Ginadaug sang Gugma ang Diskriminasyon

“Isa ka bag-o nga relihion ang nakilala sa una nga tion sa maragtas: indi ini isa ka grupo nga nagakabig sa nasyonalismo subong relihion, kundi isa ini ka boluntaryo nga grupo, diin ang tindog sa komunidad, rasa kag pungsod wala na ginapasulabi: lalaki man ukon babayi, magkaupod sila nga nagapalapit sa Dios.”—A History of Christianity, ni Paul Johnson.

SAMTANG nagalapnag ang matuod nga Cristianismo sa bug-os nga Emperyo sang Roma, nakakita ang mga tawo sang isa ka tumalagsahon nga butang—isa ka internasyonal nga pamilya nga nagasimba sa Dios kag nagakabuhi nga may paghidait kag paghiusa. Ang sekreto sang paghidait sini nga “pamilya” amo ang matuod nga gugma, nga nabase indi lamang sa emosyon, kundi sa mga prinsipio nga gintudlo sang Dios.

Ini nga mga prinsipio gintudlo kag ginkabuhi ni Jesucristo, nga nangin biktima mismo sang pagdumot kag mapintas nga diskriminasyon. (1 Pedro 2:21-23) Si Jesus taga-Galilea, kag ang kalabanan sa sini nga lugar mga mangunguma kag mangingisda nga gintamay sang Judiyong mga lider sa Jerusalem. (Juan 7:45-52) Si Jesus maayo gid nga manunudlo nga ginhigugma kag gintahod sang ordinaryo nga mga tawo. Bangod sini, nahisa gid sa iya ang relihioso nga mga lider amo nga nagpalapta sila sing kabutigan parte sa iya kag nagplano pa gani nga patyon sia!—Marcos 15:9, 10; Juan 9:16, 22; 11:45-53.

Apang, si Jesus wala “magbalos sang malaut sa malaut.” (Roma 12:17) Halimbawa, sang ang pila ka Fariseo, nga mga miembro sang isa ka Judiyo nga sekta nga nagpamatok kay Jesus, nagpalapit sa iya kag nagpamangkot, mainayuhon sia nga nagsabat sa ila. (Juan 3:1-21) Nagkaon pa sia gani upod sa mga Fariseo, lakip na sa isa nga nagpakita sing negatibo nga pagtamod sa iya. Paano? Sadto nga tion, kinabatasan na nga hugasan ang tiil sang bisita; apang wala ini ginhimo sang Fariseo kay Jesus. Naakig bala si Jesus? Wala. Ang matuod, yadto nga kahigayunan gingamit ni Jesus para magtudlo sing matahom nga leksion parte sa kaluoy kag pagpatawad.—Lucas 7:36-50; 11:37.

Ginhigugma ni Jesus ang mga Ginpakanubo

Ang isa sa bantog nga mga parabola ni Jesus amo ang mabinuligon nga Samaritano. Ini nga Samaritano naggasto sang iya kaugalingon nga kuarta para maatipan ang isa ka Judiyo nga ginsakit kag ginkawatan. (Lucas 10:30-37) Ngaa masiling naton nga tumalagsahon gid ang ginhimo sang Samaritano? Ang matuod, ang mga Judiyo kag mga Samaritano nagailinaway. Ang termino nga “Samaritano” amo ang bansag sang mga Judiyo sa mga tawo nga ginapakanubo nila. Gintawag man nila gani si Jesus nga “Samaritano.” (Juan 8:48) Bangod sa sini nga sitwasyon, tuman gid ka epektibo ang ilustrasyon nga gingamit ni Jesus agod itudlo kon paano dapat ipakita ang wala sing pinasulabi nga gugma sa isigkatawo.

