Ang Mabuot Pero Makusog nga Shetland Pony

● Kon nakakadto ka na sa isa ka karnabal, mahimo nakakita ka na, ukon nakasakay pa gani, sa Shetland pony. Ini nga klase sang kabayo naghalin sa Shetland Island, sa aminhan-sidlangan sang Scotland. Ang matuod, ang mga arkeologo didto may nakutkutan nga tul-an sang magagmay nga mga kabayo nga linibo ka tuig na nga nalubong.

Mahapos makilala ang Shetland pony. May malip-ot ini nga mga tiil, malaba nga buhok kag ikog, kag madamol nga balahibo, nga amo ang ila pangamlig sa matugnaw nga tiempo sa Shetland Island. Mga 70 asta 107 sentimetros lamang ang kinaandan nga kataason sini kag itom ukon masili nga kaki ang ila kolor. Indi pareho sa iban nga kabayo, pulgada ang ginagamit sa pagtakus sa sini nga kabayo kag indi dapal nga katumbas sa apat ka pulgada. Sa kinaandan, nagataas ini sing 107 sentimetros, magluwas sa American Shetland, nga indi maglapaw sa 117 sentimetros.

Bisan pa gamay ang Shetland pony, makusog ini. Ang matuod, amo ini ang pinakamakusog sa tanan nga klase sang kabayo kon ibase sa ila kadakuon. Gani, ginagamit ini nga kabayo sa paghakot, pag-arado, kag pag-obra sa minahan sang karbon, diin gamay lang nga sapat ang makaagi sa mga tanel. Sa mga minahan na nagtener ang iban sa sini nga mga kabayo kag wala gid makakita sing adlaw.

Kon mahanas sing maayo, ini nga kabayo mabuot kag mahagop, gani bagay ini sa mga bata. Sining karon lang, gingamit man ini nga mga kabayo para ma-therapy sing epektibo ang mga dis-ebol.

Bangod sa ila makawiwili nga kinaiya kag ikasarang nga mabuhi sa sarisari nga lugar, ang mga Shetland pony ginaeksport sa bug-os nga kalibutan. Madamo naman ang club kag narehistro nga mga breed sini nga kabayo. Pero ginapakita gihapon sang ngalan sini ang ginhalinan sang Shetland pony, diin ang mga kabayo mapagros kag wala gid masamuan sing iban nga rasa.

[Retrato sa pahina 24]

Ang mga Shetland pony amo ang pinakamakusog sa tanan nga klase sang kabayo kon ibase sa ila kadakuon

[Picture Credit Line sa pahina 24]

© S Sailer/A Sailer/age fotostock