Soldado nga SS Sadto, Alagad sang Matuod nga Dios Subong

Panugiron ni Gottlieb Bernhardt

Isa ako ka German SS nga soldado, ang tawag sa guardia ni Hitler, kag naasayn ako sa Wewelsburg Castle. Sang Abril 1945, ginmanduan ako nga pamatyon ang mga bilanggo sa malapit nga kampo konsentrasyon. Mga Saksi ni Jehova sila. Subong isa ka SS, obligado ako nga tumanon ang tanan nga mando sa akon. Pero sa sini nga tion, nabudlayan ako nga himuon ini. Ipaathag ko kon ngaa.

NATAWO ako sang 1922 sa isa ka lugar nga malapit sa Rhine River sa Germany. Ang kalabanan nga tawo diri mga Romano Katoliko. Pero ang amon pamilya mga Pietismo, isa ka relihion nga nagsugod pa sang ika-17 nga siglo. Sang 1933, sang 11 anyos pa lang ako, naggahom si Hitler sa Germany. Pila ka tuig ang nagligad, bangod maalam ako kag maayo sa sports, napilian ako nga mag-eskwela sa akademya nga malapit sa Marienburg, nga ginatawag karon nga Malbork, sa Poland. Malayo ini katama sa amon puluy-an kag diri ako gintudluan sang ideolohiya sang National Socialist, ukon Nazi. Ang mga estudyante diri gintudluan sang kadungganan, kapisan, katutom, pagtungod sa mga responsibilidad, kag paghigugma sa pungsod.

Ang Bug-os Kalibutan nga Inaway II kag ang SS

Sang nagsugod ang ikaduha nga bug-os kalibutan nga inaway sang 1939, nag-entra ako sa Leibstandarte SS Adolf Hitler, isa ka pinasahi nga grupo sang mga soldado nga si Hitler mismo ang nagamando. Ini nga grupo amo ang nagapadala sing mga guardia para sa mga opisyal sang gobierno, kag para sa pinasahi nga mga misyon. Nasaksihan ko ang inaway sa Belgium, Pransia, Netherlands, Romania, Bulgaria, kag Gresya. Sang didto ako sa Bulgaria, nagtambong ako sa misa nga para sa mga soldado. Sa pensar ko, ‘Ginamisahan man ayhan ang amon mga kontra?’ Nahunahuna ko man: ‘Ginapakamaayo ayhan sang Dios ang inaway? May ginadampigan bala sia?’

Sang ulihi, napilian ako nga mag-eskwela sa Junkerschule. Diri ginahanas ang bataon pa nga mga lalaki nga hatagan sa ulihi sing mataas nga posisyon sa militar. Pagkatapos sini, gin-asayn ako sa grupo nga nagaguardia sa Reich headquarters sa Berlin, diin isa ka bes nakita ko nga ginsinggitan ni Hitler sa atubang sang madamo nga tawo ang isa ka mataas sing posisyon nga pulitiko. Sa pensar ko, ‘Makahuluya gid ang iya ginhimo.’ Pero siempre, wala ko ini ginhambal!

Sa Berlin, nakilala ko si Inge, nga nagatrabaho man sa headquarters. Sang dali na lang kami kaslon, ang amon grupo gulpi nga ginpadala sa inaway sa Rusya, kag wala gani kami makahanda sing bayo para sa tigtulugnaw! Daw indi kami makapati sa amon kahimtangan, kay sang tigtulugnaw sang 1941/1942, ang temperatura manubo  pa sa -30°C. Sa sini nga inaway, gin-awardan ako sang Iron Cross sa ikaduha nga tion. Sang ulihi, nasamaran ako sing malubha, gani ginbalik ako sa Germany. Nagpakasal kami ni Inge sang 1943.

Dayon, gin-asayn ako sa headquarters ni Hitler sa Obersalzberg, sa kabukiran sang Bavaria. Didto man ang may pinakamataas nga posisyon sa SS nga si Heinrich Himmler. Ginsugo niya ang iya personal nga masahista kag doktor nga si Felix Kersten nga atipanon ako. Sang ulihi, nahibaluan ko nga may malapad nga uma si Kersten sa Hartzwalde, malapit sa Berlin. Sang madali na lang matapos ang inaway, ginpangabay niya si Himmler nga tugutan ang mga Saksi ni Jehova halin sa kampo konsentrasyon nga magtrabaho sa iya uma. Nagpasugot si Himmler, kag maayo gid ang pagtratar ni Kersten sa mga Saksi. May isa ka Saksi nga nagapangamo kay Kersten sa Sweden kag ginabutangan niya pirme sing kopya sang Ang Lalantawan ang maleta ni Kersten para makalab-ot ini sa mga Saksi sa Germany. *

Nakilala Ko ang mga Saksi ni Jehova

Sang madali na lang matapos ang 1944, gin-asayn ako ni Himmler nga mangin adjutant sang isa ka SS nga heneral nga amo ang nagadumala sang Wewelsburg Castle, isa ini ka tinukod nga 400 ka tuig na kag malapit sa siudad sang Paderborn. Plano ni Himmler nga himuon ang Wewelsburg nga sentro sang ideolohiya sang SS. Malapit sa sini ang isa ka gamay nga kampo konsentrasyon nga ginatawag Niederhagen. Diri ginbutang ang isa ka pinasahi nga grupo sang mga priso nga ginatawag mga Saksi ni Jehova, ukon mga Estudyante sang Biblia.

Ang isa ka priso nga si Ernst Specht pila ka beses nga nagkadto sa akon para bulngon ako. “Maayong aga, Sir,” siling niya kon magkadto sia.

“Ngaa wala ka nagasiling sing ‘Heil Hitler!’?” pamangkot ko.

