Kon Ngaa Nangin Interesado Ako sa mga Saksi ni Jehova

Panugiron ni Tomás Orosco

Sa una ko nga pagtambong sa pagtilipon sang mga Saksi sa ila Kingdom Hall, may isa ka bata nga lalaki nga nagapamulongpulong. Bisan pa haluson sia makalab-ot sa podyum, kalmado ang iya paghambal kag maayo sia magkumpas. Nagdayaw gid ako sa iya.

ANG mga tumalambong nagapamati gid sing maayo. Subong isa ka diplomat sang militar sang Bolivia sa Estados Unidos, kumander sang militar, kag personal nga assistant sang presidente, naanad ako nga ginarespeto. Pero ang pagrespeto sang mga tumalambong sa sini nga bata nagpahulag sa akon nga usisaon liwat ang akon mga tulumuron sa kabuhi.

Napatay ang akon amay sang 1934, sa panahon sang Chaco War sang mag-away ang Paraguay kag Bolivia. Pagkatapos sini, ginpaeskwela ako sa isa ka eskwelahan sang mga Katoliko. Sa sulod sang mga tinuig, adlaw-adlaw ako nagatambong sa Misa, diin nagakanta kami, nagapamati sa katekismo, kag nagapangadi. Nagsakristan pa gani ako kag nag-entra sa choir. Pero wala pa gid ako makabasa sing Biblia. Wala ko gani makita kon ano ang hitsura sini.

Nanamian ako sa mga selebrasyon sang relihion kay daw nagaparty lang, kag gusto ko nga lain naman ang akon himuon. Pero ang mga pari kag ang iban pa nga nagatudlo sing relihion wala sing kaluoy. Indi ko gusto ang ila ginahimo. Natak-an na ako sa relihion.

Nangin Interesado sa Militar

Isa ka adlaw, may duha ka nakauniporme nga soldado nga nagkadto sa amon lugar sa Tarija. Naka-leave sila sa La Paz, ang kapital sang Bolivia. Kanami sa ila tan-awon samtang nagalakatlakat sila sa plasa. Nagdayaw gid ako kay daw talahuron sila kag matinlo tan-awon. Berde ang ila uniporme kag nagabadlak ang ila kalo. Sugod sadto, gusto ko na mangin soldado. Nagpati gid ako nga madamo sila sing eksperiensia sa kabuhi kag pirme nagahimo sing maayo.

Sang 1949, sang 16 anyos ako, nagsulod ako sa eskwelahan sa Bolivia para sa mga gusto magsoldado. Gin-updan pa ako sang akon magulang sa nagapila nga mga lalaki halin sa gate asta sa barracks. Ginpakilala niya ako kag ginrekomendar sa tenyente, kag nangabay nga ang tenyente na ang bahala sa akon. Sang makalakat na ang akon magulang, natilawan ko ang kinaandan nga ginahimo sa mga bag-uhan. Gintapungol  ako kag sang matumba ako, nagsiling sia, “Wala kami sing labot kon sin-o man ang nagrekomendar sa imo!” Sa una nga tion, naagihan ko ang disiplina kag pamahog sa militar. Pero, wala magluya ang akon buot bisan pa daw nahuy-an ako.

Pagligad sang mga tion, natun-an ko nga makig-away kag nangin respetado nga opisyal sang militar. Pero base sa akon eksperiensia, nakita ko nga sa gua lang gali ang matinlo kag talahuron nga hitsura sang mga soldado.

Nagtaas ang Akon Posisyon

Sa umpisa, ginhanas ako sa barko sang Navy sang Argentina nga General Belgrano, nga may sobra isa ka libo ka tinawo. Antes sang Bug-os Kalibutan nga Inaway II, amo ini ang USS Phoenix sang Estados Unidos nga nakalampuwas sang gin-atake sang mga Hapones ang Pearl Harbor sa Hawaii sang 1941.

Sang ulihi, nagtaas ang akon ranggo asta nga ginhatag sa akon ang ikaduha sa pinakamataas nga ranggo sang Navy sa Bolivia. Kami ang nagabantay sa tanan nga dulunan sang Bolivia. Nalakip sa sini ang mga suba sang Amazon Basin, kag ang pinakamataas nga linaw sa kalibutan, ang Lake Titicaca.

Sang Mayo 1980, isa ako sa mga diplomat sang militar nga ginpadala sa Washington, D.C., ang kapital sang Estados Unidos. Halin sa army, air force, kag navy, ginpili ang may mataas sing posisyon kag ako ang ginhimo nga koordenitor sang grupo kay madugay na ako sa serbisyo. Halos duha ka tuig ako nga nag-istar sa Estados Unidos kag sang ulihi nangin personal ako nga assistant sang presidente sang Bolivia.

