Ang Biblia—Ngaa Dapat Mo Mahibaluan ang Mensahe Sini?

● Ang Biblia amo ang pinakalapnag nga libro nga ginpanagtag halin sang una. Importante gid ini sa madamo nga tawo. Kon magpanumpa ang isa sa korte ukon magbaton sang isa ka posisyon sa gobierno, diri niya ginatungtong ang iya kamot. Ang ihibalo halin sa Biblia amo man ang pinakaimportante nga edukasyon nga mabaton sang isa.

Madamo ang magaugyon nga mangin mas maayo ang kalibutan kon madamo pa nga tawo ang magabasa kag magasunod sa ginasiling sang Biblia. Ang brosyur nga Ang Biblia—Ano ang Mensahe Sini? nga may 32 ka pahina kag matahom nga mga piktyur, makabulig sa imo nga matun-an ang ginatudlo sang Biblia. Ginapakita sang una nga duha ka seksion sini kon paano naghimo ang Manunuga sing paraiso para sa mga tawo kag kon paano ini nadula. Sa masunod naman nga mga seksion mabasa ang parte sa mga tawo sang una nga gingamit sang Dios nga mangin alagyan sang Manuggahom sang iya Ginharian ukon gobierno nga magapasag-uli sang Paraiso diri sa duta.

Mabasa man sa masunod nga mga seksion ang kabuhi, ministeryo, mga milagro, kamatayon, kag pagkabanhaw sang gintangdo sang Dios nga Manuggahom, si Jesucristo. Sa apat ka katapusan nga seksion, ginsaysay sing malip-ot ang ministeryo, mga sinulatan, kag kon paano gintilawan ang pagtuo sang mga sumulunod ni Jesus sang unang siglo. Manamian ka gid sa seksion nga “Ang Duta Mangin Paraiso!” upod sa matahom nga mga piktyur sa hingapusan nga pahina nga may tig-ulo, “Ang Mensahe sang Biblia—Sumaryo.”

Mahimo ka makapangabay sing kopya sini nga brosyur paagi sa pagsulat sa kupon sa ubos kag ipadala ini sa adres sa pahina 5 sini nga magasin.

□ Interesado ako nga makabaton sing kopya sang brosyur nga ginapakita diri.

□ Palihug kontaka ako para sa wala bayad nga pagtuon sa Biblia sa puluy-an.