Ang Pagtamod sang Biblia

Dungganon nga Pagnobyahanay

Nobyahanay sanday Julie kag Lee, kag ginatinguhaan nila nga mangin matinlo ang ila relasyon. * Pero isa ka gab-i sang silahanon lang, napukaw ang ila seksuwal nga balatyagon. Maayo lang kay nakamarasmas sila antes sila makahimo sing mabug-at nga sala.

ANG matuod nga pagsimba indi lamang pagkadto sa simbahan kada semana. Bahin ini sang aton kabuhi nga nagaimpluwensia sang aton paggawi kag mga talaksan sa moral. Si Jesucristo nagsiling nga ang Dios nahamuot sa mga ‘nagahimo sang Iya kabubut-on.’ (Mateo 7:21) Para mahamuot ang Dios, dapat naton tinguhaan nga mangin dungganon ang pagnobyahanay.

Paano ninyo mapabilin nga dungganon sa pagtamod sang Dios ang inyo pagnobyahanay, bisan pa nga daw ginabalewala na lang sang mga tawo subong ang matinlo nga moral? Una, kilalaha nga ang mga talaksan sang Dios ginhimo para gid sa aton kaayuhan. Ikaduha, batuna ang kamatuoran parte sa huyog sang tawo. Ikatlo, magbutang sing maathag nga mga limitasyon sa inyo paggawi. Kag ikap-at, ilakip ang Dios sa inyo relasyon. Binagbinagon naton sing isaisa ini nga mga punto.

Ang mga Talaksan Ginhimo Para sa Aton Kaayuhan

Ang Isaias 48:17, 18, nagasiling: “Ako amo ang GINOO nga imo Dios, nga nagatudlo sa imo sa kapuslanan, nga nagatuytuy sa imo sa dalanon nga laktan mo. Kabay kuntani nga nagpamati ka sa akon mga sogo! Niyan ang imo paghidait nanginsubong kuntani sang suba, kag ang imo pagkamatarung nanginsubong sang mga balud sang dagat.”

Huo, ang mga sugo kag mga prinsipio nga makita sa Pulong sang Dios, ang Balaan nga Biblia, para gid sa aton kaayuhan. (2 Timoteo 3:16, 17) Pamatuod ini nga ang aton Manunuga nagaulikid gid sa aton kag gusto niya nga mangin malipayon kita kag magmadinalag-on sa aton kabuhi. (Salmo 19:7-10) Nabatyagan mo bala ini? Kon amo, may matuod ka nga kaalam.

Batuna ang Kamatuoran Parte sa Imo Kaugalingon

Pareho sang isa ka matuod nga abyan, ginasugid gid ni Jehova ang matuod parte sa aton. Halimbawa, ginapaandaman kita sang iya Pulong nga “ang tagiposoon malimbongon labaw sa tanan nga butang, kag lakas gid kadunut; sin-o bala ang makahibalo sini?” (Jeremias 17:9) Ang Biblia nagsiling man: “Ang nagasalig sa iya kaugalingon nga tagiposoon buangbuang; apang ang bisan sin-o nga nagalakat sing maalamon luwason sia.”—Hulubaton 28:26.

Paano masiling nga ang mga naganobyahanay nagasalig sa ila tagipusuon? Makita ini kon ginabutang nila ang ila kaugalingon sa mga kahimtangan nga mahimo sila masulay pareho sa naganobyahanay nga ginsambit sa umpisa. Ang isa pa gid amo ang pagbalewala sa mga laygay sang mga ginikanan nga may kahadlok sa Dios. Ini nga mga ginikanan nakahibalo nga ang seksuwal nga mga balatyagon, labi na sang mga pamatan-on daw pareho sang kalayo nga dapat bantayan para indi magresulta sa sunog.