Subong kumander sang militar, dapat ako magsimba kada Domingo. Pero naglibog ang akon ulo kay ginasuportahan sang mga pari ang rebolusyon kag mga inaway. Nahibaluan ko nga indi husto nga suportahan sang simbahan ini nga pagpinatyanay. Pero imbes nga madulaan sing interes sa relihion, nangin interesado  pa gid ako nga pangitaon ang kamatuoran parte sa Dios. Wala pa ako makabasa sing Biblia, gani ginsugdan ko nga basabasahon ini kon kaisa.

Pagkaorganisado sa Kingdom Hall

Nakibot gid ako sang ang akon asawa nga si Manuela nagtuon sing Biblia upod kay Janet, nga isa ka misyonera nga Saksi ni Jehova. Sang ulihi, nagatambong na si Manuela sa ila tilipunan nga ginatawag Kingdom Hall. Ginadul-ong ko sia pirme sa Kingdom Hall, pero indi ko gusto magtambong kay abi ko ang ila pagtililipon magahod kag emosyonal.

Isa ka adlaw, ginpamangkot ako ni Manuela kon sugot ako nga bisitahan sang bana ni Janet. Sang primero indi ako. Dayon napensaran ko nga sa kadamo sang akon nahibaluan parte sa relihion puede ko sia debatehon. Sang nakilala ko si Ian, mas nagdayaw ako sa iya paggawi sangsa iya ginahambal. Wala niya ako ginpakahuy-an bisan pa nga eksperiensiado sia kag madamo sing nahibaluan sa Biblia. Sa baylo, mabuot sia kag matinahuron.

Pagkadason nga semana, nagdesisyon ako nga magtambong sa Kingdom Hall, kag subong sang ginsambit ko sa umpisa, didto ko nakita ang bata nga nagapamulongpulong. Samtang ginabasa niya kag ginapaathag ang mga bersikulo sa tulun-an sang Isaias sa Biblia, nahibaluan ko nga nakita ko na ang isa ka pinasahi nga organisasyon. Daw makahalam-ot kay gusto ko gid sang una nga mangin respetado nga opisyal sang militar. Pero subong gusto ko nga mangin pareho sining bata nga nagatudlo sing Biblia. Daw gulpi lang naghumok ang akon balatyagon kag interesado na ako magtuon.

Pagligad sang tion, labi ako nga nagdayaw sa mga Saksi kay temprano pa sila nagaabot, maabiabihon, kag mainabyanon. Matinlo man sila kag mahipid mamayo. Pero ang nanamian ko gid amo ang pagkaorganisado sang ila mga pagtililipon. Ginasunod gid nila kon ano ang nakaiskedyul nga pamulongpulong. Nakita ko nga ang pagkaorganisado sang ila mga pagtililipon nabase sa gugma, indi sa kahadlok.

Pagkatapos sang una ko nga pagtambong, nagpasugot ako nga magtuon sing Biblia upod kay Ian. Gintun-an namon ang libro nga Mahimu Ka Mabuhi sing Dayon sa Paraiso sa Duta. * Indi ko gid malipatan ang piktyur sa kapitulo tres parte sa obispo nga nagabendisyon sa mga soldado antes magkadto sa giyera. Nahibaluan ko nga matuod gid ini kay nakita ko ini mismo nga nagakatabo. Nakakuha ako sing libro nga Reasoning From the Scriptures sa Kingdom Hall. Sang ginbasa ko ang ginasiling sang Biblia parte sa neutralidad, nahibaluan ko nga may dapat ako bag-uhon. Nagdesisyon ako nga indi na magbalik sa Iglesia Katolika, kag nangin regular na ako sa pagtambong sa mga miting sa Kingdom Hall. Nagplano man ako nga magretiro sa militar.

Pag-uswag Padulong sa Pagpabawtismo

Mga pila ka semana ang nagligad, nabalitaan ko nga tinluan sang kongregasyon ang koliseyum nga gamiton para sa nagahilapit nga kombension. Ginapaabot ko gid ini nga okasyon gani nagbulig man ako sa pagpaninlo. Nalipay gid ako samtang nagapanglimpyo kami. Samtang nagapanilhig ako, nagpalapit sa akon ang isa ka lalaki kag namangkot kon admiral ako sang una.

“Huo,” sabat ko.

