Paghatag sing Oras sa Mas Importante nga mga Butang

“Malip-ot na lang ang nabilin nga tion.”—1 Corinto 7:29.

“BISAN nagaluksolukso ka kag nagatigpasaw sa tubig indi buot silingon nga nagalangoy ka na,” sulat ni Michael LeBoeuf sa iya libro nga Working Smart.

Kon sa aton pa, may kinatuhayan ang isa nga pirme masako kag ang isa nga may hinimuan. Tan-awa ang imo nahimo sang nagligad nga semana. Ano gid ang ginhatagan mo sing oras? Ano gid ang imo ginsakuan? Kinahanglan mo bala ang dugang nga oras para sa mga butang nga importante sa imo?

Binagbinaga ang ginsiling sadto ni Jesus parte sa aton masako nga tion. Nagsiling sia nga samtang nagahilapit ang katapusan sining malain nga kahimtangan sang kalibutan kag dali na lang mag-abot ang matarong nga bag-ong kalibutan sang Dios, mangin masako ang iya mga disipulo. Ano ang ila pagasakuan? Ang pagwali sang “maayong balita sang ginharian [sang Dios].” Nagsiling man si Jesus nga ang kalabanan nga tawo mangin masako katama kag wala na sila sing oras para mamati. Mangin masako sila sa ila normal nga kabuhi. Nagsiling pa sia nga ang mga wala nagasapak sa mensahe sang Ginharian pagalaglagon.—Mateo 24:14, 37-39; Lucas 17:28-30.

Ang mga Saksi ni Jehova subong nagawali sing maayong balita sang Ginharian sang Dios sa sobra sa 230 ka kadutaan. Matuod gid ang ginsiling ni Jesus kay madamo ang wala nagapamati sa ila, nga nagasiling nga ‘masako sila katama.’ Pero sa pihak sang inyo kasakuon, ginaagda namon kamo nga usisaon ang ginatudlo sang Biblia parte sa Ginharian sang Dios. Nagapati kami nga kon matun-an mo ang mga pagpakamaayo nga ginatigana sang Dios para sa mga tawo, magaugyon ka nga ang pagpamati kag pagtuman sa mensahe sang Biblia importante gid kag dapat hatagan sing oras.*

[Nota]

Para madugangan ang imo ihibalo, kontaka ang mga Saksi ni Jehova sa inyo lugar ukon magsulat sa adres nga nalista sa pahina 5 ukon sa Web site nga www.watchtower.org.