Mga Tawo nga Imo Masaligan

Si Santiago isa ka drayber sa Argentina. Sang may nabilin nga bag sa iya taxi, wala na sia nagduhaduha pa kon ano ang himuon. Gin-uli niya dayon ini sa tag-iya. Posible madamo man ang nagahimo sini. Pero kabalo ka bala kon pila ang unod sang bag? Sobra $32,000 (mga ₱1.5 milyones)!

ANO ayhan ang aton kabuhi kon ang tanan nga tawo masaligan? Indi bala nga indi ka na mahadlok nga bayaan ang imo bata sa iya yaya? Kag indi naman kinahanglan nga kandaduhan mo ang imo balay. Pero, posible bala ini?

Ang Epekto sang Maayo nga mga Prinsipio

Si apostol Pablo nagsiling parte sa ila nga mga Cristiano: “Luyag namon maggawi sing bunayag sa tanan nga butang.” (Hebreo 13:18) Amo gid sini ang ginatinguhaan sang mga Saksi ni Jehova. Gusto nila sundon ini nga mga kinaiya nga mabasa sa Biblia: “Ang mga tawo nga nagakabuhi sing matarong kag nagasugid sing matuod. Wala sila nagapanguwarta, kag wala nagabaton sang lagay.” (Isaias 33:15, APD) Paano nila ini ginasunod?

● “Nagasugid sing matuod.” Si Domingo, nga isa ka Saksi ni Jehova, nagaobra sa isa ka koprasan sa Pilipinas. “Madamo ang nagadinaya sa ila mga amo,” siling niya. “Halimbawa kon magkuha sila sing kopra, wala nila ginasugid sa ila amo kon pila gid ka sako ang ila nakuha. Gani, puede nila mapalapaw ang pila ka sako.”

Diutayan man mapahalin si Domingo kag ang iya pamilya sa koprasan kay indi sila magbinutig para sa ila amo. Nagsiling sia: “Ginsilingan ko ang amon amo nga bisan pahalinon kami, indi gid kami magbinutig. Sang ulihi, nagsiling sia nga ang mga Saksi ni Jehova maayo gid kag masaligan nga mga tawo. Gani, ginhatagan niya kami sing dugang nga duta para tamnan.”

● ‘Wala nagapangwarta.’ Si Pierre, nga chief tax officer sa isa ka lugar sa Cameroon, may daku gid tani nga tsansa nga makapangwarta. Sang gin-asayn sia nga magpanueldo sa kaswal nga mga empleyado, may nakita sia nga diperensia. “May sueldo gihapon ang mga empleyado nga patay na ukon wala na diri nagaobra,” siling ni Pierre. “Sa baylo nga gamiton ang kuarta, ginrekord ko ini kag gintago sa talaguan sang opisina.”

Ano ang resulta? “Pagligad sang duha ka tuig,” siling niya, “gin-awdit kami. Nalipay gid ako nga ipakita sa mga auditor ang akon rekord  kag ginbalik ko ang daku nga kuarta nga akon natipon. Gindayaw gid nila ako bangod sa akon pagkabunayag.”

● “Wala nagabaton sang lagay.” Si Ricardo isa ka manugnotaryo sa Rio de Janeiro, Brazil. Bangod sini, pirme sia ginatanyagan sing lagay ukon hamham. “Isa ka bes,” siling niya, “may isa ka abogado nga naghamham sa akon. Wala ako kabalo nga nagpadala sia sang CD player sa balay. Sadto nga tion, ang CD player mahal gid kag pila lang ang may amo sini.”

Ano ang ginhimo ni Ricardo? “Nagdesisyon kami sang akon asawa nga indi ini pagbuksan,” siling niya. “Nagkadto ako sa opisina sang abogado kag gintungtong sa iya lamesa ang iya ginregalo. Nakibot gid sia. Ginpaathag ko sa iya kon ngaa ginbalik ko ini. Nagdayaw gid ang iya sekretarya sa akon ginhimo.”

Indi lang mga Saksi ni Jehova ang nagatinguha nga mangin bunayag, pero sa kabilugan, kilala sila nga masaligan. Amo gani nga sa Poland, may isa ka balaligyaan sang bayo nga may pila ka tindahan, nga ang ginakuha nga mga trabahador mga Saksi ni Jehova lang. Nagsiling ang manedyer: “Madamo man sing  masaligan nga mga tawo, pero ang mga Saksi ni Jehova may ginasunod gid nga mga prinsipio.”

Masaligan Bisan Imol

Para sa madamo nga tawo, puede ka magdinaya kon imol ka. Halimbawa, ang CNN nagreport parte sa 14 anyos nga solterito nga taga-Nigeria nga nagapanonto sa mga tawo sa Internet. “Ti ano ‘bi ang mahimo ko?” siling niya. “Ako ang nagapakaon sa akon pamilya—sa akon manghod nga babayi, sa akon iloy, kag amay. Kinahanglan namon mabuhi.”

Ang Biblia wala nagapromisa nga magamanggaranon ang mga bunayag. Pero nagapasalig ini nga hatagan sila sang ila kinahanglanon: “Indi sila mawad-an sang pagkaon kag tubig.”—Isaias 33:16, APD.

