Ang Pinakamaayo nga Palumba nga Gin-entrahan Ko

Panugiron ni Karl-Erik Bergman

Madasig ako magdalagan kag nanamian gid ako sa sini. Gani ang akon kabuhi nasentro na lang sa pag-entra sa palumba.

SANG 1972, nag-entra ako sa isa ka sports club. Disisiete anyos ako sadto kag narealisar ko nga dapat gid ako manikasog para mangin isa ka maayo nga atleta. Para magdaug sa palumba, indi bastante nga madasig ka lang magdalagan. Gani nagpraktis gid ako sing maayo.

Sang 22 anyos ako, nakasulod ako sa national team sang Finland. Pagkadason nga tuig, ako ang may pinakamataas nga aberids sa 100-metros nga sprint sa bilog nga Finland. Pero wala ko malab-ot ang akon handum kay nasamad ang akon hamstring kag Achilles tendon, ukon ang lanitlanit sa ibabaw nayon sang akon tikod. Bangod nanamian gid ako magdalagan, nag-coach na lang ako sa mga atleta nga may potensyal. Sang 1982, nagplano ako nga magsaylo sa California sa Estados Unidos para magtuon sa isa ka unibersidad kag padayunon ang akon karera. Nakabakal na gani ako sing tiket.

Ang Nagpabag-o sa Akon Kabuhi

Isa ka gab-i, mga pila na lang ka adlaw antes ako magpa-California, may nag-doorbell nga duha ka babayi nga Saksi ni Jehova. Talahuron sila tan-awon kag kalmado. Amo ini ang mga kinaiya nga dapat makita sa mga atleta. Ginpasulod ko sila kag kanami gid sang amon istoryahanay. Pagkatapos ginhatagan nila ako sing libro nga Mahimo Ka Mabuhi Sing Dayon sa Paraiso nga Duta. * Ginbasa ko ini kag sang tungatunga na, narealisar ko nga amo ini ang kamatuoran. Pagbalik nila, ginpamangkot ko sila kon paano ako mangin isa ka Saksi ni Jehova. Nagsiling sila nga dapat ako magtuon sa Biblia.

Nagtuon ako sa Biblia kag nag-attend man sa mga miting sang mga Saksi ni Jehova sa Kingdom Hall sa Vantaa, sa lugar nga ginaistaran ko. Natalupangdan ko nga ang ila ginatudlo naghalin gid sa Biblia. Sang natun-an ko ang mga kamatuoran sa Biblia amat-amat ko nga narealisar kon ano gid ang importante sa akon kabuhi. Gani, nagkadto ako sa travel agency kag ginpa-refund ang akon tiket sa eroplano. Ang iban nga kuarta ginbakal ko sing amerikana para may suksukon ako sa miting. Nagbakal man ako sing bag para sudlan sang Biblia kag  iban pa nga literatura. Sang 1983, ginbawtismuhan ako subong Saksi ni Jehova sa isa ka kombension sa Helsinki.

Ang Iban nga Atleta Nagtuon Man sa Biblia

Ginsugid ko sa akon mga abyan ang kamatuoran nga akon natun-an sa Biblia. Sang primero, indi sila magpati sa natabo sa akon. Sang ulihi, naglapta pa gani ang balita nga naglain ang ulo ko. Amat-amat nga ginpalayuan ako sang akon mga abyan. Pagkatapos sang akon bawtismo, regular ako gihapon nga naga-exercise sa oval para mamentinar ang akon lawas. Didto, ginaistorya ko ang mga atleta nga nagapraktis. Nakita nila nga nagbag-o ako, pero wala naglain ang akon ulo.

Sang ulihi, narealisar sang pila sa ila nga rasonable ang akon ginasiling. Natalupangdan nila nga wala na ako nagapamuyayaw kag indi na madali maakig. Ang pila sa ila interesado nga magtuon sa Biblia. Nanamian gid ako nga ipakita sa ila nga ang kabuhi sang isa ka Cristiano ginakomparar sang Biblia sa isa ka palumba sa dalagan. Nagaentra kita sa palumba para sa padya nga kabuhi nga walay katapusan.—2 Timoteo 2:5; 4:7, 8.

Natun-an ko nga ang kalipay kag ang matuod nga kahulugan sang kabuhi nagadepende sa paghimo sang kabubut-on sang aton Manunuga, indi sa pagdaug sa mga palumba. Sang ginsugid ko ini sa iban nga atleta, gin-usisa nila ang ila kabuhi. May pila nga nagbaton sang kamatuoran sa Biblia nga nagpabag-o sang akon kabuhi. Nalipay ako kay kon daw ano sila ka dedikado sa sport sang una, amo man sila subong sa pag-alagad sa Dios.

