“Daw Indi Ko Ini Pag-untatan!”

● Ang mga pamatan-on sa bilog nga kalibutan nagapasalamat gid sa libro nga Questions Young People Ask—Answers That Work, Volume 2. * Binagbinaga ang pila ka halimbawa:

“Nanamian gid ako kay ginapalig-on ako sini nga libro nga makig-istorya sa akon ginikanan. Ginsunod ko ini kag subong, pirme na kami nagaistoryahanay.”—Roberto, Mexico.

“Kon basahon ko ini nga libro, daw indi ko ini pag-untatan! Nanamian ako sa ‘Action Plan’ sa katapusan sang kada chapter kag sa ‘My Journal’ sa katapusan sang kada seksion. Nakabulig ini sa akon nga manindugan sa akon ginapatihan kon ara ako sa eskwelahan.”—Joelah, Estados Unidos.

“Grabe ang epekto sa akon kada magbasa ako sini. Nanamian gid ako sa mga komento sang madamo nga pamatan-on, pati na ang mga kahon nga ‘Tip’ kag ‘Did You Know?’ Nabatyagan ko nga interesado gid sa mga pamatan-on ang Nagadumala nga Hubon sang mga Saksi ni Jehova!”—Hui-won, South Korea.

 “Sa tanan nga libro sang mga Saksi ni Jehova, amo gid ini ang pinakananamian ko. Nabal-an gid ninyo kon ano ang ginapamensar sang mga tin-edyer kag ang ila mga problema sa pamilya, eskwelahan, kag mga abyan.”—Shana, Canada.

“Kon magbaisay gani ang akon ginikanan, nagasulod ako sa kuarto kag maghibi. Pero sang mabasa ko ang kapitulo 24 nga ‘What Should I Do if My Parents Argue?,’ nakabulig ini sa akon nga maistorya sanday Nanay kag Tatay. Nakibot gid sila nga nagalalain gali ako kon magbaisay sila. Ginbasa man nila ini nga chapter. Subong, naintiendihan na nila ako, kag talagsa na lang sila nagabaisay.”—Mariana, Czech Republic.

“Ang ‘Role Model’ nakabulig sa akon nga batuan ang akon mga kaluyahon. Halimbawa, nabudlayan ako makigbagay sa mga tawo nga indi ko masyado kilala sa Cristianong kongregasyon. Pero ginapakita sa pahina 97 nga nakilala ni Lydia si Pablo kag ang iya mga kaupod kay gin-amuma niya sila. Ginasunod ko na subong ang iya halimbawa.”—Mónika, Hungary.

[Nota]

[Kahon/Retrato sa pahina 25]

NGAA SALA ANG PAG-SEX ANTES SANG KASAL?

Ang 16 anyos nga si Katrina sa Estados Unidos gin-asayn nga maghatag sing oral report sa ila speech class parte sa topiko nga gusto niya. Gingamit niya ang libro nga Questions Young People Ask—Answers That Work, Volume 2. Ginpili niya ang topiko nga “Sex Before Marriage—Why It Is Wrong.” Ang iya ginikanan nagsiling: “Sa report ni Katrina, ginpaathag niya ang tinaga nga ‘abstinence,’ ginpakita ang malain nga resulta sang premarital sex kag ang pagbalewala sa mga talaksan sang Dios sa moral. Ginbasa man ni Katrina sa libro kon ano ang ginbatyag sang pila ka pamatan-on sang nakasala sila sa Dios. Dayon gin-agda niya ang iya mga klasmeyt nga magpamangkot kag ginsabat ini. Pagkatapos sang iya report, ginhatagan sia sang iya maestra sing sulat nga nagasiling: ‘Salamat sa paghambal mo sing kamatuoran kag paghatag sing kasanag sa sining madulom nga kalibutan. Kabay pa nga mangin mabakod ang imo pagtuo.’”