May Nagdesinyo Bala Sini?

Ang Dila sang Hummingbird

● Ginatun-an sang mga researcher ang tuman ka diutay nga dugo, DNA, kag iban pa nga substansia. Para mabutang ini sa daw platito nga kristal, ang mga researcher nagagamit sing suction ukon pangsuyop. Pero indi ini ang pinakamaayo nga paagi. May mas maayo bala nga paagi sa pagkuha sining tama ka diutay nga mga likido? Suno kay Dr. John Bush sang Massachusetts Institute of Technology, ‘nahimo na ini sang buhi nga mga butang.’

Binagbinaga: Ang hummingbird indi na kinahanglan nga mangabudlay pa sa pagsuyop sang dugos sang bulak. Ngaa? Ginagamit niya ang cohesive force ukon ang puersa nga nagapasaka sa tubig kon ara ini sa matapan nga butang. Kon matandog sang dila sang hummingbird ang dugos, ginapuersa sini ang iya dila nga magpilo nga daw pareho sang gamay nga straw amo nga nagasaka ang dugos. Wala na nagapangabudlay ang hummingbird sa pagsuyop. Nagasaka lang ang dugos sa iya baba. Sa ila pagpanginaon, makasaka ang dugos sa ila dila sing 20 ka beses sa isa lang ka segundo!

Amo man sini ang ginahimo sang iban nga pispis sa baybayon kon nagainom sing tubig. Ini nga pamaagi, ginkomentuhan ni Professor Mark Denny sang Stanford University, sa California, U.S.A. Sia nagsiling: “Isa ini ka maayo nga kombinasyon sang engineering, physics, kag applied math . . . Kon hambalon mo ang isa ka engineer ukon applied mathematician nga magdesinyo sing isa ka paagi para mapasaka ang tubig halin sa tuktok sang pispis pakadto sa iya baba, mahimo nga indi gid nila ini mapamensaran.”

Ano sa banta mo? Natabuan lang bala nga ang gamay nga dila sang hummingbird may ikasarang sa pagpasaka sang dugos sing madasig kag sa pinakamaayo nga paagi? Ukon may nagdesinyo sini?

[Picture Credit Line sa pahina 23]

© Richard Mittleman/Gon2Foto/Alamy