Ginakabig nga daw Wala sing Pulos

“Sang Grade 1 ako sa Espanya, ginbansagan ako sang iban nga kabataan sa amon klase sing malaw-ay nga mga ngalan, kay putot ako. Halos kada adlaw nagahilibion ako pauli.”—Jennifer, bata sang Filipino nga nagsaylo sa Espanya.

“Sang nagsaylo ako sa iban nga eskwelahan, ginyamuhat ako sang kano nga mga estudyante. Nahibal-an ko nga ginagaritgarit lang nila ako para magbalos ako sa ila. Pero nagpabilin lang ako nga kalmado bisan pa nasakitan ako sa ila pagsimusimo sa akon.”—Timothy, isa ka Aprikano-Amerikano.

“Sang pito ka tuig pa lang ako, ang mga Igbo kag Hausa sa Nigeria nag-ilinaway. Ini nga inaway may epekto gid sa akon, amo nga ginkutawkutaw ko ang isa ka Hausa nga bata nga lalaki sa amon klase, bisan pa amigohay kami anay.”—John, isa ka Igbo.

“Sang ginasugid namon sang akon kaupod nga misyonera ang mensahe sang Biblia sa amon mga kaingod, ginsundan kami sang mga bata kag ginbató sa sugyot sang mga pari. Gusto sang mga pari nga maghalin kami sa sini nga lugar.”—Olga.

NAEKSPERIENSIAHAN mo na bala nga ginpakanubo ka—ayhan bangod sa kolor sang imo panit, relihion, kahimtangan sa kabuhi, ukon edad? Ang mga tawo nga pirme ginapakanubo masami nga nagabatyag sing kahadlok kay basi pakalainon pa gid sila. Kon mag-upod sila sa madamo nga tawo, magkadto sa mga tiendahan, magsaylo sing eskwelahan, ukon magtambong sa isa ka pagtilipon, nagakabalaka sila nga basi yamuhaton sila.

Dugang pa, ang mga biktima sang diskriminasyon mahimo mabudlayan sa pagpangita sing trabaho, ukon indi sila makabaton sing de-kalidad nga pagbulong, edukasyon, kag diutay lang ang ila mga bentaha kag kinamatarong sa komunidad. Kon ang opisyal mismo ang magasuportar sa diskriminasyon, mahimo ini magresulta sa malain katama nga buhat pareho sang pagpapas sa isa ka rasa. Ang isa ka halimbawa sang plano nga pagpapas sa isa ka rasa mabasa sa Biblia sa tulun-an sang Ester. Talupangda ang papel sang dumot kag pagpakanubo sa sini nga kasaysayan.—Ester 3:5, 6.

Ang pagkapanatiko mahimo gihapon magpadayon bisan pa may mga kasuguan batok sa diskriminasyon. Ang anay United Nations High Commissioner for Human Rights nagsiling: “Anom ka dekada sa tapos ginpatuman ang Universal Declaration of Human Rights . . . , ang prinsipio sang pag-alalangay kag pagtapna sing diskriminasyon wala gihapon matigayon.” Nangin problema ini kay madamo sing mga imigrante kag mga refugee ang nagasaylo sa iban nga mga lugar.

Gani, ang pag-alalangay bala sa komunidad damgo lamang? Madula pa ayhan ang diskriminasyon? Ang masunod nga mga artikulo magasabat sa sini nga mga pamangkot.