Stress—Makahalit sa Panglawas

“Bisan ano oras lang ako ginatawag sa akon obra, adlaw man ukon gab-i. Maopera ako sa isa ka ospital, dayon may pila lang ako ka minutos para mag-agi sa grabe nga trapik pakadto sa lain nga ospital kay may uloperahan naman.” —Dr. Peter Stuart, Bagatnan nga Aprika.

MAHIMO nga naintiendihan mo ang ginabatyag ni Dr. Stuart, bisan pa lain ang kabangdanan sang imo stress. Posible nga gina-stress ka bangod sa trapik, indi maayo nga relasyon sa puluy-an ukon sa trabaho, kag iban pa. Ang matuod, normal na lang nga gina-stress ang mga tawo subong.

Sobra sa 3,000 ka tuig na ang nagligad, ang isa ka maisog nga soldado nagsiling: “Ang kahadluk kag pagkurug nagaabut sa akon.” (Salmo 55:5) Naeksperiensiahan gid sini nga soldado ang stress. Subong manugbantay sang karnero, nakapakig-away na sia sa leon, sa oso, kag sa makahaladlok nga kaaway nga gusto magpatay sa iya.—1 Samuel 17:4-10, 23, 24, 34-36, 41-51.

Indi gid man malain ang stress. Makabulig ini sa aton sa pag-atubang sa mga problema. Sa tion sang emerhensia, ang stress makabulig sa mga tawo nga mahimo ang mga butang nga daw indi mapatihan nga masarangan nila. Kon may importante ka nga ulubrahon, ang stress makabulig man agod magpatubas ang lawas sing adrenaline para matapos mo ang imo obra sa husto nga tion. *

Pero, mangin problema kon ang stress indi na madula kag ang aton lawas indi na makarelaks. “Ang stress,” suno sa isa ka researcher, “amo ang numero uno nga makahalit sa aton panglawas kag pagkatawo.” Kon daw indi mo na maagwanta ang stress ukon kon indi mo gusto maglab-ot sa sini nga kahimtangan, mahimo mamangkot ka, “Ano ang dapat ko himuon para mapahaganhagan ang stress?”

May butang nga nakabulig sa iban kag makabulig man ini sa imo. Mahimo wala mo ginapaabot nga makita ini sa Pulong sang Dios, ang Biblia. Bisan pa indi ini libro parte sa medisina, ang praktikal nga kaalam halin sa Biblia makabulig sa aton. Ginapaathag sini kon ano ang kabangdanan sang grabe nga stress subong. May praktikal man ini nga mga panugda para mapahaganhagan kag makontrol ang stress.

[Nota]