Si Jesus wala lamang naghambal kundi nagpakita sia sing maayo nga halimbawa. Gin-ayo niya ang  isa ka aruon nga Samaritano. (Lucas 17:11-19) Dugang pa, gintudluan niya ang mainapresyahon nga mga Samaritano, kag nagpakigsugilanon pa gani sia sing malawig sa isa ka Samaritana, nga indi kinaandan nga ginahimo sadto. (Juan 4:7-30, 39-42) Ngaa? Sadto, ang estrikto nga Judiyo nga mga rabbi indi gid makigsugilanon sa bisan sin-o nga babayi sa publiko, bisan pa gani sa ila suod nga himata, kag pat-od nga indi gid sila makigsugilanon sa isa ka Samaritana!

Apang, paano bala ginatamod sang Dios ang isa ka tawo nga may negatibo nga pagtamod sa isa ka grupo pero nagapanikasog nga dulaon ini sa iya tagipusuon? Sa liwat, ang Biblia nagahatag sa aton sing makapalig-on nga sabat.

Ang Dios Mapinasensiahon sa Aton

Sang unang siglo, madamo nga Judiyong Cristiano ang naimpluwensiahan sang primero sang madugay na nga negatibo nga pagtamod sa mga indi Judiyo, pero madamo sa ila ang nangin mga tumuluo. Ano ang ginhimo ni Jehova agod matapna ini nga problema? Mapinasensiahon niya nga gintudluan ang Cristianong kongregasyon. (Binuhatan 15:1-5) Maayo ang nangin resulta sini nga pagpasensia, kay subong sang ginsambit sa umpisa sining artikulo, “ang tindog sa komunidad, rasa kag pungsod wala na ginapasulabi.” Subong resulta, “ang mga kongregasyon padayon gid nga naglig-on sa pagtuo kag nagdugang sa kadamuon adlaw-adlaw.”—Binuhatan 16:5.

Ano ang leksion sini? Indi mangampo, kundi magpadayon sa pagsalig sa Dios, nga maalwan nga nagahatag sing kaalam kag moral nga kabakod sa mga tawo nga ‘padayon nga nagapangayo nga may pagtuo.’ (Santiago 1:5, 6) Nadumduman mo sanday Jennifer, Timothy, John, kag Olga nga ginsambit sa una nga artikulo? Hayskul pa lang si Jennifer, madamo na sia sing nahibaluan nga diosnon nga mga prinsipio kag nakahibalo na sia mag-atubang sa mga pagpang-insulto sa iya rasa kag sa mga komento nga mabatian niya parte sa iya kanubuon. Sang ulihi, sang ang iban naman nga babayi ang gin-insulto sang iya mga klasmeyt, ginpangapinan sia kag ginpalig-on ni Jennifer.

Ano ang nagbulig kay Timothy nga makontrol ang iya kaakig sang ginpakanubo sang iban nga estudyante ang iya rasa? Nagsiling sia: “Nabalaka ako nga basi makahatag ako sing kahuy-anan sa ngalan ni Jehova nga Dios. Ginadumdom ko gid nga dapat ko ‘padayon nga daugon ang malaut paagi sa maayo’ kag indi kita dapat magpadaug sa malaut.”—Roma 12:21.

Sa bahin ni John, nadula niya ang negatibo nga pagtamod sa iya Hausa nga klasmeyt. “Sang tin-edyer na ako,” hinumdom niya, “may nakilala ako nga pila ka Hausa nga estudyante nga nangin abyan ko. Sang nakaupod ko ang isa sa ila sa paghimo sang asaynment, maayo gid ang amon pagtamdanay. Sugod sadto, ginatan-aw ko na ang mga tawo subong indibiduwal, indi na subong bahin sang isa ka rasa ukon tribo.”

