Ang Pagtamod sang Biblia

Dapat Bala Naton Pakataason ang mga Lider sang Relihion?

Reverend, Father, Pope, Cardinal, Archbishop, Bishop, Pastor—pila lamang ini sang mga titulo sang mga lider sang lainlain nga relihion, kag ini nga mga titulo nagapakataas sa ila gikan sa ila mga miembro. Kinaandan na sa madamo nga relihion nga may kinatuhayan ang mga lider sa ila mga miembro. Pero ginsugo bala ini sang Dios, ukon tradisyon lamang ini sang tawo? Labaw sa tanan, pabor bala sa sini ang Dios?

“SA Bag-o nga Testamento kag sang tion nga buhi pa ang mga apostoles, indi naton makita nga may mga lider nga ginatamod nga mas mataas sangsa ila miembro,” sulat sang propesor sa teolohiya nga si Cletus Wessels. Ang Encyclopedia of Christianity nagsiling: “Amat-amat nga ang iban ginhimo nga lider kag ginhatagan sing posisyon. . . . Ang ‘ordinaryo’ nga mga miembro sang simbahan ginakabig karon subong mga tawo nga wala sing nahibaluan parte sa Dios ukon sa Biblia.” Nangin lapnag ini nga pagtamod sang ikatlo nga siglo C.E.—kapin sa duha ka gatos ka tuig sa tapos nagkabuhi si Jesucristo sa duta!

Maathag nga ini nga pagtamod wala nabase sa halimbawa nga ginpahamtang sang mga apostoles ni Jesus kag sang iban pa nga mga Cristiano sang una. Kon amo, sala bala ini? Huo, suno sa Biblia. Binagbinaga kon ngaa.

“Tanan Kamo Mag-ulutod”

Ang Pulong sang Dios nagasiling sa aton nga ang tanan nga Cristiano mga ministro sang Dios kag wala sing isa nga mas mataas ukon mas manubo sa iban. (2 Corinto 3:5, 6) “May malig-on gid nga panindugan [ang mga Cristiano sang una] nga wala sila sing kinatuhayan sa isa kag isa,” siling sang manunulat sa relihion nga si Alexandre Faivre. Ang pinamulong nga “wala sing kinatuhayan sa isa kag isa” nahisuno sa ginsiling ni Jesus sa iya mga sumulunod: “Tanan kamo mag-ulutod.”—Mateo 23:8.

Matuod, ang hamtong nga mga lalaki nga may madalom nga ihibalo tuhoy sa Dios, nagaalagad subong manugtatap, nga nagapanghikot subong manugbantay kag manunudlo. (Binuhatan 20:28) Pero, ini nga mga lalaki wala ginabayaran subong mga lider. Kalabanan sa ila ordinaryo lamang nga mga lalaki nga nagatrabaho—mga bana kag mga amay. Isa pa, nagakabagay sila nga mag-alagad subong manugtatap, indi bangod nakaeskwela sila sa mga seminaryo, kundi bangod mapisan sila nga nagatuon sa Pulong sang Dios kag nakapalambo sing mga kinaiya nga ginapatuman sang Dios nga mabasa sa Biblia. Lakip sa sini nga mga kinaiya amo ang “haganhagan [nga] batasan, maligdong sing hunahuna, mahim-ong, maabiabihon, kalipikado sa pagpanudlo, . . . makatarunganon, indi palaaway, indi mahigugmaon sa kuarta, isa ka lalaki nga nagadumala sang iya panimalay sa maayo nga paagi.”—1 Timoteo 3:1-7.

Ngaa Maalamon nga Sundon ang Biblia

“Indi magsobra sa mga butang nga nasulat na,” siling sang Biblia. (1 Corinto 4:6) Indi gid mahamuot ang Dios sa mga tawo kon indi nila pagtumanon ini nga sugo, kag nagakatabo ini sa pila ka relihion nga may mga lider nga nagapakataas sangsa ila mga miembro. Paano? Palihug binagbinaga ang masunod nga anom ka punto.