Pero, mahimo mamangkot ang iban: ‘Paano makabulig ang pagkabunayag kon ara ka sa tama kabudlay nga sitwasyon? Paano ini makabulig sa mga tawo nga haluson lang makakaon?’

Si Berthe isa ka balo nga babayi nga taga-Cameroon. May ara sia gamay nga balaligyaan sang miando, isa ka manamit nga kalan-on halin sa balinghoy. “Dapat tani may 20 ka miando sa isa ka bugkos,” siling niya. “Pero 17 ukon 18 lang ang ginabutang pirme sang mga manugbaligya sa kalabanan nga bugkos. Indi ko ‘ya gusto nga magdinaya para lang makakuarta.”

Maayo bala ang kita ni Berthe? Indi gid pirme. “Sa masami bilog nga adlaw nga wala ako sing benta,” siling niya. “Pero kon mangutang  ako sa mga nagabaligya sing pagkaon kag silingon sila nga wala pa ako sing benta, nagapautang sila kay kabalo gid sila nga mabayad ako dayon kon makakuarta na ‘ko. Nagasalig sila sa akon kay nakita nila nga masaligan ako.”

Ang Dios nga Dapat Naton Saligan

Nagadugang ang aton pagsalig sa isa kon makita naton nga ginatuman gid niya ang iya ginahambal. Si Josue, ang lider sang Israel sang una, nagsiling parte sa Dios: “Walay bisan ano nga nakulang sang bisan anong maayong butang nga napamolong sang GINOO . . . nahanabu ang tanan.” (Josue 21:45) May rason man bala kita nga magsalig sa Dios?

Masaligan gid ang mga promisa sang Dios amo nga ginkomparar niya ang iya pulong sa ulan. (Isaias 55:10, 11) May makapugong bala sa ulan sa pagtupa, sa pagpanalupsop sa duta, kag sa pagpatubo sa mga tanom? Wala gid! Sing kaanggid, wala man sing makapugong sa Dios sa pagtuman sang iya mga promisa.

Ang isa sini nga mga promisa narekord sa 2 Pedro 3:13: “May bag-ong langit kag bag-ong duta nga ginahulat naton suno sa iya saad, kag sa sini magapuyo ang pagkamatarong.” Katuyuan gid sang Dios nga laglagon ang mga nagapanonto sa ila isigkatawo. Gusto mo bala mahibaluan pa gid kon paano tumanon sang Dios ang iya katuyuan? Palihug kontaka ang mga Saksi ni Jehova sa inyo lugar, ukon magsulat sa nagakaigo nga adres sa pahina 5 sini nga magasin.

[Kahon/Retrato sa pahina 8]

GINPADYAAN ANG PAGKABUNAYAG

Si Lucio isa ka Saksi ni Jehova sa Pilipinas. Nakakita sia sing $27,500 (mga ₱1.3 milyones) sa daan nga kabinet sa opisina sang iya amo nga ginpatinluan sa iya. Wala ang iya amo kay may gin-asikaso nga transaksion sa negosyo. Puede gid tani nga kuhaon na lang niya ini. “Bag-o pa lang ako nakakita sing dolyar!” siling ni Lucio.

Pagbalik sang iya amo, ginhatag sa iya ni Lucio ang kuarta. Ano dayon ang natabo? “Ginhatagan ako sing dugang nga responsibilidad,” siling ni Lucio. “Ginhatagan pa gani kami sang akon amo sing isa ka kuarto para istaran sang akon pamilya. Bisan pa pigado ang kabuhi sa Pilipinas, nabatyagan ko nga ginaatipan kami ni Jehova nga Dios kay ginasunod gid namon ang iya mga kasuguan.”

[Kahon/Retrato sa pahina 9]

KILUHAN NGA WALA SING DAYA

Kilala gid sa tiendahan sang Douala, Cameroon ang balaligyaan ni Moïse sang isda. “Ginngalanan ko ang akon gamay nga balaligyaan Ang Kiluhan,” siling niya, “bangod sa bilog nga tiendahan, ang akon kiluhan isa sa mga wala sing daya. Kabalo ko nga ginatestingan ako pirme sang mga tawo. Kon magbakal sila sa akon sing isa ka kilo nga isda, isa ka kilo gid ang ginahatag ko. Pero kon ipakilo nila ini sa iban nga kiluhan, sobra ini isa ka kilo! Gani, mabal-an nila nga wala ko sila gindayaan! Madamo ang nagasiling sa akon, ‘Sa imo kami nagabakal kay wala ka ‘ya nagadinaya.’”

[Retrato sa pahina 7]

“Ginsilingan ko ang amon amo nga bisan pahalinon kami, indi gid kami magbinutig.”—Domingo, Pilipinas.

[Retrato sa pahina 7]

‘Gindayaw gid ako sang mga auditor bangod sa akon pagkabunayag.’—Pierre, Cameroon.

[Retrato sa pahina 7]

“May isa ka abogado nga naghamham sa akon. . . . Nagdesisyon kami sang akon asawa nga indi ini pagbuksan.”—Ricardo, Brazil.

[Retrato sa pahina 7]

Si Berthe masami nga wala sing benta sa bilog nga adlaw. Pero ginapautang sia sang mga nagabaligya sing pagkaon kay nakahibalo gid sila nga mabayad sia dayon kon makakuarta na sia.