Ang isa sa ila amo si Yvonne. Sia ang pinakamadasig magdalagan nga babayi sa 800-metros nga palumba sa Scandinavia. Sia ang representante sang Finland sa mga palumba sa Europa. Sang makaistoryahanay kami parte sa Biblia, narealisar ni Yvonne nga wala pulos ang kabantugan sa sini nga kalibutan. Natun-an niya sa Biblia nga magataliwan ini nga kalibutan kag pagabuslan sang Dios sing bag-o.—1 Juan 2:17.

Sang ulihi, nagtuon si Yvonne sa Biblia. Sadto nga tion, ginapangaluyagan sia ni Jouko nga isa man ka madasig nga manugdalagan sang Finland. Nangin representante man sia sang Finland sa mga palumba sa Europa kag sa bilog nga kalibutan. Sang ulihi, nagsaylo sanday Yvonne kag Jouko sa Estados Unidos para padayunon ang ila karera.

Didto, ginpadayon ni Yvonne ang pagtuon sa Biblia kag si Jouko nag-upod man. Nagtuon lang si Jouko para mangita sing sala sa ginatun-an ni Yvonne. Pero amat-amat nga nagtudok man sa iya tagipusuon ang kamatuoran sa Biblia. Nagpakasal sila kag sang ulihi nagdedikar sang ila kabuhi sa Dios paagi sa bawtismo. Subong, pareho sila nga payunir ukon bug-os tion nga ministro sang mga Saksi ni Jehova.

Gintun-an ko man sa Biblia si Barbro, ang pinakamadasig magdalagan nga babayi sa Finland sa 400-metros nga palumba. Sia ang nagrepresentar sa Finland sa mga palumba sa Europa. Nagsaylo sa Sweden si Barbro kag ang iya bana nga si Jarmo nga nagahampang sing pole vault. Didto, ginpadayon ni Barbro ang pagtuon sa Biblia, kag nag-upod man si Jarmo. Nagapangita sila nga duha sing katuyuan sang kabuhi, kag pagkatapos nga makatuon sa Biblia, nagpabawtismo sila sa Sweden. Si Jarmo nangin physiotherapist. Subong, isa na sia ka gulang sa kongregasyon kag mapisan sila nga mag-asawa sa pagwali.

Si Heidi, isa man ka maayo magdalagan nga dalagita. Ako ang iya coach kag natalupangdan ko nga interesado sia sa espirituwal nga mga butang. Gani isa ka adlaw, ginsugid ko sa iya ang ginatudlo sang Biblia parte sa Ginharian sang Dios kag ang mga pagpakamaayo nga himuon sini sa duta. Ginpamangkot ko sia, “Nagapati ka bala nga matabo gid sa aton ining promisa sang Dios?”—Salmo 37:11, 29; Mateo 6:9, 10.

“Huo,” sabat niya. Gusto niya magtuon sa Biblia. Gani, ginpatun-an ko sia sa isa ka saksi nga babayi. Pagkatapos sang pila ka tuig, nagdedikar sia sa Dios kag nagpabawtismo. Nagdaku si Heidi nga matahom kag matutom sa Dios. Sang ulihi, nag-asawahay kami. Maayo gid sia nga kaupod kag grabe ang iya determinasyon sa pag-alagad sa Dios. Kon gingamit  niya ini sa sport, mahimo nga nangin maayo gid sia nga atleta.

Ang akon manghod nga si Peter isa man ka atleta. Sang primero, indi gid sia gusto nga magtuon ako sa Biblia. Pero, ginhatagan ko sia sing libro nga Mabuhi sing Dayon. Sang ulihi, ginsilingan niya ako: “Ginbasa ko ang libro pero ang iban indi ko maintiendihan. Puede mo ‘ko buligan?” Ginpatun-an ko sia sa isa pa ka Saksi kag pagkatapos sang apat lang ka bulan, ginbawtismuhan sia. Sang ulihi, nagpangasawa sia kag ang iya asawa nagapayunir.

Nagadalagan Gihapon

Antes pa ako ginbawtismuhan, determinado ako nga mangin misyonero. Pagkatapos sang akon bawtismo, nagpayunir ako. Narealisar ko nga dapat manikasog ka gid kon ara ka sa palumba para sa kabuhi. Nag-aplay kami ni Heide sa Gilead, ang eskwelahan sang mga Saksi ni Jehova para sa mga misyonero sa New York. Sang 1994, nag-eskwela kami. Pagkagradweyt namon, gin-asayn kami sa Latvia. Ang kalabanan didto nagahambal sing Russian.

