Halin sa Amon mga Bumalasa

Pamangkot sang mga Pamatan-on . . . Malain Gid Bala ang Pagpamuyayaw? (Marso 2008) Ginpadaku ako sa Cristiano nga pamilya, pero naimpluwensiahan ako sang iban nga mamuyayaw. Pila ka beses ko ini nga gintinguhaan nga untaton, pero nagapamuyayaw man ako gihapon. Ini nga artikulo nakabulig sa akon nga kontrolon ang akon kaugalingon. Pareho sang ginsambit sa artikulo, indi ko gusto nga abusuhan ang akon ikasarang sa paghambal. Gani subong, nagapamensar ako anay sing maayo antes ako maghambal. Madamo gid nga salamat.

C. P., Brazil

Dose anyos ako. Madamo gid ang nagapamuyayaw sa amon eskwelahan, kag nahadlok ako nga basi sa pila ka adlaw mamuyayaw man ako. Masulat ako kuntani nga kon puede mapagua ini nga topiko sa artikulo nga “Pamangkot sang mga Pamatan-on.” Pero wala pa ako makasulat, nakibot ako kay ini nga topiko naggua dayon sa Magmata! Ginpahanumdom ako sini nga artikulo kon ngaa malain ang pagpamuyayaw, kag nabuligan ako nga likawan ini nga batasan. Padayuna ninyo ang pagsulat sang pareho sini nga mga artikulo!

A. P., Estados Unidos

Pagpaninlo sang mga balay ang obra namon sang akon bana, kag ang isa ka tag-iya sang balay nagsiling sa amon nga ang iya “new year’s resolution” amo nga untatan na niya ang pagpamuyayaw. Nagsiling sia nga nagapangamuyo sia kada adlaw, nga nagapangabay sa Dios nga buligan sia nga mauntat ining malain niya nga batasan. Nangayo man sia sa akon sing bisan ano nga balasahon parte sa pagpamuyayaw. Ginpangamuyo ko ini kag dayon gin-download ko sa akon MP3 player ang pinakabag-o nga gua sang magasin halin sa Web site nga www.pr418.com. Pagkaaga nalipay gid ako sang nabatian ko ang mga impormasyon sa akon gin-download. Excited na ako katama! Bisan pa ini nga artikulo ginsulat para sa mga pamatan-on, nahibaluan ko nga makakuha sia diri sing mapuslanon nga mga laygay. Daw indi na ako makahulat nga ipabati ini sa iya.

S. C., Estados Unidos

Pagkontrol sang Trapiko sa Kahawaan —Paano Ini Nagaamlig sa Imo? (Abril 2008) “Wala na ako nahadlok magsakay sa eroplano!” amo ini ang nasiling ko sa tapos ko mabasa ini nga artikulo. Napalig-on ako kag napahamtang ang akon buot sang nabasa ko sa Magmata! ang ginahimo sang mga nagakontrol sang pagbiyahe sang eroplano para mapalayo sa katalagman ang pagbiyahe. Salamat gid.

T. S., Brazil

Ano ang Imo Sabat? Dose anyos ako kag nagaistar sa nabagatnan nga Ireland. Gusto ko kamo pasalamatan bangod sa mga pamangkot para sa mga kabataan sa likod sang Magmata! Maayo gid ini nga ideya kay makabenepisyo sa sini ang mga kabataan. Palihug padayuna ninyo ini. Salamat liwat.

A. C., Ireland