Ang Panit sang Bagis
Gindesinyo Bala Ini?
Ang Panit sang Bagis
● Ang panit sang bagis daw mahining kon tan-awon. Pero kon may kahigayunan ka nga mahikap ini halin sa ikog pakadto sa ulo, daw papel de liha ini kagaras. *
Binagbinaga: Ang magagmay nga mga kanalkanal sa himbis sini nagabulig sa bagis sa duha ka paagi. Una, nagadalhay lang sa sini ang tubig, amo nga mas mahapos ang paglangoy sang bagis. Ikaduha, kon maglangoy ang bagis nagahulaghulag ining mga himbis, amo nga indi ini maistaran sang mga sapatsapat.
Madamo sing puede mahimo kon ilugon ang pagkahuman sang panit sang bagis. Halimbawa, ang mga sientipiko nakahimo na sing swimsuit nga ang materyal gin-ilog sa panit sang bagis. Bangod sini, nagdugang sing mga tres porsiento ang kadasigon sang mga manuglangoy. Nagapati sila nga puede man ini ilugon para makahimo sing mas madasig nga mga salakyan kag mga sakayan.
Ang panit sang bagis indi matapikan sang higko. Gani, gusto sang mga researcher nga ilugon ini sa paghimo sing pinta nga wala nagahalit sa palibot. Ini nga pinta makabulig para indi pagtapikan sing higko kag indi pag-istaran sang mga sapatsapat ang mga sakayan. Gusto man nila ini ilugon sa paghimo sing mga bulong kag mga gamit sa ospital nga nagabulig para malikawan ang paglapta sang impeksion.
Ano sa banta mo? Natabuan lang bala ang panit sang bagis nga nagapadasig sa iya paglangoy kag nagabulig sa iya nga mangin matinlo? Ukon may nagdesinyo sini?
[Nota]
^ par. 3 Mahining ini kon hikapon halin sa ulo pakadto sa ikog.
[Retrato sa pahina 10]
Ang himbis sang bagis (ginpadaku)
[Picture Credit Lines sa pahina 10]
Scales: © Eye of Science/Photo Researchers, Inc.; shark: © Image Source/age fotostock