Sang nadula sang Unyon Sobyet ang ila gahom, nadulaan man sing paglaum ang mga tawo. Ginpakalain ang Biblia kag gindumilian pa gani ini. Pero natalupangdan namon nga madamo ang interesado sa mensahe sang Biblia. Ang pagtuon sing Russian amo ang isa sa pinakamabudlay nga butang nga ginhimo ko. Pero, pagkatapos sang anom ka tuig nga pagmisyonero sa Latvia, gintangdo ako subong nagalakbay nga manugtatap para bisitahon kag palig-unon ang mga kongregasyon sang mga Saksi ni Jehova. Amo ini ang ginahimo namon sang akon matutom nga asawa asta subong.

Sa sulod sang mga tinuig, madamo ako sing gin-training para sa palumba sa kabuhi, ang “matuod nga kabuhi” sa bag-o nga kalibutan sang Dios. (1 Timoteo 6:19) Para buligan ang mga atleta nga malab-ot ang ila potensyal, kinahanglan nga maintiendihan sila sang ila coach. Dapat buligan niya sila nga mapauswag pa gid ang ila mga ikasarang kag buhinan ang ila mga kaluyahon. Dapat palig-unon niya sila nga magpadayon kag lab-uton ang ila potensyal.

Narealisar ko nga ang isa ka Cristiano halos pareho sa isa ka atleta, subong ginapakita ni apostol Pablo sa iya una nga sulat sa mga taga-Corinto. Ang isa ka maayo nga atleta wala lamang nagahandum nga magdaug kundi dedikado gid sia sa pagpraktis. Nagahimo sia sing realistiko nga mga lalab-uton kag nagatinguha gid nga malab-ot ini. Kon mag-untat sia, wala sing pulos ang tanan niya nga ginpanikasugan. Ang matuod nga Cristiano dapat man magpadayon.

Ang isa ka maayo nga atleta disiplinado man sa iya pagkaon kag may dieta gid nga ginasunod. Amo man sini ang matuod nga Cristiano. Ginalikawan niya ang imoral nga mga panudlo kag wala sia nagakaon sa “lamesa sang mga demonyo,” subong ginsiling ni apostol Pablo. Sa baylo, nagakaon sia sing espirituwal nga pagkaon halin sa Pulong sang Dios, ang Biblia. (1 Corinto 10:21) Kon may mga problema, ang isa ka maayo nga atleta positibo gihapon. Ginabaton niya ang iya sala kag ginatadlong ini. “Ang paagi sang akon pagdalagan indi wala sing kapat-uran,” siling ni Pablo. “Kundi ginasakit ko ang akon lawas,” siling niya, para makapadayon sia.—1 Corinto 9:24-27.

Pirme kami gihapon naga-exercise sang akon  asawa sa gym para magbakod kag magnami ang amon lawas. Pero ginauna gid namon ang pag-alagad kay Jehova, ang nagtuga sa tawo sa makatilingala nga paagi. (Salmo 139:14) Nagabuligay kami nga duha para malab-ot “ang matuod nga kabuhi” sa bag-o nga kalibutan sang Dios “sa palaabuton.”—1 Timoteo 4:8.

Sa tapos nga ginhinambitan ni apostol Pablo ang “panganod sang mga saksi” antes sang panahon sang mga Cristiano, sia nagsiling: “Isikway man naton ang tagsa ka kabug-atan kag ang sala nga madali nagasalawid sa aton, kag magdalagan kita nga may pagbatas sang dalaganon nga ginabutang sa aton atubangan.” (Hebreo 12:1) Ang pinakamaayo nga mahimo naton amo ang pag-entra sa sini nga palumba kay ang tanan nga makalab-ot sa inangan, makabaton sing walay katapusan nga mga pagpakamaayo.—2 Timoteo 4:7, 8.

[Nota]

[Retrato sa pahina 14]

Sang tungatunga sang 1980: Si Heidi kag ako; si Yvonne sa ibabaw kag si Jouko kag ang ila bata nga babayi sa idalom

[Retrato sa pahina 15]

Upod kay Heidi subong samtang nagawali

[Retrato sa pahina 15]

Sa 2009 nga kombension sang mga Saksi ni Jehova sa Helsinki. Sanday Yvonne kag Jouko sa amon wala kag sanday Jarmo kag Barbro sa amon tuo

[Picture Credit Line sa pahina 12]

Published in Aamulehti 8/21/1979