Nagsabat sia, “Cristiano ka man?”

“Huo,” siling ko. “Mga Pietismo ang amon pamilya.”

“Kon amo,” padayon niya, “kahibalo ka nga ang Biblia nagasiling nga ang kaluwasan (heil) paagi lamang sa isa ka persona, si Jesucristo. Amo kon ngaa indi ako makasiling sing ‘Heil Hitler!’”

Nakibot ako kag nagdayaw sa iya sabat, gani namangkot ako, “Ngaa ari ka diri?”

“Estudyante ako sang Biblia,” siling niya.

Ang pagpakighambal ko pirme kay Ernst kag sa isa pa ka Saksi nga si Erich Nikolaizig, nga nagaobra subong hairdresser, nagpahulag gid sa akon. Ginadumilian ang pagpakighambal sa ila, gani ginpaandaman ako sang akon opisyal nga indi ini pagsigehon. Pero, nagapati ako nga kon ang tanan nga tawo sa Germany—ang pungsod  nga nagapangangkon nga Cristiano kag minilyon ang may relihion—maggawi subong sang mga Saksi, wala na sing inaway. ‘Dapat gani sila dayawon, imbes nga hingabuton,’ hunahuna ko.

Sina nga tion, ang isa ka nagasalasala nga balo nagtawag kag nangabay nga dalhon sa ospital ang iya bata kay dapat operahan sa appendix. Nagsugo ako dayon nga padalhan sila sing salakyan, pero ginbalabagan ini sang akon opisyal. Kay man, ang bana sining balo ginpapatay bangod miembro ini sang isa ka grupo nga nagplano nga patyon si Hitler sang Hulyo 1944. Napatay ang iya bata, kag wala gid ako sing nahimo. Asta subong, ini nga hitabo nagatublag gihapon sa akon konsiensia.

Bisan pa nga beintehon pa lang ako, nakita ko na ang matuod nga nagakatabo, kag baliskad gid ini sa propaganda sang mga Nazi. Sa pihak nga bahin, gindayaw ko pa gid ang mga Saksi ni Jehova kag ang ila mga panudlo. Bangod sini, ginhimo ko ang pinakamabug-at nga desisyon sa akon kabuhi.

Sang Abril 1945, ang Alyado nga mga soldado nagapadulong, kag ang akon opisyal sa Wewelsburg nalagyo na. Nag-abot man dayon ang mga soldado nga may mando ni Himmler nga gub-on ang tinukod kag patyon ang mga priso. Ang kumander sang malapit nga kampo konsentrasyon naghatag sa akon sing listahan sang mga priso nga pamatyon—tanan sila mga Saksi. Nabalitaan kuno nila nga natultulan sang mga Saksi kon diin natago ang ginkawat sang Third Reich nga mga bahandi, nga amo ang mga obra maestra nga natago sa mga bilding. Indi dapat mahibaluan ini nga sekreto! Tumanon ko bala ang mando nga pamatyon sila?

Ginkadtuan ko ang kumander sang kampo kag nagsiling: “Nagapadulong na ang tropa sang Amerika. Mas maayo siguro kon malagyo na kamo sang imo mga tinawo.” Nakumbinse ko ang kumander kag nalagyo sila! Dayon ginhimo ko ang daw indi gid mahimo sang isa ka SS nga soldado—ginsupak ko ang mando nga pamatyon ang mga Saksi.

Kadungganan Ko nga Mangin Utod Nila

Pagkatapos sang inaway, ginpangita namon ni Inge ang mga Saksi ni Jehova kag nagtuon kami sing Biblia. Ginbuligan kami sang isa ka Saksi nga babayi nga si Auguste, upod sang iban pa nga Saksi. Ginbudlayan ako bangod sa akon mga kasamaran kag mga inagihan sa inaway. Pero gindedikar ko ang akon kabuhi kay Jehova kag nagpabawtismo sang 1948. Si Inge naman nagpabawtismo sang 1949.

Sang dekada 1950, ang pila ka Saksi nga ginpriso sa Wewelsburg sa tion sang inaway nagbalik didto para mag-reunion. Lakip sa ila amo si Ernst Specht, Erich Nikolaizig, kag ang isa pa ka matutom nga priso nga si Max Hollweg. Kadungganan ko gid nga mangin utod nila, kay ginrisgo sining maisog nga mga alagad sang Dios ang ila kabuhi para panaksihan ako. Nagkadto man si Martha Niemann, nga sekretarya sadto sa Wewelsburg. Nagdayaw man sia sa paggawi sang mga Saksi kag nangin dedikado man nga alagad ni Jehova.

Kon balikan ko ang nagligad, nakita ko ang madamo nga pamatuod nga “ang bug-os nga kalibutan yara sa gahom [ni Satanas nga Yawa]”—isa ka butang nga wala ko gid mahangpan sang una. (1 Juan 5:19) Nakita ko man ang daku nga kinatuhayan sang pagserbisyo sa mapintas nga mga rehimen, subong sang iya ni Hitler, kag sa pag-alagad kay Jehova. Obligado ka nga magtuman sa mapintas nga paggahom sang tawo. Sa pihak nga bahin, gusto ni Jehova nga alagaron naton sia bangod ginahigugma naton sia kag natun-an naton sa Biblia ang iya mga kinaiya kag mga katuyuan. (Lucas 10:27; Juan 17:3) Huo, tubtob buhi ako si Jehova lamang ang akon alagaron.

[Nota]

[Retrato sa pahina 19]

Sang ginkasal kami sang Pebrero 1943

[Retrato sa pahina 19]

Ang Wewelsburg Castle nga plano nga himuon nga sentro sang ideolohiya sang SS

[Retrato sa pahina 20]

Kami ni Inge subong