Ang Pagtamod sang Biblia

Sin-o ang mga Demonyo?

MADAMO nga tawo sa lainlain nga relihion ang nagapati sa mga murto, engkanto, diwata, kag mga demonyo. Suno sa ila, mabuot ukon mapintas ini nga mga espiritu. Ang iban naman wala nagapati sa sini kay para sa ila sugidsugid lamang ini ukon imahinasyon. Ano ang ginasiling sang Biblia parte sa sini?

Ginatudlo sang Biblia nga ang Manunuga mismo isa ka Espiritu kag ang iya una nga mga tinuga mga espiritu man, nga ginatawag mga anghel. (Juan 4:24; Hebreo 1:13, 14) Dugang pa, may ginsambit ang Biblia nga malain nga mga espiritu, nga kon kaisa ginatawag nga mga demonyo. (1 Corinto 10:20, 21; Santiago 2:19) Pero wala sini gintudlo nga gintuga sang Dios ang mga demonyo. Kon amo, sin-o ining mga demonyo, kag paano sila nagluntad?

“Mga Anghel nga Nakasala”

Sang ginhimo sang Dios ang espiritu nga mga tinuga, may kahilwayan sila sa pagdesisyon. Makapili sila kon bala maayo ukon malain ang ila himuon. Makapasubo nga sa tapos gintuga ang mga tawo, ginpili sang madamo nga anghel nga maghimo sing malain paagi sa pagrebelde sa Dios.

Ang una kag ang pinakakilala nga espiritu nga nagrebelde nangin Satanas. “Wala sia magpabilin nga malig-on sa kamatuoran,” siling ni Jesucristo. (Juan 8:44) Ngaa nagrebelde si Satanas sa Dios? Naghandum sia nga agawon ang pagsimba nga para lamang sa Manunuga, kag ginpakita niya ini paagi sa paghimo sang iya kaugalingon nga kaaway sang Dios. Bangod sini, ginhimo niya ang iya kaugalingon nga “Satanas,” nga nagakahulugan sing “manugpamatok.” Ginatos ka tuig sang ulihi, antes sang Anaw sang panahon ni Noe, ang iban nga anghel nag-upod kay Satanas. Ginbiyaan nila ang ila posisyon sa langit kag nagpakatawo diri sa duta. (Genesis 6:1-4; Santiago 1:13-15) Sang mag-abot ang Anaw, ining “mga anghel nga nakasala” nagbalik sa lugar sang mga espiritu. (2 Pedro 2:4; Genesis 7:17-24) Sang ulihi, gintawag sila nga mga demonyo.—Deuteronomio 32:17; Marcos 1:34.

Lain na ang kahimtangan sining nagsupak nga mga anghel sa kahimtangan nila antes sila nagrebelde. Ang Judas 6 nagsiling: “Ang mga anghel nga wala magpabilin sa ila orihinal nga kahimtangan, kundi nagbiya sang ila nagakaigo nga puluy-an, gintigana [sang Dios] sa mga gapos nga dayon sa mangitungito nga kadudulman para sa paghukom sa dakung adlaw.” Huo, wala na ginpabalik sang Dios ang mga demonyo sa ila posisyon sa langit, kundi ginbutang sila sa simbuliko nga “mangitungito nga kadudulman,” diin indi na nila matigayon ang espirituwal nga kapawa.

“Nagapatalang sa Bug-os Napuy-an nga Duta”

Bisan pa wala na sila gintugutan nga magpakatawo sa duta, gamhanan gihapon ang mga demonyo kag daku ang ila impluwensia sa hunahuna kag kabuhi sang mga tawo. Ang matuod, si Satanas kaupod ang iya mga demonyo, “nagapatalang sa bug-os napuy-an nga duta.” (Bugna 12:9; 16:14) Paano? Ang ila panguna nga paagi amo ang “mga panudlo sang mga demonyo.” (1 Timoteo 4:1) Ining butig nga mga panudlo, nga sa masami panudlo sang mga relihion, nagbulag sa hunahuna sang minilyon. Amo nga indi nila mahibaluan ang kamatuoran parte sa Dios. (2 Corinto 4:4) Binagbinaga ang pila ka halimbawa.

● Ang panudlo nga ang patay nagakabuhi gihapon. Paagi sa mga aparisyon, tingog, kag iban pa nga pagpangdaya, ginapapati sang mga demonyo ang mga tawo nga ang buhi makapakig-angot sa mga patay. Dugang pa, ginasuportahan sini ang kabutigan nga ang kalag nagabulag sa lawas kon mapatay ang isa. Pero ang Biblia maathag nga nagasiling: “Ang patay wala makahibalo sang bisan ano.” (Manugwali 9:5, 6) Bangod ‘nagpanaug na sila sa kalinong,’ wala na sila sing  mahimo bisan ang pagdayaw sa Dios.—Salmo 115:17. *

● Imoral nga pagkabuhi. “Ang bug-os nga kalibutan yara sa gahom sang isa nga malauton,” siling sang 1 Juan 5:19. Ginaabusuhan ni Satanas kag sang iya mga demonyo ang ila gahom paagi sa media kag iban pa para pasanyugon ang ila sayop nga mga ideya nga dapat pagustuhan sang tawo ang tanan nila nga handum. (Efeso 2:1-3) Gani subong, makita bisan diin ang tanan nga sahi sang imoralidad, lakip ang pagpagusto sa seksuwal nga mga buhat. Ginakabig ini nga normal, samtang ang mga prinsipio sa Biblia masami ginatamod nga daan na ukon estrikto katama.

● Paggamit sang espiritismo. Nasugata ni apostol Pablo ang isa ka ulipon nga babayi nga nasudlan sing “demonyo sang pagpamakot,” nga “nakahatag . . . sang madamo nga kinitaan sa iya mga agalon paagi sa pagpamakot.” (Binuhatan 16:16) Bangod nahibaluan ni Pablo nga naghalin sa demonyo ang gahom sang babayi, wala sia namati sa babayi. Isa pa, indi niya gusto nga paakigon ang Dios, tungod sa pagtamod sang Dios, kangil-aran ang tanan nga sahi sang espiritismo, lakip ang astrolohiya kag pagpangayo sing bulig sa mga espiritu.—Deuteronomio 18:10-12.

Amligi ang Imo Kaugalingon sa mga Demonyo

Paano mo maamligan ang imo kaugalingon sa mga demonyo? Ang Biblia nagsabat: “Magpasakop kamo sa Dios; apang pamatuki ang Yawa, kag magapalagyo sia sa inyo.” (Santiago 4:7) Ginatuman naton ini nga sugo kon sundon naton ang mga panudlo sang Biblia. Ini lamang nga libro ang nagasugid kon sin-o gid si Satanas, ang mga demonyo, kag ang ila “mga pahito.” (Efeso 6:11; 2 Corinto 2:11) Ang Biblia nagsiling man nga ang malaut nga mga espiritu, lakip ang tanan nga nagapamatok sa Dios, indi magpabilin asta san-o. (Roma 16:20) “Kay ang matadlong magapuyo sa duta, kag ang himpit magapabilin sa sini,” siling sang Hulubaton 2:21.

[Nota]

NAPAMANGKOT MO BALA?

● Gintuga bala sang Dios ang mga demonyo?—2 Pedro 2:4.

● Maistorya mo bala ang patay?—Manugwali 9:5, 6.

● Paano mo maamligan ang imo kaugalingon sa mga demonyo?—Santiago 4:7.

[Retrato sa pahina 21]

Madamo sing paagi ang mga demonyo para impluwensiahan ang mga tawo