1. Ang pagpakataas sa isa subong lider daw nagapahangop nga ginpili sia sang Dios para sa pinasahi nga pag-alagad. Pero, ang Biblia nagasiling nga ang tanan nga matuod nga Cristiano dapat mag-alagad sa Dios kag magdayaw sa iya ngalan. (Roma 10:9, 10) Ginapalig-on ang Cristianong mga lalaki nga lab-uton ang pribilehiyo sa pag-alagad sa kongregasyon, kag amo ini ang ginahimo sang mga Saksi ni Jehova.—1 Timoteo 3:1.

2. Ang paggamit sing relihioso nga mga titulo nagapakataas man sa mga lider. Pero si Jesus nagsiling:  “Sia nga nagagawi nga kubos sa tunga ninyo amo ang labing daku.” (Lucas 9:48) Para masunod ining mapainubuson nga panimuot, ginsilingan niya ang iya mga sumulunod nga indi maggamit sang relihioso nga mga titulo.—Mateo 23:8-12.

3. Mahimo piliton sang ginabayaran nga lider ang iya mga miembro nga maghatag sing daku katama nga amot, ilabi na gid kon ang ila lider may maluho nga pagkabuhi. Pero ang Cristiano nga mga manugtatap nagaatipan sa ila pinansial nga mga kinahanglanon paagi sa pagtrabaho, amo nga maayo gid sila nga huwaran sa iban. *—Binuhatan 18:1-3; 20:33, 34; 2 Tesalonica 3:7-10.

4. Bangod ang mga lider sang relihion mahimo magsalig sa iban sa pinansial nga suporta, mahimo sila masulay nga iwali lamang ang mga butang nga gusto mabatian sang ila mga miembro. Ang matuod, ini nga butang ginsiling sing abanse sang Biblia. “Magaabot ang tion nga ang mga tawo indi na magpamati sa husto nga mga pagpanudlo, kundi ang ila gusto amo lang gid ang ila sundon. Magapangita sila sang mga manunudlo nga magatudlo sang mga butang nga gusto lang nila mabatian.”—2 Timoteo 4:3, Ang Pulong sang Dios.

5. Nagahunahuna ang mga miembro nga ang mga lider lamang ang may responsibilidad sa mga butang nga may kaangtanan sa pagsimba, kag ang mga miembro makadto lamang sa simbahan kada semana. Pero, dapat kabalak-an sang tagsa ka Cristiano ang iya personal nga kaangtanan sa Dios kag dapat nga ang tanan magtuon sing maayo sa Biblia.—Mateo 4:4; 5:3.

6. Kon ang mga miembro wala sing nahibaluan sa Biblia, madali lang sila mapatalang sang ila mga lider ukon hingalitan pa gani. Ang matuod, madamo na nga halimbawa sini nga mga pag-abuso ang natabo sa maragtas. *—Binuhatan 20:29, 30.

Ginasunod gid sing maayo sang mga Saksi ni Jehova ang mga ginsiling sang Biblia, amo nga wala sila sing mga lider, kundi may mga manugbantay sila kag mga manunudlo nga wala ginabayaran kag kinabubut-on nga nagabulig sa katawhan sang Dios. Ngaa indi mo pagtilawan nga magkadto sa ila Kingdom Hall sa inyo lugar?

[Mga Nota]

NAMANGKOT KA BALA?

▪ Paano dapat tamdon sang mga alagad sang Dios ang isa kag isa?—Mateo 23:8.

▪ Ano ang dapat himuon sang Cristiano nga mga lalaki para makaalagad sila subong manugtatap sang kongregasyon?—1 Timoteo 3:1-7.

▪ Ngaa wala ginapakamaayo sang Dios ang kahimusan sang pila ka relihion nga mas mataas ang ila lider sangsa ila mga miembro?—1 Corinto 4:6.

[Blurb sa pahina 23]

Indi pareho sang mga lider sang relihion, ginkabig ni Jesus ang iya kaugalingon nga “kubos”