Pamangkot sang mga Pamatan-on

Ngaa Wala Naluyag sa Akon ang mga Lalaki?

Bal-an niya nga kilala gid ako, kay ginsugiran ko sia nga damo ang naluyag sa akon. Naham-ot man sia sang nagsiling ako nga walawala gid ang iban ko nga amiga. Kag kahibalo sia nga maalam ako, kay ginkoreksionan ko ang iban niya nga ginhambal. San-o niya ko ‘ni hagaron nga magdeyt man?

Guapa man sia, pero daw wala pulos istoryahon! Daw indi ko kasal-ot kon mag-istorya sia. Kag kon ako na gani ang mag-istorya, ginakoreksionan n’ya ako. Kon makita ko sia gani, nagalikaw ako dayon.

NAGABATYAG ka bala nga wala nanamian ang mga lalaki sa imo? Amo sini ang pamatyag sang madamo nga babayi, pati na sang mga babayi nga abi mo wala na nagaproblema parte sini. Halimbawa, si Joanne guapa man, maalam, kag manami maghambal. Pero nagsiling sia: “Pamatyag ko wala nanamian sa akon ang mga lalaki. Ang iban nga gusto ko interesado man sa akon sang primero, pero sang ulihi indi na sila sa akon!”

Ano ang nagustuhan sang mga lalaki sa isa ka babayi? Ano ang indi nila gusto? Ano ang puede mo himuon para matalupangdan ka sang isa ka maayo nga lalaki nga wala mo ginapakanubo ang imo kaugalingon?

Ang Dapat Mo Himuon

● Hibalua ang imo gusto. Mahimo nga nagbaskog ang imo gusto sa mga lalaki sang nagdinalaga ka na. Ayhan indi lang isa ka lalaki ang imo gusto. Normal lang ina. Pero kon sabton mo dayon ang una nga lalaki nga nagpapitik sang imo dughan, mahimo nga indi maayo ang epekto sini sa imo emosyon kag sa imo relasyon sa Dios. Nagakinahanglan sing tion agod matigayon mo ang maayo nga mga kinaiya, agod ‘magbag-o ang imo hunahuna’ ukon pagtamod parte sa importante nga mga butang, kag agod malab-ot mo ang imo mga tulumuron.—Roma 12:2; 1 Corinto 7:36; Colosas 3:9, 10.

Matuod, madamo nga lalaki ang naluyag sa mga babayi nga daw wala pa sing panindugan ukon wala pa sing buot. Ini nga mga lalaki interesado lamang sa lawas sang babayi, indi sa kon sin-o gid sia. Pero ang isa ka maayo nga lalaki magapangita sing babayi nga may mga kinaiya nga makabulig sa isa ka relasyon.—Mateo 19:6.

 Ang ginasiling sang mga lalaki: “Nanamian ako sa isa ka babayi kon may kaugalingon sia nga opinyon kag kon makita ko nga may panindugan sia.”—James.

“Nagadayaw ako sa isa ka babayi nga makahambal sing tampad, matinahuron, kag wala lang basta nagapasugot sa tanan ko nga ginasiling. Bisan pa guapa sia, indi ako komportable kon puro lang maayo ang iya ginahambal parte sa akon. Nalainan gid ako sa sina!”—Darren.

“Ginabaton ko nga gusto ko gid ang mga guapa. Ugaling, na-turn-off ako dayon kon ang isa ka babayi wala sing sigurado kag mapuslanon nga mga tulumuron. Pero kon kahibalo sia kon ano ang iya gusto, ilabi na gid kon nalab-ot na niya ang iban niya nga tulumuron, para sa akon labi sia nga nagatahom.”—Damien.