Gani, ginapamatian gid sang mga pamatan-on nga ‘nagalakat sa diosnon nga kaalam’ ang laygay sang ila mga ginikanan. Huo, ginatuman nila ang ila mga ginikanan nga nagapalangga gid sa ila, bisan pa nga kon kaisa indi nila gusto ang ila mga laygay. Siempre, ang isa nga nagahigugma gid sa imo amo ang imo langitnon nga Amay, si Jehova nga Dios, nga nagalaygay sa imo nga ‘kuhaon ang kasubu sa imo tagiposoon, kag isikway ang malaut gikan sa imo unud.’ (Manugwali 11:9, 10) Mahimo mo ini kon indi ka magpadala sa indi nagakaigo nga kailigbon.

 Magbutang sing Maathag nga mga Limitasyon sa Inyo Paggawi

“Sa nalaygayan sing maayo yara ang kaalam.” (Hulubaton 13:10) Ginasunod ini sang maalamon nga mga naganobyahanay bisan sa umpisa pa lang sang ila relasyon. Ginaistoryahan nila ang mga limitasyon base sa mga prinsipio sang Biblia kon parte sa ila pagpakita sing pagpalangga sa isa kag isa, kag ginatinguhaan nila nga sundon ini. Ang pagsupak sa sini nga mga limitasyon ukon ang pagsiling nga indi ka matentar daw pareho sa patarasak nga pagmaneho. Ulihi na ang pagpamensar nga dapat ka maghalong kon naaksidente ka na!

Ang Biblia nagasiling: “Ang mahalongon nga tawo nakakita sang malaut kag nagapanago sia; apang ang kulangkulang nagapadayon, kag nagaantus tungud sini.” (Hulubaton 22:3) Malikawan sang naganobyahanay nga makasala kon magdeyt sila upod sa grupo ukon mag-upod sila sing hamtong nga tsaperon. Kon ini nga laygay balewalaon sang mga naganobyahanay kag makasala sila, mahimo nga matublag ang ila konsiensia, madula ang ila respeto sa kaugalingon kag sa ila nobyo ukon nobya, kag mahuy-an ang ila mga kakilala, abyan, kag pamilya. Gani maghalong. Mangin determinado nga sundon ang mga talaksan sang Biblia!

Himua si Jehova Subong ‘Ikatlo nga Dupli’

Ang pag-asawahay pareho sa lubid nga may tatlo ka dupli, kag ang Dios amo ang pinakamabakod nga dupli. “Ang lubid nga tatlo ka dupli indi mabugto sing madali,” siling sang Manugwali 4:12. Ini nga prinsipio maaplikar man sa mga naganobyahanay. Kon ginatinguhaan sang kada isa sa ila nga mangin suod sa Dios, pakamaayuhon man sang Dios ang ila relasyon. Ang Salmo 1:1-3 nagasiling: “Bulahan ang tawo nga wala nagalakat sa laygay sang malauton, . . . kondi ang iya kawilihan yara sa kasogoan sang GINOO, kag sa iya kasogoan nagapalamandong sia sa adlaw kag gab-i. . . . Ang bisan ano nga ginahimo niya nagauswag.”

Huo, mangin madinalag-on lamang ang aton kabuhi, lakip ang pagnobyahanay kag pag-asawahay kon tumanon naton ang mga kasuguan ni Jehova nga Dios. Kay man, sia ang aton Manunuga kag ang romantiko nga balatyagon kag ang pag-asawahay regalo niya sa aton. Gani, dapat gid naton ini pabaloran.—Santiago 1:17.

[Nota]

NAMANGKOT KA BALA?

● Ngaa makasiling kita nga gusto sang Dios ang pinakamaayo para sa aton?—Isaias 48:17, 18.

● Ano nga kamatuoran parte sa aton kaugalingon ang dapat naton batunon?—Jeremias 17:9.

● Paano magmadinalag-on ang pagnobyahanay kag pag-asawahay?—Salmo 1:1-3.

[Retrato sa pahina 13]

Sa umpisa pa lang sang relasyon, ginaistoryahan na sang maalamon nga naganobyahanay ang mga prinsipio sang Biblia parte sa pagpakita sing pagpalangga sa isa kag isa, kag ginatinguhaan nila nga sundon ini