Pagbantay sa Kalibutan

“Ang mga Amerikano nagapati gihapon sa Dios, pero diutay na lang ang iya impluwensia sa pulitika kag kultura kon ikomparar sang una.”—NEWSWEEK, U.S.A.

“Ang pag-usmod sang ekonomiya may bag-o nga mga biktima: Ang mga mag-asawa nga wala sing inuggasto para sa diborsio. Sa sining tion sang kapigaduhon, madamo nga mag-asawa ang wala nagabulagay bisan pa indi na nila maagwanta ang isa kag isa.”—THE WALL STREET JOURNAL, U.S.A.

Sa kada tatlo ka iloy nga ginpamangkot sa Germany, isa sa ila ang nagsiling nga nakatuon sia sa iya bata nga babayi parte sa pamayo, pag-abyanay, kon paano mangin kalmado, ukon kon paano matigayon ang kompiansa.—BERLINER MORGENPOST, GERMANY.

May mga Antibody Gihapon

“Bisan pa nga siam na ka dekada nga natapna ang pinakamakamamatay nga sahi sang trangkaso, ara gihapon sa dugo sang mga nag-ayo sa sini ang antibody nga makabato sa sini nga balatian nga naglapnag sang 1918, kag ginapakita sini ang ikasarang sang lawas sang tawo sa pagbato sa balatian,” siling sang International Herald Tribune. Sang gin-usisa ang dugo sang mga tigulang nga nag-ayo sa trangkaso-Espanyola, nasapwan sang mga sientipiko nga “may mga antibody gihapon sa ila lawas nga padayon nga nagapangita sini nga kagaw agod tapnaon ini.” Ang mga researcher nakahimo pa gani sing bulong halin sa sini nga mga antibody nga amo ang nagpaayo sa mga ilaga nga gin-indyeksionan sini nga trangkaso. Nagdayaw gid sila sa sini nga ikasarang sang aton lawas. “Ginbugayan kita sang Dios sang mga antibody nga magaamlig sa aton samtang nagakabuhi kita!” siling sang isa ka researcher. “Kon malampuwasan mo ang grabe nga balatian, mangin mas mabakod ang imo panglawas.”

Mga Pamangkot sa Dios

“Ngaa nagaantos ang mga maayo?” Amo ini ang isa sa mga gusto gid ipamangkot sa Dios sang mga estudyante sa kolehiyo sa Sweden kon may kahigayunan sila, siling sang pamantalaan didto nga Dagen. Ginpakita sa surbe nga ang pirme pa gid nila ginapamangkot amo: “Ano ang katuyuan sang kabuhi?” kag “Ano ang matabo sa tapos sang kamatayon?” Indi relihioso ang mga tawo sa Sweden, pero “gusto gihapon nila ini ipamangkot,” siling sang tiglawas sang isa ka organisasyon sang Cristiano nga mga estudyante nga nagsurbe. “Ginapalibugan sang mga pamatan-on ini nga mga pamangkot.”

Ang Pagkabaldado Nagapasuod sa Mag-asawa

“Ang mga lalaki kag babayi nga lainlain ang edad nagsiling nga mas malipayon sila sa ila pag-asawahay sang nangin baldado sila,” siling sang mga researcher. Makapaluya gid sing buot kon indi mo na mahimo ang adlaw-adlaw nga mga hilikuton, pero mapasuod man sini ang mga mag-asawa. Ang may edad na nga mga lalaki nagsiling nga mas daku na ang ila tion sa ila asawa. “Ang pag-atipan kag pagtungod sa bag-o nga mga responsibilidad ukon ang pirme nga paghimo sini nagahatag sing kahigayunan sa mga lalaki nga masuportahan kag makaupod pirme ang ila asawa, kag bangod sini mapabaloran pa gid nila ang ila relasyon,” siling ni Karen Roberto, direktor sang Center for Gerontology sa Virginia Tech, U.S.A.