Pagkontrol sang Imo Oras

“Sa tagsa ka butang may panag-on.” —Manugwali 3:1.

PARA indi mauyang ang imo oras, kinahanglan nahibaluan mo kon ano ang imo unahon. Gani, dapat nahibaluan mo ang mga butang nga importante sa imo, ang imo mga tulumuron, kag ang dapat mo himuon para malab-ot ini.

Una, ano gid bala ang mga butang nga importante sa imo? Isulat ang tanan nga mapensaran mo subong sang pamilya, pag-abyanay, trabaho, edukasyon, kadalag-an, hitsura, kuarta, kalipay, pag-asawahay, kaayo, kapagros, kag relasyon sa Dios. Dayon, pamangkuta ang imo kaugalingon, ‘Diin sa sini ang pinakaimportante sa akon?’

Masunod, binagbinaga ang mga tulumuron nga gusto mo lab-uton. Ngaa tuhay ang mga butang nga importante sa aton sangsa aton tulumuron? Kay man, masiling nga ang mga butang nga importante bahin sang aton adlaw-adlaw nga kabuhi, samtang ang mga tulumuron nagauntat kon malab-ot na ini.

Ano ang imo mga tulumuron? Gusto mo  bala nga mas madamo ang imo oras sa imo pamilya? Makakita sing mas maayo nga obra? Mapauswag ang imo mga ikasarang? Mabag-o ang indi maayo nga mga batasan? Mabakasyon? Mabasa sing libro? Ukon magsulat sing libro?

Dayon tan-awa kon diin sa sining mga tulumuron ang pinakaimportante. Siguraduha nga nagabagay ini sa mga butang nga importante para sa imo. Halimbawa, kon ang tulumuron mo mangin manggaranon ka katama pero ang pinakaimportante sa imo amo ang imo pamilya, mahimo nga mabudlayan ka lang.

Sa kada tulumuron nga ginpili mo, hunahunaa ang mga dapat mo himuon para malab-ot ini. Halimbawa, kon ang isa sa imo mga tulumuron amo ang pagniwang, kinahanglan mo mag-ehersisyo para malab-ot ini.

 Paano Makabulig sa Imo Ini nga Paagi?

Kon ang imo mga tulumuron nagabagay sa mga butang nga importante sa imo kag ginahimo mo ang mga hilikuton para malab-ot ini, mangin matawhay ang dalagan sang imo kabuhi. Mas madamo ang imo oras sa mga butang nga importante sa imo. Pero, indi man buot silingon nga wala ka na sing labot sa kinahanglanon kag kaayuhan sang iban. (Filipos 2:4) Nagakahulugan lang ini nga nahibaluan mo na kon ano nga mga kahigayunan ang imo balibaran kay indi gid man ini importante para sa imo.

Matuod, indi ini mahapos. May mga butang nga indi gid man importante pero dapat mo himuon. Mahimo nga ubuson sini ang imo oras, kag wala na sing mabilin sa mas importante nga mga hilikuton. May mga emerhensia man kag mga sitwasyon nga mahimo magguba sang imo iskedyul. Pero kon sundon mo ining praktikal nga mga paagi sa paggamit sang imo daku nga tion sa mas importante nga mga butang, mas makontrol mo ang imo oras kag ang imo kabuhi.

[Kahon/Retrato sa pahina 6]

MAKAKINOT BALA SING ORAS ANG MGA GADYET?

Para sa iban huo, pero para sa iban nagausik pa gid ini sing oras. Halimbawa ang PDA (personal digital assistant) may kalendaryo, listahan sang mga numero sang telepono kag mga adres, listahan sang mga ulubrahon, word processor, memo pad, kamera, kag puede naman diri maka-e-mail kag maka-Internet. Makabulig ini sa pagkinot sing oras kon ginabutang mo diri ang imo mga iskedyul kag pirme mo ini ginadala. Pero, nagausik ini sing tion kon pirme mo ini ginakuti, ginapanami, ukon ginabaklan sang indi man kinahanglanon nga mga feature ukon kon ginauna mo pa ini sangsa imo relasyon sa iban kag sa imo mga responsibilidad.

Tip: Tun-i ini anay sing maayo antes mo baklon. Kon pirme ini nagakaguba, daku nga tion ang kinahanglan para makay-o ini. Isa pa, ang kaayuhan sini nagadepende sa nagagamit. Gani kon may ara ka sini, gamita ini para magkinot kag indi para mag-usik sing oras.

[Retrato sa pahina 4, 5]

May oras ka bala para sa mas importante nga mga butang?