● Respetuha ang iban. Subong nga gusto mo gid nga palanggaon, daku man ang handum sang mga lalaki nga respetuhon sila. Husto gid ang ginasiling sang Biblia sa mga bana nga dapat nila higugmaon ang ila asawa kag ang mga asawa naman dapat may “tudok nga pagtahod” sa ila bana. (Efeso 5:33) Parte sa sini, ginapakita sang isa ka surbe sa ginatos ka lamharon nga lalaki nga sobra sa 60 porsiento sa ila ang nagsiling nga mas importante sa ila nga respetuhon sangsa higugmaon. Amo man sini ang gusto sang sobra sa 70 porsiento sang may edad na nga mga lalaki.

Indi buot silingon nga pierde ka kon ginarespeto mo ang iban, nga wala ka na sing kinamatarong nga maghimo kag magpabutyag sang imo opinyon. (Genesis 21:10-12) Pero, makita sa imo paagi sang pagpabutyag sang imo opinyon kon bala manamian ukon maakig sa imo ang isa ka lalaki. Kon pirme mo ginakontra ukon ginakoreksionan ang iya ginasiling, mahimo magbatyag sia nga wala mo sia ginarespeto. Pero kon pamatian mo sia kag apresyahon ang maayo nga punto sa iya ginasiling, mahimo nga pamatian man niya kag pabaloran ang imo opinyon. Siempre, matalupangdan man sang isa ka maayo nga lalaki kon ginarespeto mo ang imo pamilya kag ang iban nga tawo. *

Ang ginasiling sang mga lalaki: “Gusto sang mga lalaki nga pabaloran ang ila opinyon, ilabi na gid sang babayi nga ila naluyagan.”—Anthony.

“Para sa akon, ang respeto amo ang pinakaimportante sa pagsugod sang isa ka relasyon. Magasunod na lang ugaling ang gugma.”—Adrian.

“Kon marespeto ako sang isa ka babayi, pamatyag ko mahigugma man niya ako.”—Mark.

● Magpamayo sing maugdang, kag mangin matinlo. Makita gid sa imo pamayo kag pamustura kon ano ang imo mga pagtamod kag mga kinaiya. Antes mo pa maistorya ang isa ka lalaki, madamo na sia sing makomento base sa imo ginasuksok. Kon maugdang kag naareglar sing maayo ang imo pamayo, mangin maayo ang pagtan-aw niya sa imo. (1 Timoteo 2:9) Pero kon seksi ini katama ukon baraghal, mangin indi man maayo ang iya pagtan-aw sa imo!

Ang ginasiling sang mga lalaki: “Makita gid sa pamayo sang isa ka babayi kon ano ang iya pagtamod sa kabuhi. Kon ang iya ginasuksok seksi katama ukon baraghal, pamatyag ko daw kulang sia sa atension.”—Adrian.

“Gusto ko ang babayi nga mahipid ang buhok, mahamot, kag malulo maghambal. Pero bisan pa naguapahan ako sa iya, nagaka-turn-off ako kon indi sia matinlo.”—Ryan.

“Nanamian gid ako sa babayi nga wala nagapalangdamol ang mek-ap kag wala nagasuksok sing pikit ukon wawa nga mga bayo para matalupangdan lang.”—Ethan.

“Kon ang ginasuksok sang isa ka babayi tam-an ka seksi, matalupangdan gid man sia. Pero indi sia ang sahi sang babayi nga gusto ko pangaluyagan.”—Nicholas.

Ang Indi Mo Dapat Himuon

● Indi magpa-flirt ukon magpakiat. May ikasarang gid ang mga babayi nga ganyaton ang mga lalaki. Ini nga ikasarang mahimo magamit sang mga  babayi sa maayo ukon sa malain. (Genesis 29:17, 18; Hulubaton 7:6-23) Kon testingan mo ini nga ikasarang sa tanan nga lalaki nga imo makilala, mahimo mabantugan ka nga flirt.

