “Testingan naman naton ang mas mapino nga ginaling kag idasok sing maayo para mas mahinay ang ilig.”

Gani gintestingan ni John ang mas mapino nga ginaling kag ginpaandar liwat ang coffee machine. Ang espresso nga madamo sing crema amat-amat nga nagtubod. Nagyuhum si John sang napanimahuan niya ang kaamyon sang mahumot nga kape. “Dapat patyon na ang machine kon lasaw na ang nagagua nga kape,” siling niya. Kinahanglan ini himuon sa sulod sang 30 segundos kay “kon sigehon pa, magapait ang kape kag magadamo ang caffeine,” siling pa niya.

“Sa banta ko, amo ini ang pinakamanamit nga espresso nga nahimo naton,” siling ni John sang nakita niya ang malapuyot nga crema. “Gusto n’yo mangape?”

Ang iban nanamian mag-inom sing puro nga kape. Buot silingon, wala sila sing iban pa nga ginasimbog sa kape magluwas sa diutay nga kalamay. Pero ang iban naman ginabutangan nila sing mainit nga gatas para mangin cappuccino, latte, ukon iban pa nga sahi sang espresso. “Sa karon ang kapin sa 90 porsiento sang espresso nga ginabaligya may lakot nga gatas,” siling sang Fresh Cup Magazine. *

Masadya gid ang pag-istoryahanay kon may ginainom nga mainit nga kape ukon tsa. “Ang manamit nga ilimnon nagapasuod sa mga tawo,” siling ni John. “Ayhan amo ina ang rason kon ngaa manamit gid mangape!”

[Nota]

[Retrato sa pahina 15]

Photo 3: Images courtesy of Sunbeam Corporation, Australia

[Retrato sa pahina 15]

PAGBAKAL KAG PAGTAGO SANG KAPE

“Ang sabor sang sinanlag nga kape nagakadula pagligad sang isa ka semana. Ang sabor sang ginaling nga kape madula pagligad sang isa ka oras, kag pila lamang ka minuto, nagatahaw na ang sabor sang linaga nga kape,” siling sang isa ka balasahon parte sa kape. Gani, kon magbakal ka sing liso sang kape, maayo nga diutay lang ang baklon mo kag tagua ini sa mabugnaw kag wala ginainitan nga lugar. Pero indi ini pag-isulod sa repridyeretor kay basi mahum-og ini kag madula ang sabor. Laga-a dayon ang kape pagkatapos mo galing.

[Credit Line sang retrato sa pahina 15]

Photo 3: Images courtesy of Sunbeam Corporation, Australia.