Pamangkot sang mga Pamatan-on

Paano Ako Makaistorya sa Akon mga Ginikanan?

“Gintinguhaan ko gid nga isugid sa akon mga ginikanan ang akon ginabatyag, pero wala ko ini mahambal sing maayo kag ginpahipos nila ako. Nagtipon gid ako sing kaisog para makaistorya sa ila, pero napaslawan lang ako!”—Rosa. *

SANG gamay ka pa, mahimo nga sa imo ka gid mga ginikanan nagapangayo sing laygay. Ginasugid mo sa ila ang tanan, importante man ini ukon witiwiti lang. Mahambal mo sa ila ang bisan ano nga ginahunahuna ukon ginabatyag mo, kag nagasalig ka gid sa ila ginalaygay sa imo.

Pero subong, mahimo nagabatyag ka nga daw wala ka na nila naintiendihan. “Isa ka bes, samtang nagapanyapon kami, naghibi ako kag ginsugid ko sa ila ang akon ginabatyag,” siling sang isa ka babayi nga si Edie. “Namati man ang akon mga ginikanan, pero pamatyag ko wala gid nila ako maintiendihan.” “Gani, nagsulod na lang ako sa akon kuarto kag naghibi pa gid!”

Sa pihak nga bahin, mahimo may mga tion nga indi mo gusto mag-istorya sa imo mga ginikanan. “Madamo ako sing ginasugid sa akon mga ginikanan,” siling ni Christopher. “Pero indi ko man gusto nga mahibaluan nila ang tanan parte sa akon.”

Sala bala kon may mga butang nga indi mo gusto isugid? Indi man, basta indi ka lang magbinutig. (Hulubaton 3:32) Bisan pa daw wala ka maintiendihan sang imo ginikanan ukon may mga butang nga indi mo gusto isugid sa ila, importante gid nga mag-istorya ka sa ila kag kinahanglan nga mahibaluan nila ang imo ginabatyag.

Padayuna Lang ang Paghambal

Sa pila ka paagi, ang pagpakighambal sa imo mga ginikanan pareho sa pagmaneho sing salakyan. Kon may nagabalabag sa imo alagyan, siempre mangita ka sing iban nga dalan. Binagbinaga ang pila ka halimbawa.

 Balagbag #1: Gusto mo nga mag-istorya, pero daw wala man nagapamati ang imo mga ginikanan. “Nabudlayan ako mag-istorya kay Tatay,” siling ni Leah. “Kon kaisa, ginaistorya ko sia kag dayon dugaydugay masiling sia, ‘Ha, ano gani ‘to ang ginhambal mo?’”

PAMANGKOT: Ano ang himuon ni Leah kon kinahanglan gid niya isugid ang iya problema? May tatlo sia ka opsyon.

Opsyon A

Singgitan niya si Tatay niya. Mahimo sia magsiling: “Pamatii ko bala anay kay importante ini!”

Opsyon B

Indi na lang niya pag-istoryahon si Tatay niya. Mahimo nga indi na lang pag-isugid ni Leah ang iya problema sa iya mga ginikanan.

Opsyon C

Hulaton niya ang mas maayo nga tion kag isugid liwat ang iya problema. Puede niya istoryahon sing personal ang iya amay ukon sulatan niya ini parte sa iya problema

Sa banta mo, ano ang opsyon ang pilion ni Leah? ․․․․․

Usisaon naton ang tagsa ka opsyon kag tan-awon kon ano ang mahimo nga resulta sini. Madamo sing ginapamensar ang amay ni Leah kag wala ini makatalupangod sang problema ni Leah. Gani kon pilion ni Leah ang Opsyon A, mahimo nga indi maintiendihan sang iya amay kon ngaa nagapaninggit sia. Indi man ini makabulig para pamatian sia ni Tatay niya kag nagapakita ini nga wala niya ginatahod kag ginapadunggan ang iya ginikanan. (Efeso 6:2) Ang matuod, ini nga opsyon wala gid sing maayo nga resulta.

Ang Opsyon B mahimo amo ang pinakamahapos, pero indi ang pinakamaayo nga himuon. Ngaa? Bangod “kon indi ka magpangayo sang laygay parte sa imo mga plano, indi ka magmadinalag-on, pero kon magpangayo ka sang madamo nga mga laygay, magmadinalag-on ang imo mga plano.” (Hulubaton 15:22, Ang Pulong sang Dios) Agod masolbar ni Leah ang iya problema dapat niya ini isugid sa iya mga ginikanan para mahibaluan nila kon ano ang nagakatabo sa iya kabuhi. Indi mabuligan si Leah kon maghipos na lang sia.

