“Lugpayi Ako”

● Ang sanga talatapan sang mga Saksi ni Jehova sa Mexico nakabaton sing sulat halin sa isa ka babayi nga nagaobra sa eskwelahan para sa mga baldado kag may diperensia sa pamensaron. Nagsulat sia: “Sang Mayo 9, ang akon pinalangga nga iloy napatay. Grabe gid ang akon kasubo. Mga pila ka bulan antes sia napatay, may ginhimo ako nga research para sa akon obra parte sa thanatology, ang pagtuon parte sa kamatayon kag kon paano atubangon ang kasubo nga epekto sini. Abi ko mabuligan ako sini, pero ginasubuan gihapon ako.”

Isa ka bes, sang ginasubuan gid sia, nangamuyo sia sa Dios, nga nagasiling, “Lugpayi ako.” “Sina nga gab-i,” siling niya, “ginbasa ko ang brosyur nga Kon ang Isa nga Ginahigugma Mo Mapatay. Daw para gid ini sa akon. Ginpakita sini nga wala sing malain kon maghibi. Ang seksion nga ‘Paano Ko Mabatas ang Akon Kalisud?’ nagasiling: ‘Indi pagpakadiutaya ang balor sang pangamuyo. . . . Daku gid ang mahimo sang bulig nga ginahatag sang Dios. . . . Huo, wala ginadula sang bulig nga gikan sa Dios ang kasakit, apang labi sini nga ginapahulas ang pagbatas. Wala ina nagakahulugan nga indi ka na magahibi ukon malimtan mo na ang imo hinigugma. Apang mahimo mo malandas ang kasubo.’ Nalugpayan gid ako sini.”

Kon namatyan ka sing isa ka pinalangga kag nagakinahanglan sing lugpay, makabulig sa imo ukon sa kilala mo ang 32-pahina nga brosyur nga Kon ang Isa nga Ginahigugma Mo Mapatay.

Mahimo ka makapangabay sing kopya sini paagi sa pagsulat sa kupon sa ubos kag ipadala ini sa adres nga makita sa kupon ukon sa isa sa nagakaigo nga adres nga nalista sa pahina 5 sini nga magasin.

□ Interesado ako nga makabaton sing kopya sang brosyur nga ginapakita diri.

□ Palihug kontaka ako parte sa wala sing bayad nga pagtuon sa Biblia sa puluy-an.