 Si Olga kag ang kaupod niya nga misyonera wala nahadlok sang ginhingabot sila sang akig nga mga manugpamatok, kag nagpabilin sila nga mabakod kag nagsalig nga batunon sang pila ka tawo ang mensahe sang Biblia. Madamo gid ang nagbaton. “Pagligad sang mga singkwenta ka tuig,” siling ni Olga, “may isa ka tawo nga nagpalapit sa akon kag naghatag sang isa ka matahom nga bag. Sa sulod sini may gagmay nga mga bato nga nasulatan sang Cristianong mga kinaiya subong sang pagkamaayo, kaayo, gugma, kag paghidait. Dayon ginsugiran niya ako nga isa sia sa mga lalaki nga nagbató sa akon, kag karon Cristianong utod ko na sia. Luwas sa bag nga may unod nga mga bato, ginhatagan man nila ako sang iya asawa sang duha ka dosena nga puti nga rosas.”

Ang Tion nga Wala na sing Pagpasulabi kag Diskriminasyon!

Sa indi madugay, wala na sing pagpasulabi kag diskriminasyon. Paano? Mangin isa na lang ang Gumalahom sa duta. Sia amo si Jesucristo, kag ipakita niya nga “indi sia maghukom sono sa panolok sang iya mga mata.” (Isaias 11:1-5) Dugang pa, ang mga sakop ni Jesus sa duta magailog sa iya mga panimuot, kay ang tanan tudluan niya kag sang iya Amay nga si Jehova nga Dios.—Isaias 11:9.

Inang espirituwal nga edukasyon ginahimo na sa karon, kag ginahanda sini ang mga tawo para sa kabuhi sa isa ka bag-o nga kahimtangan sang kalibutan. Gani, ngaa indi mo pagpanginpuslan inang libre nga edukasyon paagi sa pagtuon sa Biblia? * Huo, ang Dios wala sing pinasulabi; kabubut-on niya nga ang tanan nga sahi sang tawo “maluwas kag makadangat sa sibu nga ihibalo tuhoy sa kamatuoran.”—1 Timoteo 2:3, 4.

[Nota]

[Blurb sa pahina 8]

Sa indi madugay ang pagpasulabi kag diskriminasyon indi na maghatag sing problema sa katawhan

[Kahon/Retrato sa pahina 8, 9]

DIOSNON NGA MGA PRINSIPIO NGA DAPAT SUNDON

▪ “Indi magbalos sang malaut sa malaut kay bisan sin-o.... Padayon nga dauga ang malaut paagi sa maayo.” (Roma 12:17-21) Ano ang matun-an naton sa sini? Bisan malain ang himuon sang iban sa aton, dapat maayo gihapon ang aton himuon sa ila. “Gindumtan nila ako nga wala sing kabangdanan,” siling ni Jesucristo. Pero, wala nagbalos si Jesus sa ila.—Juan 15:25.

▪ “Indi kita sobra nga magpaimportante sang kaugalingon, ... nga nagahinisaay sa isa kag isa.” (Galacia 5:26) Ang kahisa kag indi nagakaigo nga bugal makapaluya sang aton kaangtanan sa Dios, nga masami nagaresulta sa pagdumot kag pagpakanubo sa iban.—Marcos 7:20-23.

▪ “Ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila.” (Mateo 7:12) Pamangkuta ang imo kaugalingon, ‘Ano ang gusto ko nga pagtratar sang iban sa akon?’ Pakig-anguti ang mga tawo sing alalangay, bisan ano man ang ila edad, kolor sang panit, lenguahe, ukon kultura.

▪ “Batuna ninyo ang isa kag isa, subong nga ginbaton man kita ni Cristo.” (Roma 15:7) Ginatinguhaan mo bala nga makilala ang mga tawo nga may lainlain nga ginhalinan kag kultura, ilabi na kon pareho kamo nga nagaalagad sa Dios?—2 Corinto 6:11.

▪ “Kon magbiya sa akon ang akon amay kag akon iloy, niyan ang GINOO magasapopo sa akon.” (Salmo 27:10) Bisan ano man ang pagtratar sang iban sa imo, indi ka pagbiyaan sang Dios kon magpabilin ka nga mainunungon sa iya.

[Retrato sa pahina 7]

Ginbuligan sang isa ka Samaritano ang isa ka Judiyo nga ginkawatan