KON amo, malipay ka gid kon mahibaluan mo nga ang Adlaw sang Paghukom isa ka mahigugmaon nga kahimusan para sa kaayuhan sang tanan nga tawo, lakip na sang mga napatay. (Mateo 20:28; Juan 3:16) Ngaa kinahanglan gid ang Adlaw sang Paghukom? Ano gid ang mahanabo sa sina nga “adlaw”?

Sang ginpapuyo sang Dios ang tawo sa duta, indi niya katuyuan nga mangin lugar lamang ini agod tilawan ang mga tawo kon bala kalipikado sila nga magkabuhi sa lain naman nga kalibutan. Sa baylo, gintuga niya ang tawo para magkabuhi sing dayon sa duta. Pero bisan pa perpekto ang una nga mag-asawa, nagrebelde sila sa Dios. Bilang resulta, nadula nila ang kahigayunan nga mabuhi sing dayon kag ginpanubli sang ila mga kaanakan ang sala kag kamatayon.​—Genesis 2:15-17; Roma 5:12.

Ang Adlaw sang Paghukom magalawig sing isa ka libo ka tuig, kag sa sini nga tion may kahigayunan ang tawo nga matigayon liwat ang nadula nanday Adan kag Eva. * Talupangda nga sa Binuhatan 17:31 nga ginsambit sa ibabaw, ang Adlaw sang Paghukom magaapektar sa tanan nga nagakabuhi sa “napuy-an nga duta.” Ang mga maluwas magakabuhi sing wala katapusan sa duta sa pinakamaayo nga kahimtangan. (Bugna 21:3, 4) Gani, ang Adlaw sang Paghukom may importante nga papel para matuman ang orihinal nga katuyuan sang Dios para sa mga tawo kag sa duta.

Ang Hukom nga gintangdo sang Dios amo si Cristo Jesus. Suno sa Biblia, si Jesus ‘magahukom sa mga buhi kag sa mga patay.’ (2 Timoteo 4:1) Sin-o ang “mga buhi” nga pagahukman? Paano ang mga patay mabuhi liwat sa “napuy-an nga duta”?

Malapit na lang kita sa gintalana nga katapusan sining malauton nga kalibutan, ang tion nga  dulaon sang Dios ang malain nga sistema sang tawo kag laglagon ang mga malauton. Ang mga maluwas sa sini amo ang “mga buhi” nga pagahukman.—Bugna 7:9-14; 19:11-16.

Sa tion sang paghukom, nga magalawig sing 1,000 ka tuig, si Cristo Jesus upod ang 144,000 ka lalaki kag babayi nga ginbanhaw agod magkabuhi sa langit amo ang magagahom sa bug-os nga duta. Mangin mga hari sila kag mga saserdote, kag ipadapat nila ang mga kaayuhan sang pagtubos ni Jesus kag amat-amat nga mangin perpekto sa mental kag pisikal ang mga tawo nga matutom sa Dios.—Bugna 5:10; 14:1-4; 20:4-6.

Sa Adlaw sang Paghukom, ang mga tawo indi maimpluwensiahan ni Satanas kag sang iya mga demonyo. (Bugna 20:1-3) Pero, sa katapusan sang adlaw sang paghukom, tugutan si Satanas nga tilawan ang katutom sang tagsa ka tawo. Ang mga makapabilin nga mainunungon sa Dios amo ang makapasar sa pagtilaw nga wala napasaran nanday Adan kag Eva. Nagakabagay gid sila sa wala katapusan nga kabuhi sa napasag-uli nga Paraiso sa duta. Ang mga magarebelde naman sa Dios pagalaglagon sing bug-os, subong man si Satanas kag ang iya mga demonyo.—Bugna 20:7-9.

Ang Biblia nagasiling nga sa Adlaw sang Paghukom, ang mga patay “mabanhaw.” (Mateo 12:41) Si Jesus nagsiling nga “magaabot ang tion nga ang tanan nga yara sa handumanan nga mga lulubngan makabati sang iya tingog kag magagua, ang mga nakahimo sang maayo nga mga butang sa pagkabanhaw para sa kabuhi, ang mga nakahimo sang malaut nga mga butang sa pagkabanhaw para sa paghukom.” (Juan 5:28, 29) Wala ini nagapatuhoy sa kalag nga nagabulag sa lawas sang mga napatay, kay ang mga patay wala na sing nahibaluan kag wala sila sing imortal nga kalag. (Manugwali 9:5; Juan 11:​11-​14, 23, 24) Ang mga napatay pagabanhawon ni Jesus diri sa duta.

Ang mga ginbanhaw bala pagahukman base sa ila hinimuan sang buhi pa sila? Indi. Ginatudlo sang Biblia nga “sia nga napatay nahilway na sa iya sala.” (Roma 6:7) Gani, pareho sang mga makaluwas sa katapusan sang sining malain nga sistema, pagahukman man ang mga ginbanhaw “suno sa ila mga buhat” sa Adlaw sang Paghukom. (Bugna 20:12, 13) Depende sa ila buhat kon bala ang ila pagkabanhaw magaresulta sa kabuhi nga wala katapusan ukon sa kalaglagan. Madamo sang mga pagabanhawon ang wala gid anay makakilala kay Jehova nga Dios kag wala gid makahibalo kon ano ang iya mga ginapatuman. Gani, hatagan sila sing kahigayunan nga sundon ang kabubut-on sang Dios kag matigayon ang kabuhi nga wala katapusan sa duta.

Ang Adlaw sang Paghukom indi lamang tion nga tudluan kita sang Dios kundi tion man ini nga sundon sang mga nagakabuhi ang ila natun-an kag magkalipay sa mga kaayuhan sini. Hunahunaa lamang kon daw ano ka makalilipay nga makaupod mo liwat ang imo mga hinigugma nga ginbanhaw kag amat-amat kamo nga mangin perpekto!

Tugutan sang Dios si Satanas nga tilawan ang pagkamainunungon sang mga tawo sa katapusan sang Adlaw sang Paghukom. Pero indi kita dapat mabalaka ukon mahadlok. Sa hingapusan sang Adlaw sang Paghukom, ang tanan nga tawo handa na sa pag-atubang sa sining katapusan nga pagtilaw. Gani ang Adlaw sang Paghukom isa ka paagi agod matuman sang Dios ang iya katuyuan nga dulaon ang tanan nga epekto sang pagrebelde sa hardin sang Eden.