Ang ginasiling sang mga lalaki: “Ang mga lalaki nanamian gid magtupad sa guapa nga mga babayi kag bisan ang pagsag-iranay lang sang mga abaga makapukaw na sang ila balatyagon. Gani para sa akon, nagapa-flirt ang babayi kon pirme sia nagasag-idsag-id sa imo samtang nagaistoryahanay kamo.”—Nicholas.

“Kon ang babayi pirme gid nagapangita sing paagi nga matandog ang butkon sang tanan nga lalaki nga makilala niya ukon nagapasiplat sa tanan nga lalaki nga nagalabay, sa banta ko flirt sia, kag indi ko ina gusto.”—José.

“Para sa akon, flirt ang isa ka babayi kon ginatandog niya ang tanan nga lalaki nga makilala niya kag kon nagasaylo dayon ang iya interes sa kay bisan sin-o nga nagahatag sa iya sing daku nga atension.”—Ethan.

● Indi pagbantayi ukon pagkontrola ang tanan nga hulag sang lalaki. Ang Biblia nagsiling nga kon mag-asawa na ang lalaki kag babayi “mangin-isa sila ka unud.” (Genesis 2:24) Indi na nila mahimo ang tanan nila nga gusto pareho sang dalaga kag soltero pa sila kay may salabton na sila sa isa kag isa. (1 Corinto 7:32-34) Pero kon ginakilala mo pa lang ang isa ka lalaki, wala kamo nga duha sing kinamatarong nga bantayan ang hulag sang isa kag isa. Kon gusto mo nga ikaw lang pirme ang iya hatagan sing atension, mahimo nga gub-on lang sini ang inyo pag-abyanay. *

Ang ginasiling sang mga lalaki: “Para sa akon, sobra ka possessive ang isa ka babayi kon ginabantayan niya ang tanan ko nga hulag kag daw wala na sia sing iban nga mahimo kon wala ako.”—Darren.

“Indi gid maayo nga palatandaan kon pirme ako gina-text sang babayi nga bag-o ko pa lang makilala kag ginapamangkot ako kon sin-o ang akon upod, ilabi na kon sin-o ang babayi nga upod ko.”—Ryan.

“Wala gid ako nanamian sa isa ka babayi nga indi gusto nga mag-upod ako sa akon mga amigo kag nagapangakig kon indi mo sia pag-updon, kay ginapakita sini nga nagasalig lang sia sa imo.”—Adrian.

Hatagi sing Importansia ang Imo Kaugalingon

Mahimo may kilala ka nga mga babayi nga himuon nila ang tanan agod matalupangdan lang kag maluyagan sang mga lalaki. Ang iban mapasugot na lang sa bisan sin-o nga lalaki para lamang makanobyo ukon makapamana. Pero sa sini nga kahimtangan, mangin matuod gid ang prinsipio nga ‘anihon mo kon ano ang imo ginsab-ug.’ (Galacia 6:7-9) Kon ginabalewala mo lang ang imo kaugalingon kag ang mga prinsipio nga dapat mo sundon, mahimo nga matupa ka man sa mga lalaki nga magabalewala sa imo kag sa imo mga prinsipio.

Ang matuod, indi tanan nga lalaki maluyag sa imo, kag maayo gid kay amo sina! Pero kon ginaatipan mo sing maayo ang imo naggua kag nasulod nga katahom, ‘daku ang imo balor sa mga mata sang Dios’ kag magustuhan ka sang lalaki nga para gid sa imo.—1 Pedro 3:4.

Ang dugang pa nga mga artikulo sa serye sang “Young People Ask” makita sa Web site nga www.watchtower.org/ype

[Mga Nota]

BINAGBINAGA INI

● Paano mo mapakita nga ginarespeto mo ang opinyon kag balatyagon sang isa ka lalaki?

● Paano mo mapakita nga ginahatagan mo sing importansia ang imo kaugalingon?

[Retrato sa pahina 27]

Pareho sang duha ka ruweda sang bisikleta, ang gugma kag respeto importante gid