Tinguhai nga Mangin Maayo ang Imo Panglawas

NADUMDUMAN mo bala si Ram nga ginsambit sa una nga artikulo? Pareho sa iban, wala man niya narealisar nga importante ang husto nga pagkaon kag pag-atipan sa aton lawas. Nagsiling sia: “Nabuligan ako sang artikulo sa Magmata! nga ‘Masustansia nga mga Pagkaon nga Sarang Mo Matigayon’ (Mayo 8, 2002) nga pilion ang akon ginakaon.”

Nagsiling pa sia: “Ginsunod namon ang amon natun-an sa sini nga artikulo. Natalupangdan namon nga nagbakod ang amon immune system. Sang una, pirme lang kami ginatrangkaso, pero subong talagsa na lang. Natun-an man namon sa artikulo sang Magmata! nga ‘6 ka Paagi sa Pag-amlig Sang Imo Kapagros’ kon paano makakuha sing matinlo nga tubig sa barato kag mahapos nga paagi.”—Oktubre 8, 2003.

“Ang isa pa ka artikulo sang Magmata! nga nakabulig sa amon pamilya amo ang ‘Habon—“Bakuna nga Mahimo mo sa Imo Kaugalingon”’ sa Disiembre 8, 2003 nga isyu. Ang mga panugda diri ginsunod dayon namon. Subong, wala na nagakaimpeksion ang amon mata.

“Sa amon lugar, ginapabay-an lang sang mga tawo ang madamo nga langaw kag lamok. Pero natun-an namon sa video nga The Bible—Its Power in Your Life, * nga dapat proteksionan naton ang aton kaugalingon sa sini nga mga insekto. Nakabulig ini nga mangin maayo ang amon panglawas.”

Indi Mag-untat! Mas maayo nga magsugod sing amat-amat. Likawi ang indi rasonable nga mga tulumuron. Halimbawa, buhinbuhini ang pagkaon sang indi masustansia nga pagkaon sa baylo nga untatan ini dayon. Tinguhai nga magtulog sing mas temprano kag mag-ehersisyo. Mas maayo nga may ginahimo ka bisan tagdiutay lang sangsa wala na gid. Masami nga sinemana ukon binulan pa gani antes nga maanad ka sa imo bag-o nga rutina. Indi magkasubo kon indi mo dayon makita ang resulta sang imo panikasog. Kon magpadayon ka bisan mabudlay, mangin maayo gid ang imo panglawas.

Sa subong, imposible nga matigayon ang perpekto nga panglawas. Kon magmasakit ka, mahimo bangod ini sa napanubli nga sala kag indi sa imo pagpabaya. Gani, indi gid magkabalaka. “Sin-o sa inyo nga bangod sa pagkabalaka makasugpon sang isa ka maniko sa kalawigon sang iya kabuhi?” pamangkot ni Jesus. (Lucas 12:25) Likawi lang ang mga butang nga makapalip-ot ukon makahalit sa imo kabuhi. Kon himuon mo ini, matigayon mo ang maayo nga panglawas asta mag-abot ang bag-o nga kalibutan sang Dios nga wala na sing magasiling: “Nagamasakit ako.”—Isaias 33:24.

[Nota]