Sa Opsyon C naman, bisan wala ni Leah maistorya ang iya tatay, nangita sia sing iban nga paagi. Gintinguhaan niya nga maistorya ini liwat sa iban nga tion. Kag kon pilion niya nga sulatan na lang ang iya amay, mahimo nga maumpawan gilayon si Leah. Ang paghimo sing sulat makabulig sa iya nga maplastar sing maayo ang iya gusto isiling sa iya amay kon nagapamati ini. Kon basahon sang amay ni Leah ang iya sulat, mahibaluan niya ang gusto isugid ni Leah kag mabuligan ang iya amay nga mas mahangpan ang iya problema. Gani mas maayo para kay Leah kag sa iya amay ang opsyon C.

Ano pa ang iban nga opsyon nga puede himuon ni Leah? Kon may madumduman ka pa, isulat ini sa ubos. Dayon isulat man kon ano ang resulta sini nga opsyon.

․․․․․

 Balagbag #2: Gusto ka istoryahon sang imo mga ginikanan, pero wala ka gana mag-istorya sa ila. “Makaulugot gid kon kapoy ka halin sa eskwelahan kag magsagi sila ka pamangkot,” siling ni Sarah. “Indi ko gusto nga istoryahan ang parte sa eskwelahan, pero pag-abot ko gid mamangkot dayon sila: ‘Kamusta ang imo adlaw? May problema bala?’” Sigurado nga maayo gid ang intension sang ginikanan ni Sarah kon ngaa ginapamangkot nila sia. Pero, nagsiling sia, “Natak-an gid ako nga istoryahan ang parte sa eskwelahan kon kapoy gid ako kag gina-stress.”

PAMANGKOT: Ano ang maayo nga himuon ni Sarah sa sini nga sitwasyon? Pareho sa nauna nga halimbawa, may tatlo sia ka opsyon

Opsyon A

Indi mag-istorya. Mahimo isiling niya: “Pabay-i lang bala ninyo ako. Indi ko gusto mag-istorya subong!”

Opsyon B

Maistorya. Maistorya si Sarah, pero bangod kapoy sia mahimo nga pasung-ol ang iya sabat sa iya mga ginikanan.

Opsyon C

Indi nila anay pag-istoryahan ang parte sa eskwelahan, pero maistoryahanay sila parte sa iban nga butang. Mahimo isiling ni Sarah nga istoryahan ugaling nila ang parte sa eskwelahan kon maayo na ang iya modo. Dayon, sinsero sia nga magsiling:“Kamusta ’ya ang adlaw ninyo?”

Sa banta mo, ano nga opsyon ang pilion ni Sarah?․․․․․

Sa liwat, usisaon naton ang tagsa ka opsyon kag tan-awon kon ano ang mahimo nga resulta sini.

Antes ginpili ni Sarah ang Opsyon A, gina-stress gid sia kag wala gana mag-istorya. Sang ginpili niya ini nga opsyon, gina-stress man sia gihapon kag ginakonsiensia kay ginsinggitan niya ang iya mga ginikanan.—Hulubaton 29:11.

Sa pihak nga bahin, mahimo nga maakig ang mga ginikanan ni Sarah kon maninggit sia, ukon kon maghipos sia dayon. Basi magsuspetsa sila nga may ginatago sia sa ila. Gani, piliton nila sia nga manugid kag labi pa gid ini nga magapaakig kay Sarah. Kon amo sini ang matabo, indi maayo ang resulta sini nga opsyon.

Maathag nga mas maayo ang Opsyon B sangsa Opsyon A. Bisan paano, magahambalanay sanday Sarah kag ang iya mga ginikanan. Pero bangod napilitan lang sila, mahimo nga indi relaks kag indi maayo ang ila pag-istoryahanay.

Kon pilion nila ang Opsyon C, magatawhay ang pamatyag ni Sarah kay indi lang anay nila pag-istoryahan ang natabo sa iya eskwelahan. Malipay pa ang iya mga ginikanan kay makita nila nga ginatinguhaan man ni Sarah nga makig-istorya sa ila. Ini nga opsyon mahimo nga amo ang may pinakamaayo nga resulta kay pareho nila nga ginasunod ang prinsipio sa Filipos 2:4, nga nagasiling: “Indi lang ang inyo kaayuhan ang inyo hunahunaon kundi ang kaayuhan man sang iban.”—APD.

Ang dugang pa nga artikulo sang “Young People Ask” masapwan sa Web site nga www.watchtower.org/ype

[Nota]

BINAGBINAGA INI

▪ Paano makabulig ang husto nga tayming sa maayo nga komunikasyon?—Hulubaton 25:11.

