Gin-usisa sang Isa ka Abogado ang mga Saksi ni Jehova

“DIUTAY gid lang ang akon nahibaluan parte sa mga Saksi ni Jehova,” siling ni Les Civin, nga abogado kag direktor sang isa ka law firm sa Bagatnan nga Aprika. Ngaa gin-usisa niya ang pagpati sang mga Saksi? Ano ang iya nasiling sa sini nga mga pagpati? Amo ini ang iya ginsugid sa Magmata!

Ano ang imo namat-an nga relihion?

Judaismo ang akon relihion sang una, pero sang dekada 1970, ginpangasawa ko si Carol nga isa ka Anglikano. Wala sia sing interes sa relihion, kag wala sing epekto ang relihion sa amon kabuhi sadto. Pero sang otso anyos na ang amon bata nga si Andrew, nagsiling si Carol nga dapat may relihion ang amon bata. Ginsilingan sang isa ka rabbi si Carol nga kon magpakumbertir sia sa Judaismo, mangin Judaismo man ang relihion ni Andrew kag puede na sia maka-Bar Mitzvah (relihioso nga seremonya) pag-13 anyos niya. Gani nagtambong kami sa ila pagdoktrina sa mga sinagoga kada semana.

Paano mo nakilala ang mga Saksi ni Jehova?

Kon magkadto ang mga Saksi sa amon balay, wala ko ginadugay ang pag-istorya sa ila. “Judaismo ang akon relihion kag wala ako nagapati sa Bag-ong Testamento,” siling ko sa ila. Ginsugiran ako ni Carol nga may amiga sia nga Saksi kag madamo ini sing nahibaluan sa Biblia. Nagsiling si Carol nga dapat tun-an pa gid namon ang Biblia. Gani napilitan ako nga magtuon upod sa mga Saksi.

Ano ang imo reaksion sa imo pagtuon sing Biblia?

Debotado gid ako sa akon ginapatihan. Bangod sa pagdoktrina sang Judaismo, nagbakod liwat ang akon pagtuo sa sini kag nagpati ako nga pinili ang amon rasa. Sa pensar ko, ‘Ano pa ang itudlo sini nga mga tawo sa akon?’ Sa una namon nga paghambalanay, ginsilingan ko ang Saksi: “Natawo ako nga Judiyo. Namat-an ko ang Judaismo, gani diri na lang ako mapatay. Indi ko na ini pagbiyaan bisan ano pa ang isiling mo.” Ginrespeto niya ang akon pagtamod. Gani kada Biernes kag Lunes sang gab-i, nagatambong kami sa pagdoktrina sang Judaismo kag kada Domingo sang aga (kon maubusan na ako sing ibalibad) nagatuon kami upod sa mga Saksi. Natalupangdan ko lang galing nga ang pagtuon sa mga Saksi wala sing bayad, indi pareho sa mga pagdoktrina sa sinagoga.

Gingamit ko ang amon Biblia sa Judaismo kay abi ko ginapili lang sang mga Saksi ang translation nga nagasuporta sa ila pagpati. Pero, nakibot gid ako kay halos pareho gid ang duha  ka Biblia. Gani gusto ko pa gid pamatud-an nga wala nahangpan sang mga Saksi ang ila ginatudlo.

Pagkatapos sang pila ka beses nga pagtambong sa ginatudlo sang mga rabbi, nagsiling si Carol nga sa banta niya diutay lang ang nahibaluan sang rabbi parte sa Biblia. Nagsiling sia nga indi na sia magtambong sa mga pagdoktrina kag nagapati gihapon sia nga si Jesus amo ang Cristo. Sa kaakig ko, nagpensar ako nga magbulagay na lang kami. Pero sang naumpawan ako, nakapensar ako sang iban nga paagi—gamiton ko ang akon ihibalo sa kasuguan para pamatud-an kay Carol nga sayop ining ‘makatalagam nga sekta.’

Nagmadinalag-on ka bala?

Ginhatagan ako sang rabbi sing libro para pamatud-an nga indi si Jesus ang Mesias. Sa sulod sang 18 ka bulan, gintun-an namon ni Carol ini nga libro. Ginpadayon man namon ang amon pagtuon sa mga Saksi kada semana. Pero, samtang ginatun-an namon ang mga tagna sa libro nga ginhatag sang rabbi, nagadugang man ang akon pagpangduhaduha. Ang mga tagna sang Biblia parte sa Mesias nagapatuhoy lamang sa isa ka persona—si Jesucristo, pero indi amo sini ang ginasiling sang libro. Nag-athag ang tanan sang gintun-an namon ang tagna sa Daniel 9:24-27, nga nagasiling nga ang Mesias magagua sa tuig 29 C.E. * Nagdala ang Saksi sang Hebreo nga interlinear nga Biblia nga may Ingles nga translation sa idalom sang kada tinaga. Gintan-aw ko ang ginasiling sini, kag ako mismo ang nagsuma sang mga petsa. Nagsiling ako: “OK, ang tagna nagtupa sa 29 C.E. Ti, ano dayon?”

“Amo ina ang tuig nga ginbawtismuhan si Jesus,” siling sang Saksi.

Nakibot gid ako! Nagdayaw man ako kay sibu gid kag nagaalalangot ang mga tagna sa Biblia.

Ano ang reaksion sang imo mga abyan sang magbag-o ang imo pagpati?

Nabalaka gid ang iban kag nagsiling nga may ipakilala sila sa amon para kumbinsihon kami nga natuntuhan kami. Pero ang amon bag-o nga pagpati nabase sa maid-id nga pagtuon kag pangatarungan. Wala kami natuntuhan.

Ngaa nagdesisyon ka nga mangin Saksi?

Sa umpisa, nagtulutambong ako sa pila ka pagtilipon sa Kingdom Hall upod sa akon asawa, nga nangin Saksi na. * Nanamian gid ako kay mainabyanon ang mga Saksi kag may gugma sila sa isa kag isa, bisan pa lainlain ang ila rasa. Wala ko ini makita sa akon relihion. Gani pagkatapos sang mga tatlo pa gid ka tuig nga pagtuon, nagpabawtismo ako.

Ano ang imo nabatyagan sang nagdesisyon ka nga mangin Saksi?

Kadungganan gid ang magsiling nga, “Isa ako sa mga Saksi ni Jehova.” Kon madumduman ko kon paano ko ginpamatukan ang kamatuoran, pamatyag ko indi ako bagay sa mga pagpakamaayo ni Jehova. Pero wala ko gid ginhinulsulan ang akon desisyon.

Ano nga mga pagpakamaayo ang nabaton mo?

Madamo. Una, may pribilehiyo ako nga mag-alagad subong gulang, ukon manugbantay kag manunudlo, sa amon kongregasyon. Nagabulig man ako sa Legal Department sa sanga talatapan sang mga Saksi ni Jehova sa Bagatnan nga Aprika. Pero siempre, ang pinakadaku nga pagpakamaayo amo nga nakilala ko si Jehova kag ang iya Anak, kag nahangpan ko ang matuod nga kahulugan sang aton panahon kag sang grabe nga mga hitabo sa kalibutan.

[Mga Nota]

[Blurb sa pahina 11]

Nagdayaw . . . ako kay sibu gid kag nagaalalangot sing maayo ang mga tagna sa Biblia