“Daw indi ako makapati!” siling niya. “Ang admiral gapanilhig!” Daw imposible gid nga ang isa ka mataas nga opisyal manglimpyo sing salog, kay indi gani sila magpudyot sing papel. Isa sia sa mga soldado nga nangin drayber ko anay kag subong isa na sia sa mga Saksi ni Jehova!

Kooperasyon Base sa Gugma

Organisado ang militar bangod sa pagrespeto  sa posisyon sang kada isa, kag amo gid ini ang akon ginapatihan. Halimbawa, madumduman ko pa nga namangkot ako kon bala ang iban nga Saksi ni Jehova mas mataas ang posisyon sangsa iban base sa mga responsibilidad kag mga hilikuton nga ginapahimo sa ila. Importante gid para sa akon ang posisyon, pero nagbag-o ini sang ulihi.

Sini man nga tion—sang 1989—ginpahibalo nga ang isa ka miembro sang Nagadumala nga Hubon sang mga Saksi ni Jehova sa New York magaabot sa Bolivia kag magapamulongpulong sa koliseyum. Ginapaabot ko gid nga makita kon paano ginatratar ang “mataas sing posisyon” nga miembro sang organisasyon. Abi ko hatagan gid sia sing espesyal nga pag-abiabi.

Sang magsugod ang pagtilipon, natingala gid ako kay daw wala man sing may nag-abot nga espesyal nga bisita. Sa tupad namon ni Manuela may nagapungko nga tigulang nga mag-asawa. Natalupangdan ni Manuela nga Ingles ang songbook sang asawa, gani antes sang masunod nga programa gin-istorya sia ni Manuela. Pagkatapos sini, naglakat dayon ang mag-asawa.

Nakibot gid kami sang makita namon sang ulihi nga ang bana amo gali ang magapamulongpulong! Sadto mismo nga tion, nagbag-o ang akon pagtamod parte sa ranggo, pagrespeto, awtoridad, kag posisyon nga natun-an ko sa militar. “Daw sa ano bala,” siling ko sang ulihi, “ang tigulang nga tupad namon sa pulungkuan miembro gali sang Nagadumala nga Hubon!”

Nagayuhum lang ako subong kon madumduman ko nga ginbudlayan gid si Ian sa pagpahangop sa akon sang buot silingon sang ginsiling ni Jesus sa Mateo 23:8: “Tanan kamo mag-ulutod.”

Pagwali sa Una nga Tion

Sang matapos ko na ang akon mga obligasyon sa militar, ginhagad ako ni Ian nga mag-upod sa iya sa pagwali sa mga balay. (Binuhatan 20:20) Nagkadto kami sa lugar nga ginalikawan ko gid tani kay madamo nga soldado ang nagaistar diri. Ang heneral nga indi ko gid gusto nga makakita sa akon amo pa ang nagbukas sang puertahan. Kinulbaan ako, ilabi na gid sang makita niya ang akon bag kag Biblia kag daw nagapang-insulto nga namangkot, “Nag-anuano ka imo ‘ya?”

Nangamuyo ako sing makadali, kag nabatyagan ko nga nagkalma ako kag may kompiansa. Namati ang heneral sa akon kag nagbaton pa gani sing pila ka literatura sa Biblia. Bangod sadto nga eksperiensia, gindedikar ko ang akon kabuhi kay Jehova nga Dios kag nagpabawtismo sang Enero 3, 1990.

Sang ulihi, nangin Saksi ni Jehova man ang akon asawa kag kabataan. Nalipay ako karon sa pag-alagad subong gulang sa kongregasyon kag madamo ang akon tion sa pagwali sing maayong balita sang Ginharian sang Dios. Ang pinakabilidhon nga pribilehiyo nga nabaton ko amo nga makilala si Jehova kag mangin alagad niya. Labaw pa ini sa mga ranggo ukon posisyon nga mahimo handumon ukon lab-uton sang bisan sin-o. Indi kinahanglan ang kapintas kag pagpatuman sing mabudlay tumanon nga mga sugo para mangin organisado, kundi dapat ipakita ang gugma kag pag-ulikid. Si Jehova indi Dios sang kagamo, kag labaw sa tanan, mahigugmaon sia.—1 Corinto 14:33, 40; 1 Juan 4:8.

[Nota]

[Retrato sa pahina 13]

Upod sa akon utod nga si Renato sang 1950

[Retrato sa pahina 13]

Sa isa ka okasyon kaupod sang mga soldado halin sa China kag iban pa nga pungsod