▪ Ngaa maayo gid ang resulta kon makig-istorya ka sa imo mga ginikanan?—Job 12:12.

[Kahon/Retrato sa pahina 18

LAIN BALA ANG ILA PAG-INTIENDE?]

Nabudlayan ka bala mag-istorya sa imo mga ginikanan? Posible nga lain ang ila pag-intiende sa imo ginasiling.

Kon magsiling ka . . .

“Indi ko gusto nga istoryahan ina nga butang.”

Ang pag-intiende sang imo ginikanan . . .

“Ginasugid ko sa akon mga abyan ang tanan ko nga ginapensar kag ginabatyag, pero indi ko ini pag-isugid sa inyo kay indi man kamo importante sa akon.”

Kon magsiling ka . . .

“Indi ninyo ako mahangpan.”

Ang pag-intiende sang imo ginikanan . . .

“Tigulang na kamo kag lain na ang panahon subong. Pabay-i na lang ninyo ako kay indi man ninyo gihapon ako mahangpan.”

 [Kahon/Retrato sa pahina 21]

ANG GINASILING SANG IBAN NGA PAMATAN-ON

“Ginsugid ko sa akon mga ginikanan ang akon problema sa eskwelahan, kag nakibot gid ako kay namati sila sing maayo. Nasolbar ko dayon ang problema sa bulig nila!”—Natalie.

“Indi pirme mahapos ang pag-istorya sa imo mga ginikanan, pero kon maistorya mo na sila, daw nagabutan ka lang sing tunok.” —Devenye.

[Kahon sa pahina 21]

PATALUPANGOD SA MGA GINIKANAN

Subong isa ka ginikanan, mahimo ginapensar mo kon bala nabudlayan ang imo kabataan nga mag-istorya sa imo. Binagbinaga ang ginsiling sang iban nga pamatan-on sa Magmata! kon ngaa wala sila nagaistorya sa ila mga ginikanan. Dayon, ipamangkot sa imo kaugalingon ang nagasunod nga mga pamangkot kag basaha ang ginlakip nga mga bersikulo sa Biblia.

“Nabudlayan ako mag-istorya kay Tatay kay kadamo sang iya alatenderon sa trabaho kag sa kongregasyon. Daw wala gid sing bakante nga tion nga puede ko sia maistorya.”—Andrew.

‘Grabe gid bala ako kasako amo nga abi sang akon kabataan wala na ako sing tion nga mag-istorya sa ila? Kon amo, ano ang himuon ko para manamian sila mag-istorya sa akon? Ano nga oras ang puede ko ihatag sa akon kabataan para maistorya ko sila?’—Deuteronomio 6:7.

“Nag-istorya ako kay Nanay nga nagahilibion bangod sa akon problema sa eskwelahan. Gusto ko tani nga uluuluhan niya ako, pero gin-akigan pa niya ako. Sugod sadto, bisan importante pa ang akon inugsugid, wala ko na ini ginaistorya sa iya.”—Kenji.

‘Ano bala ang akon reaksion kon gusto ako istoryahon sang akon kabataan parte sa ila problema? Bisan pa nga dapat sila sawayon, puede bala nga pamatian ko anay sila sing maayo antes ko sila laygayan?’—Santiago 1:19.

“Bisan pa ginahambal sang mga ginikanan nga puede namon sila maistorya kag indi sila mangakig, nagapangakig sila gihapon. Amo nga pamatyag sang mga pamatan-on indi nila masaligan ang ila mga ginikanan.”—Rachel.

‘Kon makapaakig sa akon ang ginasugid sang akon bata, paano ko mapunggan ang akon kaakig?’—Hulubaton 10:19.

“Kon may isugid gani ako nga sekreto kay Nanay, ginapanugid niya ini pirme sa iya mga abyan. Ano pa, wala na ako sing salig sa iya.”—Chantelle.

‘Agod ipakita nga may konsiderasyon ako sa balatyagon sang akon bata, wala ko bala ginapanugid ang mga sekreto nga ginasugid niya sa akon?’—Hulubaton 25:9.

“Madamo ako sing gusto iistorya sa akon mga ginikanan. Gusto ko tani nga sila ang mag-una istorya sa akon.”—Courtney.

‘Puede bala nga ako ang mag-una istorya sa akon bata? San-o ang pinakamaayo nga tion para makaistoryahanay kami?’—Manugwali 3:7.

[Retrato sa pahina 19]

Kon may nagabalabag sa imo alagyan, makapangita ka sing iban nga dalan—makapangita ka man sing paagi nga maistorya ang imo ginikanan!