Nagapangampanya ang mga Ateista

MAY bag-o subong nga grupo sang mga ateista. Indi sila gusto nga taguon lang ang ila mga pagpati. Kundi “aktibo sila kag agresibo nga nagapangampanya para kumbinsihon ang relihioso nga mga tawo,” siling sang isa ka kolumnista nga si Richard Bernstein. Bisan ang mga agnostiko ginahaylo man sining bag-o nga mga ateista. Para sa ila, wala gid sang Dios. Tapos ang istorya.

‘Dapat magbugtaw na ang kalibutan sa ila relihioso nga mga pagpati nga wala sing pulos,’ siling sang nakakuha sing Nobel Prize nga si Steven Weinberg. “Tinguhaan gid namon nga mga sientipiko nga paluyahon ang impluwensia sang relihion, kag posible amo ini ang pinakamaayo nga mahimo namon para sa mga tawo.” Ang isa ka paagi para mahimo nila ini amo ang pagsulat sing mga artikulo nga makapainteres gid sa mga tawo. Ang pila gani nila ka libro nangin mabakal gid.

Ang relihion isa man sa mga rason kon ngaa nagdamo ang bag-o nga mga ateista. Ang mga tawo subong natak-an na sa relihioso nga mga panatiko, terorismo, kag kinagamo sa kalibutan. “Ginahiluan sang relihion ang tanan,” siling sang isa ka kilala nga ateista. Ina nga ‘hilo’ wala lamang kuno nagapatuhoy sa pagtamod sang mga panatiko kundi sa mga doktrina man sang relihion. Suno sa bag-o nga mga ateista, ining panguna nga mga doktrina dapat ibuyagyag, isikway, kag islan sing maalam kag lohikal nga mga pangatarungan. Indi dapat mahadlok ang mga tawo nga ibuyagyag ang “tama kadamo kag wala sing pulos nga mga panudlo” nga mabasa sa Biblia kag sa Koran, siling ni Sam Harris nga isa ka ateista. “Indi na puede nga maghipos lang kami para . . . pahamut-an ang mga relihioso.”

Ginapakalain sang bag-o nga mga ateista ang relihion pero ginadayaw gid nila ang siensia. Ang iban gani sa ila nagasiling nga ang siensia nagapamatuod nga wala sing Dios. Pero, amo gid man bala? “Magaabot gid ang tion,” siling ni Harris, “nga may magadaug sa sini nga argumento kag may mapierde.”

Diin ayhan sa duha ang magadaug? Samtang ginabinagbinag mo ini, pamangkuta ang imo kaugalingon: ‘Malain gid man bala ang epekto sa aton kon magpati kita sa Manunuga? Mangin mas maayo bala ang aton kalibutan kon ang tanan nga tawo ateista?’ Binagbinagon naton kon ano ang ginasiling sang pila ka respetado nga sientipiko kag pilosopo parte sa ateismo, relihion, kag siensia.